الموضوع: مش عايز حد يستغرب

واضح ان كل الناس بتتكلم عن إيجابيات و ده كويس بس ما ننساش شوية سلبيات من وجهة نظري

1- الفلوانس و هي بديلة الميجان سيدان صناعة تركي ( لو غلط حد يصححلي المعلومة ) و ده السبب في ان سعر اعادة البيع سيء لأن عن تجربة في ميجان 2006 مستعملة مشاكلها الألكترونية كتير بسبب التقفيل التركي لأنها مليانة كماليات ألكترونية عمرها الأفتراضي !؟؟ يعني العربية كانت بتهنج معايا !!

2- اللانسر الشارك عربية تحفة و ثبات ممتاز و من وجهة نظري مناسبة لشوارعنا و جودة خامات عالية و كنت أرشحهالك لكن عرفت معلومة أن فتيسها الأتوماتيك cvt ( حد يصححلي المعلومة ) و ده بيدي أداء تحفة لكن وجدت علي النت ناس كتير بتشكي منه سواء في أوروبا أو السعودية و علي عربيات أكبر زي نيسان المورانو و الألتيما و واحد معاه شارك في المنتدي كان وضع ملاحظة أنه أثناء القيادة بسرعة عالية لفترة كمبيوتر العربية أظهرله علامة حرارة عالية مما أضطره للتوقف و أعادة الأنطلاق بعد دقائق ( دي مشكلة الcvt ) و ده كان نفس العيب اللي أشتكي منه الأخوة الأوروبيين و السعوديين بخلاف شوية مشاكل ميكانيكية بالفتيس تظهر بعد فترة

3- الجين تو عربية جميلة جدا للجري و الثبات كنت ناوي عليها زمان بس وقفني قلة جودة خامات صالون العربية و تصميم الصالون الجميل شكلا فقط و من الملاحظات ضيق المساحة المخصصة للأرجل في الأمام الكونسول بتاع الفتيس رفيع بس تحته البومبيه واخد من مكان الرجل و معمول بموكيت الأرضية فمش باين بس ضايقني لما جربت أسوقها

4 - الفيلوستر عربية شكلها تحفة و المنتديات الأوروبية بتشيد بها و بنوعية خاماتها و جودتها و فكرة الباب التالت جديدة و عملية العربية بس لسة جديدة مانتشرتش و معرفش أخبار عمر عفشتها أيه و أعتقد الحاجة الوحيدة اللي ممكن تضايقك فيها أن الكاوتش بتاعها لو بروفيل اللي بالتاكيد و عن تجربة في الجيتا لا يتفق مع الطرق المصرية

5 - أرشحلك المازدا 3 عربية ياباني تتقارن بالجيتا في الثبات و جودة خامات عالية و معمرة و مشاكلها شبة منعدمة و ده عن تجربة مازدا 3 2008 مع صاحبي من الزيرو و عامل بها أتر من 100 ألف
و عن تجربة فعلية في الثبات علي الصحراوي و علي متوسط سرعة 180 ل 200 ثبات جاااامد و الجين تو كانت بتحاول تجيبنا لحد سرعة معينة و الملفات تجبره يهدي هو و النترا 2009 و كان صاحبي بيهدي بس عشان يتسلي معاهم علي الطريق
ثبات المازدا 3 زي ثبات الجيتا و عن تجربة طبعا الجيتا 2008 برضه بتاعة أخويا و العربيات دي متتقارنش غير بالأعلي منها

6 - و عنك كمان العربية السوبارو أمبريزا عربية تحفة برضه

أو يا ريت تشوف رأي الزميل اللي أقترح عربية أوروبي مستعملة زي الجيتا أعلي فئة ممكن تكون في حدود ال140 ألف جنيه بس ماتجيبش الموديل من 2010 الفتيس ال7 نقلات لأن فيه مشاكل خليك في الفتيس ال6 نقلات لحد موديل 2009 تقريبا
أو بي أم دبليو 2005 الفئة التالتة عربية طبعا مفيش كلام و برضه في حدود ال 150 ألف أو أكتر شوية بسيطة

المشاركة الأصلية كتبت بواسطة hossam99

علي الترتيب من حيث الأوبشن و المستقبل و أسعار قطع الغيار و قوة الموتور و خلافه
فيلوستر
لانسر ex
فلوينس
جين تو

للعلم جميع موديلات هيونداي معمره بصورة لا يتوقعها أحد و لن يشعر بها إلا من أقتناها و في موضوع في قسم هيونداي لأعضاء تعدت عربياتهم حاجز 250 ألف كيلومتر بدون ظهور مشله واحده و الأعضاء بيمتلكو فيرنا
و 250 ألف كيلومتر لو تم توزيعهم توزيع عادل علي السنين هايعملو أكثر من 10 سنوات (10 سنوات بدون مشكله و قطع غيار متوفره )
و في أقل فئه من فئات هيونداي

معلش ياباشا مع احترامى لكلام حضرتك

انا كل يوم لازم اشوفلى كام عربية هيونداى عطلانة

واقسم بالله انا شوفت ثلاث سيارات فيرنا واقفين عطلانين وكل واحدة المسافة بينهم لاتقل عن 200 متر , وسيارة النترا عطلانة على الدائرى موديل 2006 وطبعا نصيب الالنترا الشيب 2007-2011 موجود بقدر كافى انزل الحرفيين وانت تشوف بنفسك, حضرتك لو دورت شوية هتلاقى مشاكل الكورى لا حصر لها وسيارة هيونداى اكسنت اتباعت فور شرائها بستة اشهر فقط لانها ورق بمعنى الكلمة وسيارة سيئة للغاية واللى باعها موجود فى المنتدى وركب هوندا موديل 90 وبيقول احسن منها 100 مرة تخيل فرق السنين والكلام اللى بيتقال

فمعلش الكورى شكل ليس اكثر وسيارة تقدر تقول عليها بعد فترة الضمان ماتسألش عن حاجة