صيانة ال 25k + صدفه سعيده لأول مره
السلام عليكم ورحمة الله وبركاته
أنا يمكن معاملتيش مواضيع خاصه بصيانة العربيه قبل كده بس المره ديه مره مميزه قوي وحبيت أشارك بيها هنا في المنتدى
أولا أنا لما قرأت إن كيا عمله برنامج الرعايه الفائق ببلاش في ملحق السيارات بتاع يوم الجمعه. (امس) .. قلت فل قوي ... إتصلت بيهم وقلتهم عاوز أحجز في البرنامج ده .. الراجل قالي معليشي أصل كل الحجوزات قفلت:eek: ... إزاي يعني .. قالي إنهم حاجزوا للأسبوع اللي فات حوالي 55 عربيه في اليوم وما ينفعشي يحجزوا اكتر من كده .. المهم قلتله انا عايز أعمل صيانة ال 25 ألف .. وقلتله حطني في قائمة الإنتظار بحيث إن ممكن حد يعتذر عن ميعاده .. أروح انا مكانه:)..
برنامج الرعايه الفائق ده معمول لمدة 3 أسابيع .. الإسبوع اللي فات كان في أبو رواش .. الإسبوع ده في القطاميه..الإسبوع اللي جاي في الأسكندريه
المهم حجزت على النهارده الساعه 8 الصبح .. ونزلت من بيتنا على 6:30 وكنت هناك على 8 بالظبط..
لما قربت من التوكيل لقيت الأبواب بتاعة الصيانه الخارجيه مقفوله .. إستغربت جدا .. طب ليه بتوع الكول سنتر قالولي الساعه 8 .. هما بيبعتوني ولا فكرين إن الشعب المصري كلهم توقيته أي كلام ..
انا مش عايز أقول إني لما شوفت كده .. سرحت شويه .. ولقيت نفسي بعدي على بتوع الأمن بره ( الراجل اللي بياخد الأسماء ) ولا عبرته ودخلت عادي لغاية لما وقت قدام الباب المقفول ده .. ولغاية لما وقفت .. كنت مذبهل برده:eek:.. إزاي بتوع الكول سنتر دول قالولي الساعه 8 .. المهم.. لقيت الراجل بتاع الأمن ده فجأه واقف جنبي وبيقولي (What is your name?) .. أنا بصيتله كده ولسه انا في نفس المود .. وقلتله أنا عربي .. مش عارف أنا قلت ليه كده .. يمكن انا كنت عايز أقوله .. انا بتكلم عربي.. قالي مش عارف أصل حاسيت إنك أجنبي.. ماشي ياعم .. فين بقى الأخوه بتوع التوكيل .. قالي بيجوا الساعه 8:30 .. ينهار أبيض .. انا لسه هاقعد نص ساعه مستني..
المهم قعدت في قاعة الإنتظار تحت لغاية الساعه 8:40 .. قلت أطلع أشوف في حد جه .. لقيت مهندسة الإستقبال يتقولي عربية حضرتك ديه... قلتلها نعم... المهم .. خلصت الورق بتعها وشافت اللي موجود في العربيه .. وانا واقف معاها جنب العربيه
لقيت كيا حمراء دخلت التوكيل ... هب لقيت الدكتور أحمد سمير والمهندس خالد ( سبعاوي ) جايين .. د/احمد كان جي علشان صيانة ال 40 ألف.. إيه الصدف السعيده ديه ... ده كده الواحد هيلاقي حد يتكلم معاه بدل ما كنت هاقعد لوحدي
المهم هما خلصوا برده ورق العربيه وكتابة المتعلقات والطلبات ونزلنا كلنا تحت في قاعة الإنتظار
( ملحوظه : دائما لما بروح التوكيل .. ألاقي مهندسة الإستقبال هي اللي بتاخد العربيه بنفسها وبتدخلها جوه الصيانه .. مش عارف ليه حاسس إنها مابتعرفشي تسوق غير البيكانتو )
نزلنا تحت وقعدنا على الكراسي اللي جنب التلفزيون عدل .. سبعاوي اول مره ليه في توكيل كيا .. التربيظه اللي كانت قدمنا .. كانت كلها مجلات سيدات .. ده غير العاده .. لأن باقي التربيظات كان عليها مجلات عربيات .. ( كان واضح إن اللي بيجي التوكيل سيدات بس:) )
الوقت الواحد ماحسش بيه خالص .. فجأه في وسط القاعده .. لقيت مهندسة الإستقبال جايه وبتقولي عايزين نغير تيل الفرامل اللي قدام ... قلت ماشي ... بعديعا بحوالي 5 دقائق .. لقينا مهندس الإستقبال اللي إستلم العربيه من د/أحمد جايله وبيقوله عايزين نغير تيل الفرامل الي قدام برده .. د/احمد قاله ماشي .. المهم إنها صدفه جامده قوي خاصة في موضوع التيل ده:)
على الساعه 12 قلولي العربيه خلصت .. رحت شفت العربيه ودفعة تمن التيل والمصنعيه ( 270 ) جنيه وسلمت على د/ أحمد وم/خالد ومشيت .. ووقت لما مشيت كانت عربية د/ أحمد لسه خارجه من الصيانه
طلعنا أنا ود/احمد وم/خالد على الساعه 11 كده للشو روم اللي فوق علشان نتفرج على البيكانتو الجديده .. انا أول مره أشوفها عن قرب كده .. كانت لونها صفراء .. من الحجات اللي عاجبتني فيها .. الفوانيس اللي قدام واللون السود الكامل بتاع الصالون .. غير كده .. هيه هيه الموديل القديم مع فروق بسيطه زي الأتي :
1: القديم : فيه مساحة تخزين تحت عجلة القياده .... الجديد لأ
2: القديم : عجلة القياده غير متحركه لفوق وتحت ... الجديد : عجلة القياده متحركه
3: القديم : فيه مساحة تخزين صغيره فوق عجلة الأستبن ... الجديد لأ
4: إختلاف اماكن مفاتيح الإنتظار والزجاج الحراري في الجديد عن القديم. وكذلك إختلاف في شكل مفاتيح التكيف
5: عداد الجديد في لون أبيض شبيه بالريو وتقسيمة لمبات البيان مختلفه عن القديم
6: لمبة النور الصغير موجوده في نفس مكان النور الكبير.. ده غير القديم .. وده عاجبني لأن لما النور الصغير ينور .. الإضاءه بتاعته هاتنعكس على خلفية الفنوس الكبير .. الموديل القديم .. النور الصغير بتاعه ليه مكان لوحده .. فلما يشتغل .. تحس إنك مشغل سهاري .. طبعا غير الفوانيس اللي ورا
7: اللون الأسود بتاع الطابلوه والكراسي والأرضيه ( كل حاجه لونها أسود ) .. القديم كان لون الصالون رمادي فاتح مع رمادي غامق ... اللون الأسود الكامل ده .. حلو قوي في العربيه
لقيت برده هناك عربيه بيكانتو عامله حادثه جامده في وش العربيه بس انا قربت منها ودققت النظر جوا الحوض لقيت إن الضرر بس طال الريداتير وماوصلشي للموتور خالص وعاجبتني قوي الحته ديه لأن الموتور جوا العربيه وكمان هيكل الحديد اللي خلف الإكصدام جامد للدرجه اللي تستحمل الصدمات
الشئ الناقص بجد هناك.. إنهم يعملوا ويرلس إنترنت في قاعة الإنتظار علشان اللي معاه اللاب توب .. ممكن يدخل على النت ومايزهأشي من القعده لوحده .. بس بجد الوقت جري بسرعه وماحسيتشي بيه خالص
ده الواحد بعد كده يظبط مواعيد الصيانات مع أي حد هنا معاه كيا في المنتدى :)
ملحوظه هامه جدا : أنا كل مره أطلع من التوكيل ده ومع كل صيانه بعملها .. كنت بلاحظ إن أداء العربيه بيتحسن قوي عن ادائها قبل ماتدخل ... لازم ألاحظ الفرق ده .. بس بعد ما غيرت التيل النهارده... أداء الفرامل إتحسن قوي..
بس كان يوم ظريف جدا جدا جدا ... شكرا للصدفه اللي جامعتني مع الدكتور احمد والمهندس خالد .. وأشوفهم المره اللي جايه في صيانة ال 30 ألف :)