المشاركة الأصلية كتبت بواسطة tutankhamoun
خلاصة رأيي الموضوعي (طبعا رأي شخصي بحت )
أن مفيش حاجة ممتازة على الأطلاق و مفيش حاجة وحشة على الأطلاق .
و مفيش حد بيفضل في المقدمة على الأطلاق و مفيش حد بيفضل في المؤخرة على الأطلاق
و الصغير بيكبر ...... و بينضج و بيصل لمرحلة الشباب و بيكون شاطر لو يفضل في مرحلة الشباب و النضوج لفترة كبيرة بالتطوير المستمر و البحث الدائم عن الأفضل .
يعني مفيش حاجة أسمها شركة بقالها 100 سنة و شركة تانية بقالها 50 سنة يبقى الشركة أم 100 أحسن و خلاص علشان هي قديمة
الناس اللي بتفهم في التكنولوجيا و المحركات
أكتشاف طريقة تصنيع الشئ هي أصعب مرحلة ..... و لكن تصنيعة هي أسهل مرحلة .
و بمجرد وصولك لمعرفة طريقة تصنيع الشئ و تطويرها دائما .... خلاص معرفتك أصبحت مثل معرفة صاحب الخبرة القديم لأنك انت كمان أصبحت صاحب خبرة .
و الأمثلة كتيرة ........ و هوندا هي أقوى مثال على ذلك و كمان لوتس الأنجليزية .
اللي بيفرق بقى شوية حاجات تانية زي خامات التصنيع المستخدمة .... الأسم التجاري الرنان ( ده عليه 50 % من عملية أقناع الزبون أو العميل ) و الشكل و توافر قطع الغيار و جودة و كفاءة الوكيل المحلي و مراكز الخدمة .
يعني مثلا بي أم دبليو بتستخدم خامات ذات جودة عالية و بتستهدف أيضا زبون مختلف تماما و بتصنع في فئة معينة و بالمثل مرسيدس و أودي إلى حد ما بعكس فولكس فاجن اللي بتحاول تعمل كدا و كدا .
نيجي بقى لكل المقصد و هو التعميم
الناس مقسمة العالم أوروبي (وواضيعنه في سلة واحدة و ده مش صحيح لأن مش كل الأوروبي جودته زي بعضه )
و ماسكين الكوري في سلة واحدة و ده مش صحيح و لكن مش خطأ كبير لأن الكوري بيستهدف فئة معينة و هي فئة السيارات الأقتصادية زيهم زي فيات الأوروبية و بيجو إلى حد ما و سيتروين الفرنسيتين .
يبقى مينفعش نقول الاوروبي ........ لأن فيه فيات بونتو أوروبي و فيه مرسيدس و فيه بي أم و فيه لوتس أوروبي برضه .
يبقى كل حاجة تأخد حجمها الطبيعي و تتقارن شئ بشئ ....... أو مُنتج بمُنتج و ليس بلد أمام بلد .
عندنا الياباني فيه الياريس و السيريون ....... و فيه النيسان جي تي أر و عندنا الصني و عندنا الهوندا ....
و عندنا اللكسس الفخمة
و على فكرة ....... بكرة الصبح ممكن شركة النصر اللي يرحمها
تجيب أفضل خامات في العالم ....... و أفضل تصميم في العالم و تصنع العربية و تضع عليها علامة نصر ..... و لا حد هايشتريها و لا حد هايعبرها و هايقولوه ما تستهلش ثمنها (و ده علشان ملهاش أسم تجاري رنان )
و لكن لو نفس العربية بنفس التصميم و نفس الخامات ..... ووضعت عليها علامة مرسيدس أو علامة بي أم دبليو ....هاتتباع و حدش هايقولك دي ما تستهلش ثمنها .
فكل شئ له عوامل كتير بتحدد ثمنه و تحدد أمكانية بيه و لمين .
و مش معنى ان مرسيدس بتتباع بربع مليون جنيه يبقى تستاهل كل مليم مدفوع فيها ..... بل على العكس أحنا بندفع جزء من ثمن السيارات الفارهة في أسمها فقط و ده مقصود من الشركة الصانعة علشان تعمل تممييز لعملائها .
أرجوا أن وجهة نظري تكون وصلت