اخيرا سلحت الكاوتش للماروتى
الاخوة الاعزاء
امس بحمد الله تم تسليح كاوتش الماروتى ضد الاخرام و فى اعتقادى الموضوع يستاهل و هتكبر دماغك من بتوع الكاوتش اللى اصبح معظمهم هبيشة و كفاية انك مش هتقف ف الصحراوى او المحور ف عز شمس الصيف او ف البرد و يسلام لو كانت بتمطر كمان هتقعد ترفع و تفك و تغير - المهم ف الموضوع فرد الكاوتش تكون ف حالة جيدة و يفضل تكون جديدة او شبهة جديدة عشان تقدر تستفاد باكبر وقت ممكن و المفروض العمر الافتراضى للمادة هو عمر الاطار نفسة مالم يحدث بة كسر او خبطة و ميهمش اذا كان معمول فيهم كام خابور ميمنعش التسليح انا عملت الكاوتش و العربية عاملة 17900كم يعنى تعتبر جديدة لسة - و اذا حبيت بس تسلح الفرد الامامى بس براحتك لان الحساب بيكون ع الفردة او عدد الفرد اللى عملتها - تكلفة عمل فردة الماروتى مقاس 12\145\70 للفردة 118.80 ج لو عندك ستيكر نايل موتورز تاخد خصم 10% يبقى 108 ج و يضاف على اجمالى الفاتورة 10% ضريبة مبيعات خدمة النتروجين و الترصيص مجانية و معايا ضمان 30000 كم و يتم اخد قراءة العداد الحالية و رقم السيارة و بتاخد فاتورة بذلك - طبعا فى ناس هتقول السعر مناسب :hrm_prv: و ناس تقول ياااااااة دا غالى :I_angr1[1]: بس بحسبة بسيطة جدا لو فرضت على مدى عمر الاطار عملت فيها مثلا 10 خوابير فى 10ج يعنى 100 ج دا غير ارف الفك و التركيب و العطلة فلقيتها مجزية و مناسبة ف السعر لان الفرق 18ج بس و هتكبر دماغك من الكاوتش زى بالظبط موضوع البطارية السائلة و الجافة انت بتحط الجافة و تنساها عكس السائلة عاوزة صيانة و تزويد ميية - النصيحة يفضل اكيد اخذ معاد و الالتزام بية لانك لو رحت و قدامك عربيتين و محدش حاجز بعديهم يعنى على الاقل هتستنى اكتر من ساعتين لما يخلصوا - مواعيد العمل من العاشرة صباحا و حتى السادسة مساء ما عدا الجمعة اجازة
ماذا تم بالتحديد
ذهبت امس للمقر كما هو موصوف تمام و ازيد ع الوصف حاجة كمان للتسهيل - على ناصية الشارع المطلوب دخولة هتلاقى علامتين على كلا النواصى بسهم احمر لدخول الشارع و مكتوب عليهم نيسان و العنوان موجود ف الرابط اللى حطيتة ف اخر الموضوع فى صفحة 7 مشاركة 65 - المهم وصلت ف المعاد المتفق علية مع استاذ محمد يسرى و بدأ الشغل و تابعت الخطوات بداية من تجليخ فرد الكاوتش من الداخل لاعطاء الخشانة الازمة لتثبيت المادة ثم وضعها على الجهاز بعد اخد المقاسات لقطر العجلة و تتم عملية التسليح على خطوتين - الاولى لتسليح جزء من الجوانب اولا مع دوران العجلة و تركها دقيقة بعد سحب جهاز الحقن و الخطوة الثانية نفس الاولى انما يتم توجيهة الجهاز لمنتصف الكاوتش لتسليح بطن العجلة ثم تترك دقيقة تلف و يتم رفعها من الجهاز ثم تركيب الجنط و ملؤها بالنتروجين ثم تبدأ عملية الترصيص ثم ف النهاية التركيب - الاستاذ وليد القائم بالعمل شخصية محترمة و كذلك العامل الموجود و الشغل عالى و نضيف و لو الاستاذ وليد شاف حاجة لسة عاوزة تتعمل بيعملها فورا - و عملت كمان فرد كاوتش الموتوسيكل و كان كمان تمام و زى الفل - الوقت المستغرق تمت ف ساعة ونص للسيارة بداية من عملية فك العجلة حتى اعادة تركيبها و تقريبا 50 دقيقة لفرد الموتوسيكل
حاليا فى مرحلة الاختبار على سرعة 100 لم الحظ شئ متغير حصل و متابع
اود اولا شكر الاستاذ محمد يسرى مدير المبيعات و التسويق لانهاء موضوعى - كما اشكر جزيل الشكر ايضا الاستاذ الفاضل كريم منير لتسهيل الموضوع مع الاستاذ محمد وعمل خصم 10% لحاملى استيكرات نايل موتورز
رابط الموضوع الاساسى للموضوع : http://www.nilemotors.net/Nile/257880-a.html
و اقرا كل الاستفسارات و ردها من قبل الاستاذ محمد يسرى مدير المبيعات الذى متابع الموقع و يقوم بالرد على اى استفسار و كفاية ان الاخ الفاضل كريم منير قام بعمل التسليح و تجربة سيارتة على سرعة 180كم و لم يلحظ اى تغير او اختلاف حدث