مش عايز حد يستغرب

**Ahmed Selim** · 01-09-2011 09:23 AM

طيب أنت دلوقتى أهتمامك الأساسى بعربية ثابتة و فراملها حلوة و شكلها شيك.

و مش فارق معاك تشترى مستعمل و لا جديد

و ممكن تصرف على العربية اللى أنت هتشتريها شوية مصاريف زيادة علشان تزود حاجات أنت عاوزها تكون مش موجودة.

لو الكلام ده صح يبقى أنت قدامك حلين
1- تشترى بى أم أو ألفا روميو ( على سبيل المثال) مستعمل و تعيش مع الزيادات اللى أنت عاوزها.
2- تشترى زيرو.

أنت عاوز تمشى فى أى حل فيهم علشان نعرف نتكلم ؟

لو هتمشى مع الزيرو هرشحلك الأتى.
1- فليوانس
2- أمبريزا
3- أوبل أسترا
4- ميجان 3

و دول مش بالترتيب......كل منهم ليها مميزات و عيوب.

شوف بس أى حل أنت حابب تمشى فيه أكتر و نتكلم عليه.

**Ahmed Selim** · 02-09-2011 10:45 AM

المشاركة الأصلية كتبت بواسطة fsbosy

شوف يا باشا انا عايز اشتري زيرو واحترم جميع السيارات المذكورة وخاصة الاسترا ولكن برضه هل الفئه السعرية هتديني حاجة مهمة جدا في العربية مش ممكن الاقيها في الاقل سعر يعني مثلا لو قلت استرا وهي تقريبا ب180000 تستاهل فرق ال 25000 عن الفيلوستر مثلا بمعني هل يوجد فرق اداء يساوي الفلوس دي او مثلا فرق ال40000 عن الشارك هل ده يساوي ولا انا بدفع الفرق ده عشان بلد المنشا فقط دون ادني امكانيات جوهرية عن نظيرتها من اصحاب بلد منشا كوري او ياباني. وليه مش الجين تو اللي هي نصف تمنها تقريبا وكلهم عمليا نفس الاداء تقريبا ولو فرق هيكون فرق لا يساوي السعر!!!!!وملحوظة لحضرتك انا مش عندي وجهة نظر وعايز توافقني عليها بس انا بفكر معاك ومع الاخوة في المنتدي بصوت عالي .انا عايز يكون كلامنا علي العربيات بكفاءة العربية الفعلية بغض النظر عن اسمها وبلدها المهم هل هي عربية كويسة ولا لأ.

بص يا زعيم

فرق السعر بيقابله فرق فى العربية......سواء فى جودة خامات أو تقفيل أو موتور أو فتيس أو كماليات أو ثبات أو مواصفات أمان أو أنظمة مساعدة زى ال abs , ebd الخ

يعنى هديك مثال على الميجان و الأوكتافيا a4 مثلاً
الميجان كماليات أعلى و شكل أحلى و تقفيل ممتاز و ثبات جيد جداً و تسارع أعلى من الأوكتافيا
الأوكتافيا كماليات أقل و شكل أقل و تقفيل ممتاز و ثبات ممتاز
و سعرهم ساعة لما كانوا زيرو كان متقارب جداً

لو جيت قارنت الميجان بالأوكتافيا ال a5 يبقى
الميجان نفس الكلام اللى فات
الأوكتافيا ال a5 كماليات أقل حاجة بسيطة ( زى عدد الأيرباجز على ما أذكر كان أقل من الميجان ) و شكل كويس و تقفيل ممتاز و ثبات ممتاز.

يعنى الفرق بين ال a4 و a5 فى الشكل و الكماليات.....و الفرق فى الفلوس بينهم كان حوالى 35 ألف جم
هل الفرق فى المواصفات يساوى الفرق فى الفلوس ؟
دى حاجة ترجعلك 100%............

بلد المنشأ على سبيل المثال جايز متفرقش معاك كتير بس هى تفرق فى السعر نظراً لإختلاف سعر الأيد العاملة من بلد لأخرى......و هو ليس بالضرورة هيفرق فى جودة العربية ككل....و إن كان فى معظم الأحوال بيفرق.

و خللى بالك أنك و أنت بتشترى بيبقى فيه جزء من سعر العربية عبارة عن قيمة العلامة التجارية اللى أنت بتشتريها.