الموضوع: الى السادة ملاك اللانسر الكويتى

السلام عليكم

انا فى الاول احب اشكر جميع الاخوة اللى فى المنتدى ده لانى من خلالهم اتعلمت حاجات كتير جدا

ثانيا:

انا ناوى ا شاء الله اجيب لانسر كويتى اوتوماتك 1600 بس انا بخاف من موضوع عدم الضمان هل هو ضرورى ولا النوع ده من العربيات بيبقى كويس ومضمون ؟
وهل ممكن ادخلها صيانه فى اى مركز خدمه معتمد هنا والحساب هيفرق ولا زى العربيات الضمان المحلى؟

ايه هى مواصفات العربيه دى وايه اهم حاجه ابص عليها لما استلمها وربنا يستر علينا من ضلال التجار؟

هل فعلا ضرورى موضوع البنزين 95 ولا ممكن 92؟

من الاخر العربيه دى تستاهل اللى هيدفع فيها ولا لا؟

وشكرا .............

المهندس طارق

انا اولا بشكر حضرتك جدا على ردك وانا بجد سعيد جدا وفخور ان حضرتك اول واحد رديت عليا

انا على فكرة انا مع حضرتك فى الكلام ده علشان كده انا بسال بس المشكله ان فى فعلا فرق ما بين المصرى والخليجى وده بالذات فى ال 1600 و الكلاسيك بصراحه معرفش فى ال 1300 حيكون كام

وانا فعلا فكرت فى ال 1300 مصرى بس انا خايف من ال 1300 وخصوصا انا نفسى فيها اوتوماتك واهو بالمره علشان موضوع البنزين ده

ولا ايه راى حضرتك اكبر دماغى واجيب 1300 مانيوال مصرى؟ هل ال 1300 المانيوال مش قد كده انا مش من النوع اللى بيحب الجرى كتير بس انا عايز اسافر بيها الصعيد فهل مع تشغيل التكيف هتبقى فعلا سحبها ضعيف ولا ايه راى حضرتك؟

المشاركة الأصلية كتبت بواسطة limo

العربيه الكوبيتى1600 تقدر تميزها عن المصري والاردنى بالفوانيس الشفافه الخلفيه واريال السقف +مثلث الانتظار +شنطه الاسعافات الاوليه +اذا كان فرش العربيه بيج الابانوس بيكون عسلى .
-انا معايا كوبيتى 1600 وبحط ليها بنزين 92 عادى وشغاله كويس جدا بالرغم من وجود توصيه على التانك باستخدام 95
بس نصيحه اول ما تجيب العربيه حط ليها 92 علطول متحطش مره 95 ومره 92 علشان العربيه متسقفش .
-الضمان فى الخليجى
فى عربيات بتدى ضمان تبع مركز خدمه متعاقده معاها او بيكون تبعها
فى عربيات الرواس بيدى ضمان 3 سنوات بس عربيات الكلاسيك 1600 مفيهاش كاسيت وسعرها اعلى من بره بحاجه بسيطه
وفى عربيات منغير ضمان خالص
-ان شاء الله مش هتحتاج الضمان بس حاول تأخذ عربيه فيها ضمان علشان الواحد مش ضامن الى ممكن يحصل.

-على فكره العربيات الخليجى الكلاسيك1600 كلها مفيهاش abs ومنغير عتب بس فيها كاسيت والطاره والفتيس والهاند بريك عادى مش جلد طبيعى
المصرى فيها abs ومفيهاش كاسيت والطاره والفتيس والهاند بريك جلد طبيعى
انا رأى طلما الفرق بين العربين وصل 4 الاف جنيه يبقى تأخذ المصرى على الاقى فيها ضمان الوكيل +abs +عتب
ممكن تاخذ عربيه هاف سبورت خليجى كويتى زى ما انا عملت ارخص من المصريه الكلاسيك بحوالى الف جنيه فيها جنوط سبور +عتب +اكر نيكل جوه وبره +فوج لايت +2 اير باج +دواسات بنزين وفرامل سبورت +فرامل abs +كاسيت

انا رأى انك تجيب ال1600 طلما انك بتسافر بالعربيه كثير
كمان اشد من ال1300 بكثير

شكرا Limo باشا على ردك والله انا محتار خايف اتكل على الله واشتريها ولو فيها حاجه طبعا انا اللى هتدبس فيها والمصرى اسعاره عاليه وتقريبا الفرق هيزيد عن 5 الاف جنيه بجد الواحد محتار متعرفش حد جاب ال 1600 كلاسيك خليجى اوتوماتك وعامله معاه ايه؟

المشاركة الأصلية كتبت بواسطة مصراوي جدا

استاذ m_bander اهلا بيك معانا في المنتدى

انا طبعا هاسيب الأخوة في المنتدى اللي عندهم لانسر خليجي يقولوا لك نصايحهم انما عايز اقول حاجه واحدة بس

المفروض ان الناس بتلجأ للخليجي بدون ضمان (حيث ان هناك خليجي بضمان سواء الرواس أو غيره) لأن فيه فرق سعر مش قليل بين المصري والخليجي

انما استغربت جدا لما لقيت اخ لينا في المنتدى اشترى لانسر 1600 سوبر اكشن خليجي بدون ضمان بـ 120 ألف في حين ان المصري سوبر اكشن بـ 123 ألف وتزيد على الخليجي ضمان 3 سنوات أو 100 ألف كيلو

في رأيي الشخصي الفرق كده ميستاهلش ابدا التخلي عن الضمان اما لو كان الفرق 5000 فأكثر يبقى يستاهل

طيب يابشمهندس

مع كل إحترامي وتقديري لحضرتك، حضرتك ماذكرتش الفرق فى عدد الأحصنة فى العربية + إن السيارة الخليجي فيها مميزات أكتر من الوكيل زي التكييف بتاع الخليجي أحسن + مثلث الإنتظار والطفاية المثبتة تحت الكرسى الأماى جانب السائق وشنطة العدة والإسعافات، وتقفيل العربية من الداخل فى البودي.

المشاركة الأصلية كتبت بواسطة emadfk

اخى العزيز

سوف انضحك نصيحة اخوية وهى اذا كان معاك ثمن ال 1600 الاوتوماتيك فهى لا تقارن بال 1300 وخاصة فى حالة السفر و بالنسبة للبنزين طالما بتمشى على مهلك زى حالاتى فسوف يكون استهلاك البنزين معقول جدا وخاصة ان اغلب طريقك سفر طوالى

اما بخصوص المصرى و الخليجى فانا ارشح لك المصرى و خاصة بالنسبة لنوع البنزين وهو 92 فى المصرى و 95 فى الخليجى وشوف الفرق كام بقه فى السعر

ثانيا الضمان يساوى اكثر من 5000 جنيه فى راى

وشكرا

الاخ / عماد

شكرا على ردك وكلامك طبعا صح بس انت عارف اللى بيشترى عربيه فى الزمن ده بيبقى بيجمع كل قرش وبرضه ال 5 الاف جنيه يفرقو