الموضوع: فكره مفيده جدا لكل الاعضاء في قسم المقارنات.. واناهبدأ بنفسي في عرض خدماتي

كل يوم عضو من الاعضاء يعمل موضوع في قسم المقارنات تنصحوني بهيونداي النترا ولا فانتازيا ولا كيا كارينز هاي لاين.؟؟؟
rb ولا نيسان صني ولا بروتون برسونا؟؟
كورولا ولا سيفيك؟؟؟

وطبعا ليه حق يحتار لان الاسعار متقاربه واكيد كل واحد فينا نفسو يشتري افضل عربيه بافضل اداء بالفلوس المتاحه معاه"وخاصة اللي هايشتري قسط بيبقى في حيره اكتر لانه اتحكم عليه يستحمل العربيه اللي هيختارها لمده لا تقل عن 3 سنوات ...

وطبعا للاسف بعض الاعضاء بينحاز لعربيته ومايرضاش يقول على عيوبها ويفضل يشكر فيها وييجي صاحبنا الغلبان اللي هيشتري قسط يتدبس في العربيه بسبب صاحبنا اللي متعصب لعربيته ولو قولتله عربيتك فيها عيب يبقى كأنك شتمته بالاب والام....المفروض يبقى في امانه في الرد على الحيران اللي هيشتري عربيه هيدفع فيها دم قلبه

الاقتراح باختصار::
1-عمل لجنه من فردين على الاقل من اعضاء المنتدى المتميزين اللي فاهمين كويس قوي في العربيات ويقدرو يقولو رأيهم بصراحه بدون مجاملات زي المنتديات الاجنبيه لما بتدي تقرير عن العربيات."نايل موتورز المصري مش اقل منهم"

2- كل عضو معاه عربيه يتبرع بانه يحضر يوم عمل الاختبار للمقارنه بين عربيته والعربيه المماثله "مثلا يوم الالنترا مع الفانتازيا يبقى العضوين يحضرو بعربياتهم مكان الاختبار ويكون مناسب للاتنين "الاتوستراد -الدائري-...مثلا"

3-الاختبار يتم مره واحده "مش كل واحد عايز يشتري عربيه يطلب من العضو صاحب العربيه انه يجربها" طبعا لو كدا هتبقى صعبه على صاحب العربيه.
4-الاختبار لا يتعدى ساعه واحده ويكون يوم جمعه عشان اجازات الناس ومحدش يتعطل.

5- لازم العربيتين اللي هيتعمل بينهم مقارنه يتواجدو في نفس اليوم حتى يسهل على اللجنه الحكم على العربيتين في نفس ظروف القياده.

6-مطلوب من الاعضاء التفاعل وكل واحد يرشح من يقبل رأيه من الاعضاء ليكونو من اعضاء اللجنه.
7- الموضوع دا يبقى هو المرجع للجنه لاختيار السيارات اللي هيتعمل بينها المقارنه."الاعضاء المستعدين يردو بنوع عربيتهم والفئه بتاعتها وسعرها كان كام.
8- بعد الاختبار تقوم اللجنه بكتابة رأيها في كل عربيه في تقرير منفصل في موضوع مثبت في قسم المقارنات عنوانه مثلا " النترا2012 ولا فانتازيا 2011" .
-المقارنه تكون من حيث الاداء والاتساع الداخلي والراحه والكماليات والرأي النهائي "الناس تختار مين"
بالنسبة لي : مستعد بعربيتي :اكسنت RB 2011 highline
كانت ب 106250الف جنيه
للمقارنه بينها وبين Persona elegance2011

وارشح : [مع الاحتفاظ بالالقاب طبعا]
- كريم منير
- yoko
ahmed t.v-
-محمد ممدوح
-سبعاوي.
-sharky
-yasser منسق الكيا
-MB head


الختام: المنتدى بتاعنا ممتاز وفيه ناس كتير جدعان ويتمنو يخدمو اخواتهم ولكن محتاجين تنظيم للمجهود المطلوب عشان تعم الفائده وخاصة على المقبلين على شراء سياره جديد"
وليكن الحافز لينا حديث الرسول صلى الله عليه وسلم
"من كان في حاجة اخيه كان الله في حاجته"
"لان امشي في حاجة اخي خير من ان اعتكف في مسجدي هذا شهرا"
فياريت كل واحد يقول انه مستعد بعربيته وسعرها كان كام