الموضوع: اللي عايز تقسيط غير ربوي يروح المعرض ده( خلاصه الكلام)

المشاركة الأصلية كتبت بواسطة rabbat5

يعني الفايدة لما تكون ثابتة مش حرام؟ طيب و فوايد البنوك ما هي ثابتة تبقى مش حرام؟ يا ليت توضح .

"وأحل الله البيع وحرم الربا"
الفرق بين الربا والبيع فرق صغير وواضح جدا وتخلى بالك منه
البيع مكسب البائع بيعود لعملية البيع
الربا مكسب المرابي بيعود للفلوس اللى هوا مسلفها
------------------
بمعنى ايه:
العربية تمنها 20 ألف
البيع:
لو قلتلك هبعلك العربية دي ب 50 ألف وهيا أصلا تمنها 20 ألف وانت عارف وموافق ، بقى بيع مش ربا، لأن العربيه ليها سعر واحد اتفقنا عليه اللي هوا 50
ملناش دعوة بالسعر الأصلي أنا حر مزود الربح بتاعي ومغشتكش السوق كله بيبيع ب20 وانا ب 50 وانت عارف
و لأن مكسبي جاي من بيع العربية
بعد كده نتفق على طريقة السداد اللي تعجبنا مع مراعاة شروط كل طريقة
بس تمن العربية كااااااااااام ؟؟؟؟
50 ألف
لا 20 ألأف ولا غيرها
يعني احنا متفقين ان تمنها 50 وهنكتب فى العقد 50 وهنقسط ال 50 ولو اتأخرت فى الدفع هتدفع 50 ولو دفعت بدري هتدفع برضه 50
------------------------------
طيب لو جينا نشتغل بالربا "أعاذنا الله من ذلك نحن وجميع المسلمين"
نعمل ايه
منعملش حاجة
"المفروض منشتغلش ربا لأنه حرام"
بس الناس اللي بتشتغل ربا بتعمل ايه؟؟؟؟؟
ربنا يهديهم
بص ياسيدي
يقولك تمن العربية الأصلي 20 ، انا هاخد فى كل 8% كل سنه وانت وحسب دفعك للفلوس، دفعت بدري هتدفع أقل، اتأخرت هتزيد الفلوس عليك
نقوم نكتب فى العقد تمن العربية 20 ألف + فايدة 8 % حسب سرعة سدادك
يعني المبلغ الكلي هيتغير حسب سرعة سدادك
------------------------------------
يعني البيع: المبلغ الكلي اللي اتفقنا عليه 50 عمره ما هيتغير حتى لو اتأخرت 20 سنة يعني البنك الاسلامي مكسبه ثابت نتيجة عملية البيع وانتهى، عمر ما مكسبه من العملية دي هيتغير حسب سدادك للفلوس
لكن الربا : المبلغ الكلي مكتوب فى العقد أنه بيتغير حسب سرعة السداد لأن هوا مربوط بفايدة سنوية مش محدد
يعني بالبلدي مكسب البنك الربوي بيتوقف على حجم الفلوس اللي انت مستلفها مع الوقت، بعيدا عن البيع والشراء
----------------------------------------
هتقولي طيب البنوك الاسلامية ايه الفرق بينها وبين البنوك الربوية؟
أقولك كذا فرق فى البنك الاسلامي
1- بتقعد تتكلم معاه الأول لحد ما تتفقو على عدد سنين التسديد "قبل كتابة العقد" يقوم بناء عليه يحسبلك تمن العربية "بنفس الطريقة بتاعة البنوك العادية صحيح بس دي حسابات داخليه عنده انت ملكش دعوة بيها ومبتتكتبش فى العقد"
2- يقولك سعر العربية النهائي اللي هيتكتب فى العقد وميتكتبش غيره وبيتكتب طريقة السداد
3- بيلتزم بشروط البيع بالتقسيط الاسلامية "لأن البيع بالتقسيط فى الاسلام ليه شروط" ودي نقطه ساعات بيحصل فيها غلطات وهوا دا الموضوع اللي احنا بناقشه بقالنا 22 صفحة
4- بيلتزم بشروط البيع العامة الاسلامية "لأن البيع عامة فى الاسلام ليه شروط برضه لأي عملية بيع"
5- لو اتأخرت مبيزودش تمن العربية "بس ساعات بيدفعك تمن المحامي اللي هيرفع عليك قضية ودي فيها اختلاف" ، ولو دفعت بدري مبيقلش التمن "ساعات بيديك هدية منه كام ألف فى نهاية التقسيط لو كنت دافع بدري بس دي منه هدية، مش مكتوبة فى العقد، ومش من حقك تطالب بيها -هوا بس بيشجعك علشان تدفع بدري وعلشان ينافس البنوك الربوية ودي مفيهاش حاجة "
الاختلافات دي خطيرة جدا وبتأثر فى اقتصاديات دول
وغير كده هوا ده شرع ربنا
واحنا لازم نسمع أوامره
"فإن لم تفعلو فأذنو بحرب من الله ورسوله"
-----------------------------------------
الصورة النهائية بين البنك الاسلامي والربوي ممكن تكون متشابهه : بتدفع نفس المبلغ فى نفس المدة الزمنية واجراءات معقدة فى البنك الاسلامي ،لكن التفصيلات مختلفة حسب ما ربنا قالنا عليها، ولو اتأخرت عن الدفع بيظهر الفرق الكبير
------------------------------------------
خلي بالك كويس:
التقسيط نوع من انواع السلف
و الاسلام مفيهوش حاجة اسمها السلف بيجيب فلوس، السلف مش بيجيب مكسب
السلف فى الاسلام حاجة لله ، لو اللي قدامك اتأخر لازم تمهله وتعذره طالما مش بيماطل
الاقراض أجره الحسنة بـ 18 ضعف مش 10 أضعاف زي الحسنات العادية لأنك بتفك كرب مسلم
يعني البنك لو عاوز يكسب ويقسط فى نفس الوقت لازم يحسب الحسبة الأول ويحط مكسبه ويطلع المبلغ النهائي
وبعدين المبلغ النهائي يقسطه من غير ما يزود عليه حاجة بسبب التقسيط وبسبب الوقت
والحلال دايما أصعب من الحرام
"أحسب الناس أن يتركو أن يقولو آمننا وهم لا يفتنون"

ربنا بيختبرنا علشان يشوف مين المسلم بجد ومين الفالصو

ربنا يثبتنا جميعا
"ومن يتق الله يكفر عنه سيئاته ويعظم له أجرا"
محمد

المشاركة الأصلية كتبت بواسطة msami2k

و الاسلام مفيهوش حاجة اسمها السلف بيجيب فلوس، السلف مش بيجيب مكسب
السلف فى الاسلام حاجة لله ، لو اللي قدامك اتأخر لازم تمهله وتعذره طالما مش بيماطل
الاقراض أجره الحسنة بـ 18 ضعف مش 10 أضعاف زي الحسنات العادية لأنك بتفك كرب مسلم

طيب دة السلف , ولكن اللى بيستلف عشان يعمل مشروع و يكسب منة دة تسامية اية , سلف برضو , يعنى مثلا رجل اعمال حيستلف من البنك 10 مليون جنية سلف , عشان يفك كربة مثلا , مهو اكيد لازم يكون فى نظام للاقراض يكون فية ارباح لان الفلوس دى حتستغل فى مشروعات مش كام جنية لفك ضيقة , و فى الحالة دى لو استلفت من حد مال و قومت بتشغيلة و رجعتة لة بعد كدة زى ماهوة يبقى انت كدة ظلمت صاحب المال ,ولا اية .

المشاركة الأصلية كتبت بواسطة wawoo

طيب دة السلف , ولكن اللى بيستلف عشان يعمل مشروع و يكسب منة دة تسامية اية , سلف برضو , يعنى مثلا رجل اعمال حيستلف من البنك 10 مليون جنية سلف , عشان يفك كربة مثلا , مهو اكيد لازم يكون فى نظام للاقراض يكون فية ارباح لان الفلوس دى حتستغل فى مشروعات مش كام جنية لفك ضيقة , و فى الحالة دى لو استلفت من حد مال و قومت بتشغيلة و رجعتة لة بعد كدة زى ماهوة يبقى انت كدة ظلمت صاحب المال ,ولا اية .

الاقتراض فى الاسلام مشروع للضرورة
لما تكون مزنوق ومش لاقي تاكل تستلف علشان تفتح دكانه تأكل منها عيالك
ساعتها يجوز لك الاقتراض وساعتها اللي بيسلفك بيفك زنقتك وياخد الأجر

لكن مينفعش تستلف علشان تعمل مشروع بكام مليون إلا لو صاحب الفلوس يعملها لله " لو فاعل خير بزيادة قوي"
لأن انت لو استلفت مينفعش ترجع الفلوس بزيادة

الحل هوا المشاركة: ان صاحب الفلوس يخش معاك فى المشروع جزء لرأس المال وجزء للإدارة نقول مثلا 60% رأس المال و40% للإدارة والفكرة المكسب بالمكسب والخسارة بالخسارة وساعتها ميكونش سلف ، تكون مشاركة

لكن أكرر : الاقتراض للضرورة وللضرورة فقط ، وكل قرض جر نفع فهو ربا، مينفعش صاحب الفلوس يستفيد من القرض ، القرض دي حاجة لله ، مزنوق فى فلوس ، تاخد قرض صغير يفك زنقتك،عاوز تعمل مشروع وعندك فكرة تشوف حد يمولك مش تستلف منه بالربا ،يمولك بنصيب من المشروع ، ولو معاك فلوس تدخل مشروع بدل ماتسلف الناس بالربا

ده شرع ربنا وده دينا


"واحل الله البيع وحرم الربا فمن جاءه موعظة من ربه فانتهى فله ما سلف وامره الى الله ومن عاد فاولئك اصحاب النار هم فيها خالدون"

ياجماعة الربا ليه أثار سيئة جدا على الاقتصاد
شوفو أزمة التمويل العقاري فى امريكا ، النهاردة في خبر عنها على البي بي سي، شركتين عندهم أزمة في 500 ترليون دولار

ده غير أنه أساسا مغضبة للمولى عز وجل وحرب من الله والرسول ، وملعون الربا وكل اللى بيقرب منه يسلف ويستلف وكتب ويشهد كلهم ملعونون فى حديث الرسول

محمد