الموضوع: استفسار .. بخصوص محل فول وفلافل او اكسيسوارات

المشاركة الأصلية كتبت بواسطة brazili

بص يا اخى

الفول و الفلافل ده محتاج صنايعية و خبرة ....... و دول ح يخلوك تلف حوالين نفسك
و حتصرف كتير على بال ما تشتغل ....... ده على اساس انك لقيت ناس كويسة تشتغل معاك

انا شايف بصراحة ان موضوع الاكسسوارات ده احسن بكتير
يعنى حاجاته فى منها رخيص بالمجملة
و متشعب
و ممكن تبدع فيه زى مثلا طريقة العرض و الدعاية بتاعته و الديكور بتاع المحل
يعنى ممكن لما تصرف عليه تلاقى ده غير ان مكسبه حلو
اهم حاجة انه مش محتاج خبرة ولا صنايعية
لو حضرتك فتحت دماغك مع السوق ح تفهمه بسهولة
هو بس محتاج معاملة زبون كويسة .... و يكون عندك امانة فى الشغل بس مش اكتر
لكن اهم حاجة لكل ده .......... الموقع او المكان اللى ناويين تفتحوا فه ان شاء الله

عارف انا عندى محل كماليات و استيكرات سيارات ........ ساعات بنزل محلات الجملة بتاعت الموسكى او النزهة الجديدة عشان اجيب منها ميداليات او عليقات لمرايات العربيات و دباديب و حاجات زى دى

لما بشوف اسعار لعب الاطفال و الاكسسوارات التانية الحريمى و مستلزمات المدارس بيبقى نفسى افتح على طول محل اكسسوارات زى اللى حضرتك قلت عليه

أهم حاجة فى الموضوع ده انه عندك فى البلد دى مواسم كتير زى

عيد الام + موسمين للمدارس + عيد الحب + العيد الصغير و الكبير + راس السنة

و بضاعته مش ح تخسر يعنى لا بتاكل و لا بتشرب زى الناس ما بتقول

ده رايى

و ربنا يوفقك و يرزقك

احمد برازيلى

يا سلااااام ... مستنيك من زمان بص يا باشا بما ان حضرتك بتنزل تجيب حاجات من الموسكي وبتشوف الحاجات اللي بقول عليها ممكن اعرف من خلال راي حضرتك يعني البضاعه تتكلف كام يعني تشكيله حلوه كده تعمل كام او يبقى معايا كام ؟ طبعا انا سامع ان افضل مكان نشتري من الاكسيسوارات الحريمي والاشرابات ولعب الاطفال هو الموسكي صح كده ؟؟ ده ده يشمل العتبه ودرب البرابره وناس بتقول درب سعاده هي بيقي المناطق دي في مكان واحد مش كده ؟؟ معلش انا من اسكندريه فمش عارف القاهره كويس


تاني سؤال بما ان حضرتك عندك محل هي الرخصه بتتكلف كام وبتاخد وقت قد ايه ؟؟

ما انت مش هتجيب صنايعي تجربه ف الناس انت هتمتحنه الاول و تدوق و اللي يعمل الاكل يكيفك هوا اللي يشتغل و تفضل تتابع شغله ع طول يوم ما يعك تنبهه ان الاداء قل

المشاركة الأصلية كتبت بواسطة solyelissa

يا سلااااام ... مستنيك من زمان بص يا باشا بما ان حضرتك بتنزل تجيب حاجات من الموسكي وبتشوف الحاجات اللي بقول عليها ممكن اعرف من خلال راي حضرتك يعني البضاعه تتكلف كام يعني تشكيله حلوه كده تعمل كام او يبقى معايا كام ؟ طبعا انا سامع ان افضل مكان نشتري من الاكسيسوارات الحريمي والاشرابات ولعب الاطفال هو الموسكي صح كده ؟؟ ده ده يشمل العتبه ودرب البرابره وناس بتقول درب سعاده هي بيقي المناطق دي في مكان واحد مش كده ؟؟ معلش انا من اسكندريه فمش عارف القاهره كويس


تاني سؤال بما ان حضرتك عندك محل هي الرخصه بتتكلف كام وبتاخد وقت قد ايه ؟؟

بصراحة انا مبروحش كتير ....... بس هو معروف ان كل الاماكن دى جنب بعضها و داخلة فى بعضها و مشبكة فى بعضها ......... انا بروح لواحد فى حارة اليهود ....... و كل مرة انسى هو كان فين ؟؟؟؟

و انا كمان معرفش تتكلف كام التشكيلة المناسبة للمحل ؟؟؟

بس عايز اقول ليك و للاخوة الاعضاء على حكايتى اول ما ابتديت انزل التوفيقية اجيب بضاعة :::

كنت باخد 200 جنيه بس فى كل مرة ....... و افضل رايح جاى فى التوفيقية ..... و اقعد ارغى مع كل و احد صاحب محل و اعمل فيها غلبان مش فاهم حاجة ........ طبعا اتنصب عليا كتير ....... بس مش مهم ده انا كل اللى معايا 200 جنيه .... بس اهم حاجة انى كنت بشغل مخى و ادرس السوق كويس و كنت بوقف الناس اللى بتشيل بضاعة على الحمالة اللى بعجلتين دى ....... و احط فى ايده من جنيه لخمسة حسب سنه و اسأله عن احسن الاماكن لبيع الجملة ......... دول مفيدين جدا ....... طبعا كان فيهم ناس بتشتغلنى و بتعتنى على ناس تبعهم ........ ده سوق يا اخى الكريم لازم تكون حاطط عينيك وسط راسك و مركز قوى لان تركيزك ده اللى ح يكسبك فلوس

مرة دخلت على محل فيه واحدة ست ( الله يهديها ) اشتريت منها شوية حاجات و عرفتها انى بشترى جملة قالتلى و اكدتلى انها بتبيع جملة ..... المهم خدت حاجات بخمسة جنيه الواحدة
كل ده عشان اشوف اسم المستورد المكتوب فى الضهر ......... لما رحت للمستورد ( مسافة حوالى 20 - 30 متر ) جبت الحاجات دى بـ 130 قرش أو 170 قرش مش فاكر ....!!!!!!!!!!!

قصدى بقى انك بتشترى فى الاول اعداد قليلة و بمبالغ بسيطة عشان تعمل تشكيلة و بعد كده لما تفهم السوق شوف المكان عندك بيطلب ايه و ركز عليه .......... بس ده لازم يتم بسرعة عشان محدش ييجى المحل و يسأل على حاجة و ما يلاقيهاش

بالنسبة للرخصة مش عارف بصراحة لانى مش عامل رخصة فى المحل لحد دلوقتى ... لأن المحل إيجار جديد !!!

تحياتى

المشاركة الأصلية كتبت بواسطة mahfouz1983

نصيحه من المحله بلد البغل اساس الفول والطعميه لو مبتفهمش في الشغلانه دي متخشهاش لانه هتخسر هتخسر وبعدين مشاكلها كتير مع الصحه والتموين دا غير مشاكل الصنيعيه الي هيقرفوك لانك بالنسبه للصنايعي مش فاهم شغله يعني مش هتكون معلم فش الشغلانه دي وخلي بالك ان اجر الصنيعي كبير مش صغير والفترة دي متدخلش مشاريع متفهمش فيها حاحجة اعتقد مشروع الاكسسوار الحريمي نضيف جدآآ ومكسبه حلو جدآآآآآآآآآآآآ

عندك حق وانا حاسس وبتاكد من كلامكم ان موضوع الفول ده مش سهل وكلوا خبايا ولازم حد يفهم في الشغلانه هي بس ناس كل ما اقابلهم او افتح كلام معاهم يقولوا افتح محل فول وفلافل طبعااا وانا اعتقد انهم مش فاهمين الموضوع اصلا

المشاركة الأصلية كتبت بواسطة solyelissa

عندك حق وانا حاسس وبتاكد من كلامكم ان موضوع الفول ده مش سهل وكلوا خبايا ولازم حد يفهم في الشغلانه هي بس ناس كل ما اقابلهم او افتح كلام معاهم يقولوا افتح محل فول وفلافل طبعااا وانا اعتقد انهم مش فاهمين الموضوع اصلا

ههههههههه الناس كلها بتقول ان الاكل ما بيخسرش .......... هما عايزينك تفتح و تتوصى بيهم شوية .
لازم تسأل اهل الصنعة مش اى حد ..... انا قبل ما افتح كل الناس اللى اعرفهم قالولى سيبك من الكلام ده لأن قانون المرور ضرب السوق ده .

اقولك على حاجة كويسة ....... روح محلات بعيدة عن المكان اللى ح تفتح فيه و اتصاحب على الناس هناك كذا مرة و اشترى منهم حاجات بسيطة ....... و ابتدى تسألهم عن الشغل ده و ايه ظروفه و ما يمنعش انك تخش على صاحب المحل و تقوله انا عايز افتح النشاط ده فى مكان تانى بعيد عنه ( عشان يتطمن ) و تسأله عن ظروف المشروع ده ( طبعا مش كله ح يجاوبك بصراحة و وضوح ) لكن جرب تروح لعشرة مثلا و يمكن يطلع فيهم ناس كويسة تدلك على الصح .......... جرب مش ح تخسر حاجة و اوعى تتكسف .... !!!!!!!!!

المشاركة الأصلية كتبت بواسطة brazili

ههههههههه الناس كلها بتقول ان الاكل ما بيخسرش .......... هما عايزينك تفتح و تتوصى بيهم شوية .
لازم تسأل اهل الصنعة مش اى حد ..... انا قبل ما افتح كل الناس اللى اعرفهم قالولى سيبك من الكلام ده لأن قانون المرور ضرب السوق ده .

اقولك على حاجة كويسة ....... روح محلات بعيدة عن المكان اللى ح تفتح فيه و اتصاحب على الناس هناك كذا مرة و اشترى منهم حاجات بسيطة ....... و ابتدى تسألهم عن الشغل ده و ايه ظروفه و ما يمنعش انك تخش على صاحب المحل و تقوله انا عايز افتح النشاط ده فى مكان تانى بعيد عنه ( عشان يتطمن ) و تسأله عن ظروف المشروع ده ( طبعا مش كله ح يجاوبك بصراحة و وضوح ) لكن جرب تروح لعشرة مثلا و يمكن يطلع فيهم ناس كويسة تدلك على الصح .......... جرب مش ح تخسر حاجة و اوعى تتكسف .... !!!!!!!!!

للاسف مافيش حد بيقول لحد حاجه في مصر لما تسال واحد فاتح نفس المشروع اللي بتسال عنه علي طول يقول لك اللي يخليك تصرف نظر عنه فوراااااااااا حتي لو حلفت له انك حتفتح في اخر الدنيا علشان كده بسأل هنا .. ممكن نفيد بعض ..يعني حضرتك اتكلمت بصراحه واستفدت من كلامك كتير ...

اتا لسه بشوف وبسأل في موضوع الاكسيسوار الحريمي .. وكمان في موضوع البطاقه الضربيه والسجل والرخصه في ناس بتقول مش مشكله الرخصه ومش عارف في نصيب ولا لسه ..

ويمكن حد عنده فكره عن المشروع ده ممكن يدخل يفيدنا .....

انا هقول لحضرتك على رأيى فى موضوع الاكل
كان ليا صديق عنده محل عصير وده نشاط قريب منه ويمكن اسهل
اكبر مشكله كانت بتقابله هى الصنايعيه
صعب انه يلاقى واحد شاطر ويقدر يشغل المحل رغم انه موجود فى المحل 24 ساعه
الاصعب انه يقدر يقنعه يستمر فى الشغل رغم ان مرتباتهم كانت كبيره
بس للاسف الصنايعى يقبض يوم السبت
ييجى تانى يوم الاربعاء لانه معاه فلوس ومكسل ييجى
وحجته دايما جاهزه كنت تعبان
ومش هتقدر تغيره لان اللى هييجى تانى هيبقى زيه برده
وممكن تيجى فى وقت شغل مهم زى العيد مثلا وتلاقى كل واحد فيهم عنده زياره عائليه واخبط دماغك فى الحيطه انا تعبان
ووقت الراحه ومفيش شغل تلاقيهم كلهم موجودين
كان هو بيضطر اوقات كتير انه يشتغل ويساعد الصنايعى علشان فيه حد غايب
وايام كتير كان بيروح يجيب واحد منهم من بيته بعربيته ويقعد يسايس فيه ويقوله علشان خاطرى
ودى مش مشكله الاكل والشرب دى مشكله اى مشروع بيحتاج لعماله ماهره
العمال اغلبهم بتتدلع ومبتشتغلش طول ما هى معاها فلوس
لو حضرتك مش خبره فى الموضوع ده وتقدر تشتغل مكان العمال وتشغل المحل من غيرهم هتخسر كتير
يبقى الافضل انك تشوف مشروع بيحتاج لعماله غير ماهره سهل الاستغناء عنهم
او مبيحتاجوش تدريب كتير علشان تقدر تشغل المشروع بنفسك فى اى وقت وتبقى انت فعلا المدير ومتتزنقش لحد ويبقى اى عامل عندك عارف انه ممكن الاستغناء عنه
والاهم من كده وده بقى من امتلاكى لاكتر من محل لفتره حوالى 10 سنين
انك تكون متفرغ للمشروع ده
مفيش مشروع بينجح من غير صاحبه
فتره تأسيس المشروع دى اهم فتره
لو هتشارك حد شارك حد يكون فاهم يعنى تكون محتاج خبرته مش فلوسه
الشريك اللى بيقولك انا مساهم وانت مدير المشروع ملوش لازمه لان كده بدايه من غير خبره
محل تمليك لو فلوسك تسمح ده شىء ممتاز (لو مشتغلش هتأجره) احسن من انك تأجر وتجرب فى محل ايجار لانك ممكن تبداء تكون خبره وسمعه للمحل وييجى صاحبه ياخده يشغله نفس النشاط او ييجى حد يزود الايجار علشان يستفاد من اللى انت عملته
اخيرا ربنا يوفقك واتوكل على الله بعد الاستخاره ومتخليش كلامى يقلل معنوياتك لانى بكلمك عن الخبره اللى انت محتاجها وافتكر انك لو خفت عمرك ما هتاخد الخبره دى وكل شىء بيبقى صعب فى اوله وبيقى ظاهر انه مخيف من بره بس بعد ما تاخد الخبره هتكتشف انها كانت مجرد مسأله وقت