اهلا و سهلا بحضرتك فى الرابطة لو تقدر تحكيلنا اكثر عن رأيك فى العربية بوجه عام و ايه المشاكل اللى حصلت و حلتها ازاى يبقى الف شكر
عرض للطباعة
اهلا بحضرتك انا هيثم بالنسبه للعربيه انا شاريها من 3 شهور هى الكوبيه جميله جدا مميزة اخر حاجه فخمه وراقيه جدا دا الشعور العام بالنسبه للتفاصيل هى قويه جرايه وثابته جدا مريحه مووت فى السفر بس هى قطع غيارها اللى غاليه شويه
انا بعد ماغيرت البوجيهات حصلت مشكله الرساله ايها تانى وفى رجه جامده فى الدواره وهى بارده فاظن انها الموبينه لان فريد شوقى قالى الرساله دى معناها ان فى حاجه غلط بس ايه هى مانعرفش فقالى نغير البوجيهات ونجرب لو ماتظبتطش نشوف الموبينه
\لو حد غير الموبينه قبل كده يقولى منين وبكام ومصنعيه تغييرها كام عشان انا سالت عليه لقيت ارقام متفاوته جدا الاصلى من الوكيل حوالى 1800 وبرة ب 750 وواحد فى الحرفيين بيبيعها ب 400 قالى اسبانى وممتازة فانا محتار ياريت الاهتمام بسرعه الرد
اهلا و سهلا بحضرتك معانا ، انا مهاب ، ده كده حضرتك لسه العربية جديدة معاك برضه ، بس انا مشتريها من حوالى 6 شهور كده :nemoflow:
و الكوبيه ماشاء الله عليها انا بحبها جدا بس كان فيه اعتراض فى البيت عليها مع انى بحبها جدا ، ربنا يبارك لك فيها ..
انا شايف ان حضرتك برضه ممكن تروح تكشف على العربية فى حتة تانية عشان تتأكد من التشخيص بتاع العطل
و بصراحة بالنسبة للموبينة انا مش عارف
اتمنى حد من الاعضاء يقدر يفيدك
وانت بدورها الصبح دوس سنه بنزين وخلى رجلك على دواسة البنزين لعدة ثوانى (خلى الrpm على 2 ) ولو ادتلك الرسالة بطل العربية ودورها ثانى ودوس بنزين جامد وان شاء الله مش هتعمل مشكلة تانى .
انت طبعا عارف ان العربية كلها حساسات فده فى الغالب حساس بيعلأ ومش الموبينة (والله أعلم)
اصلى الكلام ده انا بعمله الدنيا بتمشى تمام وهاروح احطها على الكمبيوتر فى حته تانيه واشوف الدنيا المشكله ان العيب ده معناه ان البنزين مش بيتحرق كويس وده له اسباب كتير البوجيهات والموبينه والبنزين والفلتر وحاجات كتير بس الحمد لله هاخلينى وراه واحده واحده ماتعرفش منظف بوابات كويس اللى بيتحط مع البنزين والتانك مليان لو تعرف قولى منين وبكام علشان فى خمسين الف نوع والواحد عايز حد جرب وجاب نتيجه
مالوش لازمة انا بحط بنزين 95 والعربيه موديل 2007 وانا شاريها زيرو ومن 2008 وهى ساعات بتعمل الحركة دى والتوكيل هو اللى قال لى اللى انا كتبتهولك وجربته فعلا وده نتيجة ان فى السقعة الشديدة والرطوبة البنزين ببيوصلش كويس للموتور فعلشان كده الحساس يعمل error وفى الصيف نادر جدا انها تعمل المشكلة دى . الفكرة كلها ان العربية لسه جديدة عليك وانا مش عاوز حد يعملك البحر طحينة وتقعد تصرف على المشكلة دى وتغير كل حاجة فى العربية ويطلع فى الأخر المشكلة تافهه , انا فى مرة نظفت الانجكشن بس الصراحة كان فى التوكيل فكوا حاجة اسمها البوابات وبخوا فيها اسبراى مخصوص وفرئت كتير بس المشكلة بتاعت الدواره الصبح ملهاش علاقة بالموضوع.الحساسات فى العربية لو قعدت تمشى وراء كل error يطلعك ممكن تخاف تركبها.
طالم اى error ظهرلك وبطلت العربية ودورتها تانى وماظهرش تانى لا تقلق منه خالص اما لو فضل موجود ومارحش يبقى فعلا فيه مشكلة او لو ظهرت رساله stop او service يبقى برضه فيه مشكلة بس ماتخافش مش معناها مصيبة لأن الحساسات (من اسمها حتى حساسة جدا لأى مشكلة ولو بداية مشكلة) علطول شغالة وممكن يبقى فيه مشكلة فى الحساس نفسه ومش فى العربية.
ومبروك عليك العربية وان شاء الله تعجبك واى سؤال المنتدى كله تحت امرك.
استاذ محمد نبيل كان اقترح اننا نعمل دمج و نعمل رابطة واحدة مع رابطة 307
هو بصراحة انا شايف انه اقتراح حلو اوى بالذات ان العربيتين يعتبروا نسخة من بعض
بس انا دخلت قسم بيجو ملقيتش رابطة 307 مش عارف ممكن ننفذ الفكرة ازاى و ايه رأيكوا فى الفكرة نفسها
انا كمان روحت عند م.اخمد غلوش وكانت بوجيهات واتظبطت بس دلوقتى رساله تانيه اما اكون عاوز اشغل المثبت Faulty speed control