هل من شريك فى مجال الأستيراد ؟
السلام عليكم ...
أنا بعمل مع والدى فى مجال أستيراد الرخام والجرانيت وعندنا المعرض والمخزن الخاص بينا ...
وبصراحة أنا حابب انى اجيب شغل لحسابى ومن غير مساعدة من والدى . فا فكرت أعرض الفكرة عليكم هنا ...
الموضوع ببساطة هو أستيراد كونتينر جرانيت من الهند أو الصين ..
تكلفة البضاعة شاملة مصاريف السفر بتكون حوالى 110 ألف جنيه .
لو البضاعة اتباعت من بره بره زى ما بيقولوا .. متوسط الربح بيكون فى حدود 11000 .. ده بيكون فى خلال شهرين ... لأن بتسافر تفتش على البضاعة بعد 25 بوم من تأكيد الأوردر + 7 أيام للتفتيش والتحميل + 30 يوم شحن + 4 أيام للتخليص الجمركى .
لو أفترضنا ان البضاعة تتباع تجزئة فطبعا الربح هيكون أعلى بس أكيد المدة اللى البضاعة هتتباع فيها هتزيد . وحسب سعر السوق لو اتباعت تجزئة متوسط الربح المتوقع 20000 .
أنا عندى مكان البيع والتخزين و الشركة المصدرة والتخليص الجمركى ... لكن ينقصنى التمويل ..
فا عشان كده فكرت فى شريك .. وأكيد المبلغ اللى هيدفعه لازم يكون ضامن حقه فا هكتبله بيه شيك .. ومفيش مانع أعرفه مكان الشغل عشان يكون مطمئن على فلوسه ..
بعد البضاعة ما تتباع لو هو راضى عن الربح يبقى ممكن نجيب تانى وهكذا ...
يا ريت يا جماعة محدش يفتكر ان الموضوع نصب أو كلام فى الهوا .. انا بدور على حد يشاركنى طموحى مش أكتر وكان ممكن أخد قرض من البنك بس انا مش حابب أبدأ حياتى بالربا عشان ربنا يبارك .
وبس كده .