السلام عليكم وكل عام وانتم بخير
انا اشتريت النترا 2012 اول فئة اوتوماتيك من شهرين وعملت بيها 4000 كم وكنت حابب اكتب
رأيى فيها بكل أمانة وحيادية علشان اللى عاوز يشتريها أو يستفسر عنها
- المميزات :-
زى ما حضراتكم عارفين ان اللوك او شكل العربية جامد وانسيابى وخطوط التصميم فيها
بديعة ورائعة وان كنت شخصيا بعيب على المصمم المبالغة فى طول فوانيس الاضاءة الامامية
والخلفية لان لو لا قدر الله العربية لو اتخبطت خبطة خفيفة من قدام او من ورا هتكون تكلفة الاصلاح مشكلة
العربية واسعة من جوه وتتميز بمقصورة قيادة جميلة ورائعة وتابلوه تحفة والقعدة على كرسى القيادة
مريحة يعنى لو هتفضل سايق يوم كامل مش هتتب
موتور 130 حصان مخلى العربية متأهبة لجميع الاحتمالات ومخليها زى الطوربيد يعنى تحس وانت سايقها انك راكب اف 16
تكييف قوى وممتاز بس برضه بيأثر على سحب العربية بشكل غريب مع ان الموتور قوى
العربية اقتصادية جدا فى البنزين لما تخليها على وضع الايكونومى بس فى نفس الوقت بتتخنق
نعومة منقطعة النظير وعزل كويس وعدة صوت كاسيت وسماعات تحفة

العيوب :-
العفشة الخلفية مش قد كده لانها تقريبا تورشن بيم نفس عفشة السيراتو على ما اعتقد يعنى وانت سايق بتحس بتنطيط خفيف من ورا
الثبات بعد 160 كم /س يخوف بحس ان العربية بتلعب منى لما بوصل للمعدل ده
الفرامل من غير اى بى اس فى الالنترا الجديدة زى الزفت .. العربية فى المفاجىء بتزحف بطريقة تخوف ونصيحتى انك لما تيجى تفرمل يبقى على الهادى .. واحدة واحدة
الكاوتش .. ااااااه من الكاوتش .. كومهو عريض بيسف زلط بطريقة غريبة يعنى تسمع احلى طرقعة وانت ماشى علاوة على صوت احتكاك الكاوتش اصلا وانت سايق ازعااااااااااااج

مش عارف انا كده قدرت افيد حضراتكم ولا ايه .. تحياتى وكل عام وانتم بخير