لكل من يريد شراء byd f3 ملاكي سواء MT or AT
السلام عليكم أعضاء منتدى نايل موتورز قسم السيارات الصيني
أحب أن أقول وبكل صراحة إني معجب بالسيارة جدا
ومفيش اعتراض عن جميع المميزات اللي شوفتها واللي سمعتها من سواقين التاكسي
وتقريبا مش بركب اي تاكسي غير تاكسي البي واي دي الجميل وبنبهر جدا بكل امكانيتها وصفاتها
رغم سعرها البسيط وقطع غيرها اللي على قد الايد وده مش كلامي ده كلام سواقين التاكسي
وعلى فكرة وبإجماع سواقين التاكسي العربية حلوة جدا ولكن
ينفع اشتريها ملاكي ولا علشان تاكسي تبقى حلوة
مش هتفرق طيب أيه المشكلة ؟
مفيش سواق تاكسي العداد بتاع عربيته عدى الخمسين الف كيلو إلا وقال بعض العيوب في السيارة
رغم إنه قال مميزات كتيرة عن العيوب
والعيوب المجمع عليها :
1- تيل الفرامل لاااااااااااااااازم يتغير كل فترة قصيرة (ويمكن علشان استهلاك التاكسي اعلى من الاستهلاك الشخصي في الملاكي) .
2- العفشة لاااااااااااااازم تتربط كل فترة وممكن تشتري عفشة من التويوتا وتريح بالك .
3- لا يوجد عزل كافي للهواء الخارج من الموتور وبسبب كده فيه هواء ساخن من الدواسات وبيسبب قلة كفاءة التكييف وعدم تبريده بالشكل المرغوب فيه ولكن مش عيب قوي اوي علشان تقول عليه مستحيل اصلاحه لكن ممكن في التوكيل أو لو سألت ميكانيكي شاطر.
4- التقفيل المصري مش حلو علشان الشنطة والابواب وخامات الابواب نفسها من جوه سيئة في التركيب وبتحتاج تهبد الابواب ويمكن سمعت ان الكلام ده موجود في كل الصيني مثل الاسبرنزا.
5- إستهلاك البنزين عاااااااااالي مش معقول خالص ولذلك هتلاقي بعض التاكسيات اللي اشتروها ومشي بيها الخمسين الف كيلو او اقل حولها غااااااااااز وشوف الاستيكر على الزجاج الخلفي لشركة الغاز هتلاقي فيه تاكسيات كتيرة إلى حد ما.
6- إعادة البيع في التاكسي شغاااااااااال وبالسعر اللي تحبه ويكون معقول لمواصفات واستعمال السيارة ولكن الملاكي قليل الموجودين منه واللي عايزنه وإن كان مستعمل فسعر الجديد مش غالي علشان يشتري مستعمل إلا في حالات إستثنائية ولكن بوجه عام البيع في الملاكي قليل جدا يكاد يكون محدود.
طيب مفيش مميزات في السيارة خالص لاااااااااااااااااااا طبعا فيه ويمكن اكتر من العيوب:
1- الموتور ميتسوبيشي اربعة سلندر 1600 سي سي و 107 حصان.
2- الاوبشنز تقارن بالسيارات الاعلى منها في السعر والماركة والصناعة.
3- الثبات على الطريق السريع لو انت بتسافر كتير هتحس بالثبات الجذاب ليها.
4- إملا السيارة أشخاص و شنط ولو فيه شبكة املاها ولا يهمك سيارة بتتحمل وبشاهدة سواقين التاكسي في الصيف وتوصيل الناس للمصايف.
5- تسحب معاك ومتقولش لأ حتى لو مشغل التكييف ومحملها ناس.
6- توكيل السيارة كويس وبشهادة سواقين التاكسي وكمان فرع اسكندرية ممتاز.
7- الإضاءة للفوانيس فوق الممتاز ومش بتقل مع الوقت .
8- العربية فيها 2 وسادة هوائية لاقدر الله في حالة الحوادث وفرامل مانعة للإنغلاق.
9- فرش السيارة فاخر وشغاااااااال معاك حتى لو عندك عيااااااااااااال.
10- شكل السيارة روعة ويجذب الانظار إليه ويعطي فخر لصاحبها وتشبه الهوندا والكامري.
11- قطع الغيار متوفرة ومش غالية وممكن تبدلها بالياباني تويوتا كرولا 2004 إلى 2007.
12- السعر خارج المنافسة (سعر ممتاز 82000 اوتوماتيك موديل 2012 و 72000 مانيوال)
يا جماعة انا عايز اقول كل الكلام اللي سابق ذكره مش كلامي ده يعتبر مثل تقرير عن السيارة مع سواقين التاكسي وتجاربهم وده لأني كنت مش بركب تاكسي غير بي واي دي مثلما ذكرت وعلشان كده حبيت اقول تجارب الناس معاها ورأيهم فيها وعلى فكرة أنا لا مع ولا ضد شركة الامل
لكن موضوع التوكيل والصيانة في القطامية أو اسكندرية دي مش قصة ده مجرد دورية الصيانة يعني سواء هنا او هناك مش فارقة كتير ولكن أتمنى أن تنتشر مراكز صيانة في عدة محافظات وشكرا
منتظر الردود .......................:top_posters: