اقتباس المشاركة الأصلية كتبت بواسطة cannon مشاهدة المشاركة
وعليكم السلام ورحمة الله وبركاته
أنا لسه مستلم برسونا 2011 ولأننا كلنا وقعنا فى نفس الحيره هانقلك تجربتى وعوامل أختيارى واستبعادى للسيارات فى خلال 3 شهور بحثيه

نيسان صنى ======= شكلها كبير بس صالونها مش بنفس الوسع ....شكل الموديل مستهلك لسنوات وانتهى خارج مصر من سنين ... الموتور هوه هوه من 1997 بتغييرات بسيطه ... كان نفسى اشجع المنتج المصرى بس ما استريحتش ليها نفسيا وكمان التقفيل ...... التيدا عجبنى اكتر بس اغلى من الميزانيه

كيا ريو ======= انا بعشق الكيا عموما وبحس انها دايما بتكسب فى مقارنات السعر والامكانيات وكفايه انها ضمان 5 سنين والتوكيل الى حد كبير محترم ... بس العربيه زاد سعرها 5 الاف أول السنه بدون أى فرق امكانيات عن السنه اللى فاتت ....وعملت مقارنه مع البرسونا لحد ما تعبت ... وكمان ان موديل 2012 هيبقى شكل ومحرك مختلف تماما .. ولما جربت الصالون بتاعها محستش بفرق كبير عن صالون ال28 اللى معايا :)

هيونداى الانترا ====== انا مش من محبى الهيونداى بس كان هناك عرض خصم 5 الاف موجود (اللى هما اصلا زودوه اول السنه ) ... المره دى حسيت الصالون واسع أكثر من احتياجى ... الوان العربيه جميله .... والكل بيشكر فيها ....بس لما فكرت ان اجيب اوبشن امان أكتر لقينى محتاج 7 او 10 الاف فوق تمنها .. وكمان الشكل الجديد .... بيبقى احساس مش لذيذ ان انت تجيب عربيه جديده ويتقال عليك الشكل القديم ..قفلت منها

بروتون برسونا ===== امكانيات أكتر فى الامان وطاره وتابلوه فى اللذيذ ...وسع الشنطه تحفه ... وسع الصالون مناسب جدا مش ضيق زى الريو ولا واسع زى الالنترا
اعتمدت فى موضوع سوء التوكيل وقطع الغيار على نقطتين أولا ان قطع غيارها زى الجين 2 اللى بقالها 6 سنين فخلاص انتشرت بره التوكيل , ثانيا ..هذا المنتدى وادين له بالفضل فى اختيارى ..بيعملوا كل حاجه نفسك فيها ..بيوفقوا قطع الغيار المناسبه من الماركات الاخرى ... لو عندك أى مشكله فى العربيه هيقولولك تحلها ازاى وفين وبكام وازاى كمان تتعامل بره وجوه التوكيل ... بصراجه دعم فنى عشره على عشره
وكون بلد المنشأ اسلامى دى كانت حاجه فخر و كويسه بالنسبه لى
وانا أخترت الاوتوماتيك عشان بلدنا محتاجه أوتوماتيك وعشان مثبت السرعه ( اعتقد ده الزياده الوحيده بس )
السعر 89 مانيوال , 95 اوتوماتيك وموديل 2011 زاد 4 الاف عن 2010 ( الاوتو كان 91 )
بس اخدت بيهم حاجات زياده فى الشكل الجديد ومرايات وشبكه وفوانيس وسبويلر خلفى ومثبت سرعه
بصراحه افضل سعر مقابل قيمه على الاطلاق
الالوان اعتقد 5 الوان (احمر ,فضى , اسود,برونزى ... دول اكيد وممكن كمان اخضر شيفون بس مش متأكد )


عذرا للاطاله .. عشان النهارده يوم أجازه وصاحى فايق .. الكيبورد سرحت معايا :)

بالتوفيق فى أختيارك باذن الله
ربنا يبارك لك في العربيه ان شاء الله ويعطيك خيرها ويبعد عنك شرورها
شكرا للمشاركه الجميله والافاده المتميزه
انا بس عايز منك تتأكد من موضوع الاوبشن بس في الفئتين الاوتوماتيك والمانيوال لان ناس كتير
قالوا مثلا الايرباج غير موجود الا في الاوتوماتك
كل سنه وانت طيب