-
السلام عليكم عندى مشكلتين مثبت السرعه بيدينى فى مشكله speed control faulty
والتانيه كنت فى مشوار وركنت كان السنسور بارك شغال واما جيت امشى لقيت السينسور مش شغال ومفتاح غلقه وفتحه لقيت لمبته منوره وكأنه مغلق ومش عاوز يتغير حتى اما أدوس عليه كأن المفتاح معلق حد عنده فكره مع العلم ان ده حصل فجأه
-
أروح التوكيل ولا حد حصل معاه المشكلتين واتحالو فى مكان تانى ......
-
فيه إيهاب جلال في صقرقريش و امير و جوزيف في مدينة نصر
لو منفعوش ,روح التوكيل
لو معندكش وقت و عاوز تنجز ,اطلع عالتوكيل على طول
-
انا بحترم ال c4 جدا رغم انى لا امتلكها لانى بصراحة مكنش عندى معلومات كفاية عن عيوبها اليى ممكن تظهر و تتعالج ازاى و بكام و بعيد عن استغلال التوكيلات لكن كلامكم بدا يطمنى و بفكر اجيب واحدة مستعملة رغم ان ال c4 2012 تحفة بجد بس طبعا الكاشات مش مساعدة :)
-
السلام عليكم و رحمة الله و بركاته
انا معايا C4 2009, و الحمد لله شغالة كويس باستثناء مشكلة ال antipollution faulty ما بين الحين و الاخر
انا بقالي فترة بحس ان فيه زرجنة شوية خصوصا لما العربية تكون باردة لما بطلع الفتيس من ال P و اليوم لقيته مش راضي تماما لغاية ما بطلت و دورت تاني و كاركت فرامل كذا مرة لغاية ما رضي يطلع من ال P
فيه حد حصلتلو المشكلة دى قبل كده؟
شكرا يا جماعة
-
ايه يا جماعة عايزين نرجع الموضوع ده بدل الموت اللى هو فيه
و فيه فكرة تانية ان شاء الله نحاول ننفذها
ان احنا نعمل جروب لمالكى ستروين فى مصر عشان انا عارف ان التواصل على الفيس بوك هيبقى اسهل لناس كتير من المنتدى هنا
بس طبعا احنا هنفضل فى بيتنا الاول نايل موتورز
اتمنى كل مالكى الستروين يشرفونا فى الجروب
و اللى يعرف اى حد من مالكى الستروين يا ريت يعمله انفيت فى الجروب بحيث نحاول نلم اكبر عدد ممكن من مالكى الستروين فى مصر
و ده لينك الجروب
Anmelden | Facebook
-
مشاكل عديده وحلولها
السلام عليكم انا رجعت بمواضيع كتيره بس مفيده وغاليه انا أما ظهرتلى antipollution fault
سألت هنا وسألت الصيانه كلو قال لأما الموبينه أو البوجيهات انا غيرت مرتين بوجيهات وبرضو مفيش فايده لغايت يوم العربيه قطعت خالص فتأكدت انها موبينه وبعد ما راحت المركز اللى برحوا روخنا على اساس موبينه وغيرنا الموبينه وجيت ادور العربيه مادرتشى فقالوا اكيد طرمبه بنزين بس ساعتها مكنتش موجوده ومهندس المركز مكنشى موجود المهم سبتها وبعد ما فكوا الطرمبه جاء مهندس المركز وقال اجرب علبه الفيوسات قبل الطرمبه عشان لو مطلعتشى طرمبه يكون لبس الجديده وفعلا عمل كده ودارت العربيه وطلع الموضوع علبه فيوسات ومن ساعتها antipollution fault
راحت بس انا قبلها بشهرين كان الدينامو بايظ احتجت اغيروا والله واعلم اذا كان هو السبب فى علبه الفوسات ولا لأ المهم انا جبت الاتنين جداد الدينامو 2850 بتركيبوا بعد طبعا ما عنيت فى الاستيراد وبعد ما كنت هجيب الفاليو الللى فعلا كان مضروب جبت الماتسوبيشى زى الللى كان خارج من العربيه أما بخصوص ال SPEED CONTROLL FAULTY فالعيب فى ماكينه ال ستوب وده أكيد عن تجربه ودلوقتى انا بعمل صيانه 120000 بتغير السيور والبلى و ممكن البارات الداخليه للعربيه لسه مش عارف المهم انا أصبحت الى حد ما عندى حلول بعد المشاكل الللى قابلتنى ويا رب اكون افدت وشكرا
-
عاوزين نرجع الصفحه ديت نشطه زى الاول
-
السلام عليكم أنا أخوكم أشرف لطفى. أنا اشتريت سي4 2006 أوتو و عملت صيانة و هي عاملة 86000 كم و روحت عند واحد اسمه جميل بتاع فرنساوي في عين شمس خلف حديقة العرب و عنوانه
65 شارع عمر بن الخطاب خلف حديقة العرب متفرع من شارع الحرية أو مصطفي حافظ و تليفونه 01005223373. هو عنده الكومبيوتر بتاع العربية و بيكشف عليها و عنده قطع الغيار قديم و جديد و حتى كان عندي طاسة عجل ناقصة خدتها استعمال من عنده. كمان عنده صيانة للبيجو و الرينو.
أنا عملت عنده غيار للزيت و الفلتر و فلتر الهواء و 2 جوان وش التاكيهات و التيل الخلفى و الكشف علي كومبيتر السيارة و مسح الERRORS و فك البوابة و نضفها و زيتها و برمجها تاني و كشف علي السيور غيرت مية الرادياتير لأنها كانت عادية و جبت لها المية الحمراء الأسبانى و كشف علي زيت الفتيس و زوده و غير سنسور بتاع الاستوب كان مخلي مثبت السرعة مش شغال لكن المحدد شغال و كان بيدينى speed control faulty و لمبة الservice تنور و يدي ألارم. المهم اتصلحت و اشتغل تاني و الأسعار كالآتي:
المصنعية 150
الطاسة بتاعة العجل 100
الميه الحمراء 35 جنيه أسبانى مش فاكر الماركة بس مش IADA لأنى مالاقتهاش هناك
الزيت اللي هو 5000 كيلو ب 120 جنيه توتال
الجوانات الاتنين 250 جنيه
زيت فتيس بتاع سيتروين 1 كيلو ب 120 جنيه
التيل الخلفي أسباني ريمسا 150
فلتر الهواء و الزيت مش فاكر لكن الزيت بتاع المتسوبيشي و الهواء الأصلي بتاعها و سعرهم واحد 45 جنيه تقريبا و التاني 60 مش فاكر
السنسور بتاع الاستوب 120 جنيه.
شكل الورشة مش عاطفي لكن اللي خلاني أتعامل معاه اني أعرفه من 5 سنوات و أتنين قرايبي اتعاملوا معاه واحد عنده AX و التاني عنده ZX كمان هو فاتح تحت عيادتى فأنا عارفه كويس. الشئ اللطيف ان منطقة عين شمس دي مليانة صنايعية و قطع غيار السيتروين و الرينو و البيجو قديم و جديد و الأسعار كويسة.
دي كانت أول تجربة لي مع السي4 و ناوي و ناوي كمان 5000 كم أغير الكاتينة و التيل الأمامي و فلتر التكييف و البنزين. لما أعمل حاجة تانية أبقي أقولكم عليهاو دمتم بكل خير
-
Content Relevant URLs by
vBSEO 3.6.0 PL2