العربية دى بالذات ابتدت تنتشر جامد فى التاكسيات فعلا و ده معناه انها عربية كويسة
العربية دى بالذات ابتدت تنتشر جامد فى التاكسيات فعلا و ده معناه انها عربية كويسة
أنا ركبت العربية دي وهي زيرو وكنا بليل متأخر والطريق فاضي والله مش حتسدقوا لو قلتلكوا إني كنت حاسس إني راكب طيارة مش عربية ناعمة أوي والمتور ملوش صوت وتابلوه محترم وقعدة نضييييفة فعلا عربية محترمة أوي
ومرة سمعت سواق تاكسي بيكلم صاحبه سواق التاكسي وبيقوله أنا قعدت 3 شهور بقارن بين البيد والفيرنا واللانوس وفي الآخر جاب البيد فأكيد طبعا مجبهاش من فراغ
الصينى صينى وعمرى ما هركب عربيه صينى . واحنا كمصرين لو سمحتو لازم نفكر فى عناصر الامان شويه
مافيش غيرنا مش فارقه معاه
جميع فئات الاسبرانزا والبي واي دي بها abs + ebd
من قبل تطبيق شروط الأمان هنا في مصر والسيارات الكوري في نفس الفئة السعريه ليس بها عامل امان واحد الى يومنا هذا.
والكلام ينطبق أيضا على فئات سعريه أعلى مثل اول فئة من النيسان صني اللي ب84 الف
صدمت لما عرفت انها بدون abs مع كامل احترمي لها وأقر انه لاوجه للمقارنه بينها وبين الصيني بس حبيت اوضح لحضرتك نقطة عوامل الأمان
الصينى عامل زى الكورى فى وجهة نظرى مع الفارق :
الصينى : خاماتة كويسة جدا جلد وتابلوة شيك ومتبطن لكن فية فروقات فى التقفيل واحدة ولو دققت هتكتشفها لانى عامل زيك كدة بالظبط , الكورى خامات بلاستيك بس تقفيلها كويس
الصينى : بيعتمد على المواتير القديمة من اليابانى وبيقدم شاسيهات كبيرة وقوية تستحمل وفى نفس الوقت بتجرى بس مش قوى
الكورى : بيقدم بودى صغير ومتوسط على مواتير قوية
الصينى : تلاقى كل عوامل الامان وبسعر سيارة مستعملة من الكورى
الكورى : عربيات مافيهاش الهواء وسعرها غالى والناس بردة بتشتريها لحد الان مع ان خلاص بقى المفروض يبقى الناس اوعى من كدة
الصينى : لاسف مابيستحملش المشقة واى حد عايز يتاكد شوف كام عربية صينى واقفين فاتحين الكابوت بسبب اعطال
الكورى نفس الكلام شوف كم الفيرنا اللى عطلانة وبقيت السيارات الكورى اللى مش مكملة سنة شغل وعلى فكرة دة كلام سواق تاكسى اكد نفس كلامى
الصينى عفشتة بتبوظ بسرعة جدا , الكورى بياخد وقت اكتر منة شوية يعنى كمان 10000 الاف او اكتر بقليل وتبدأ العفشة تفتح بقها
عموما خلاصة الكلام : ال byd سيارة كويسة بس كحال الصينى والكورى فرحتهم فى اول سنتين
مع احترامي لل abs & ebd اللي موجود في الإسبرانزا ولا ليهم لازمه وللأسف الشديد ان فراملها ولا فرامل الموتسيكل وده عن تجربه مع صديق راكب العربيه ولبس من قدام ولما رحنا التوكيل وسيادته طلب 15 الف جنيه مصري كمقايسه مبدئيه قابله للزياده او النقصان لاقينا كم غريب من العربيات دي حوادث من الأمام فقط يعني عيب فرامل.
والصديق صلحها بره وباعها بخساره جامده وبعد لما باعها اعترف ان الفرامل ضعيفه جدا جدا وان ال 128 اللي كانت معاه قبلها كانت فراملها احسن بمراحل مع العلم العربيه مكملتشي 25 الف كم وصيانتها بالكامل في التوكيل.
النقطه هنا ان الموضوع مش موضوع اسامي وتكنولوجي موجود وخلاص abs , ebd,.... والنتيجه في الاخر ان الفرامل سيئه جدا الأمان مش بالأسامي ولا الشهره الأمان لما تتزنق في الفرامل وتيجي تدوس ماتمسكشي معاك وتلاقي العربيه لبست وزحفت ويافرحتي عندي abs & ebd .
انا حبيت اقول النقطه ديه للأمانه فقط وليس اكثر عشان تبقى الصوره واضحه.
العربيه دي محترمه فعلا وثباتها كويس
بس المشكله اللي في كل العربيات الصيني لما عفشتها بتتعب بتطلع اصوات غريبه الشكل مشوفتهاش في اي عربيات تانيه
:Y_hi_3[1]:
انت متحامل على الكوري والصيني جامد
الصيني لي حق في كزا جمله
انما الكوري عربيات كويسه وبتستحمل جدا انا ركبت تاكسي 150 الف كيلو بقوله انت غيرت عفشه قبل كده لا دي الاصلي بتاعها وطلع بيحترم العربيه
الصيني عفشته مش بتستحمل فعلا
قولي انت كام مره شوفت فيرنا عطلانه في طريق؟؟ عشان انا ولا مره شوفت فيرنا عطلانه
أولاً الشكر لله .. ثانياً عاوزك تحط في دماغك أن مفيش عربية من غير عيوب .. حتى لو مرسيدس أو بي أم .. فالكمال لله وحده .. ولكن المقصود أيه القيمة اللي باخدها مقابل الفلوس اللي بدفعها .
ركوبة البي واي دي بالنسبة لأداء الموتور .. اكنت راكب لانسر بومة بالظبط سواء في صوت الموتور أو في السحب والأداء .. والصالون واسع بالفعل ومريح في قعدته .
أفتكر الكلمة اللي بتقولها دي .. علشان بعد كدة إن شاء الله في خلال الخمس سنوات القادمة حتلاقي نفسك مضطر تركب صيني أو على الأقل بتفكر فيها لأسباب كتير .. وأرجو مراجعة بدايات العربيات الياباني في الثمانينات والكوري في التسعينات حتلاقيها هي هي نفس البدايات .
لا لا ومش دفاعاً على العربيات الصيني (وأني بالذات مبحبش الاسبرانزا) .. إلا أنه كان بالتأكيد في عيب فردي في عربية صاحبك .. أنا حتكلم عن تجارب في فرامل البي واي دي وكانت زي الفل .
ميزة البي واي دي أن قطع الغيار في التوكيل أسعارها رخيصصصصة جداً بالنسبة لمثيلاتها من العربيات التانية .. بالإضافة لإمكانية تركيب عفشة تويوتا ياباني أصلي سواء مساعدين أو سوست وتيل فرامل .. فالعربية دي مزيج من اللانسر بومة والتويوتا .
على فكرة حتلاقي تقريباً العربيات الواقعة في نفس الفئة السعرية (السبعينات) سواء كوري أو صيني أداءهم واحد في الاعتمادية .. ولكن الفرق أن العربيات الصيني تتفوق في الكماليات والأوبشن اللي فيها ومش موجودة في الكوري .