هل معقول فيه ناس حسودة كده ؟
من ضمن العمال اللي عينتهم في المصنع عامل ابن السواق بتاعي و الواد طلعت عينه وحشة بجد , مرة عرف ان واحد من الفنيين عنده مزرعة فراخ صغيرة و قاله "و عندك كمان مزرعة فراخ و كل يوم تجيب العلف ده كله يا عم علي " و تاني يوم الفراخ مات منها 90% , صدفة ممكن ...
عشان احنا مغتربين في بني سويف فكان كل واحد من البلد بيعزمنا على الفطار و كان الدور على علي برضه و احنا بنفطر الراجل كان لابس جلبية جديدة و الواد حط ايده عليها و قاله " حلوة قوي يا عم علي " الراجل راح يصلي التراويح لقي صدر الجلبية منسل و لما روح مراته قالتله " الجلابية منسلة كده ليه " لقي الجلابية الجديدة من الظهر منسلة كلها بالعرض ... برضه صدفة ..
طارق اللحام كان بيشيل السقالات مع العمال و الواد بيقوله " ايوه يا عم طارق شغلانة زيادة و أوفرتايم و العملية هايصة معاك " الراجل بيرفع راسه راحت السقالة معوراه في ظهره بجرح طوله 6 سم .... الواد حظه وحش و مش عايزين نظلمه ....
سيد الكهربائي بيشتغل معايا بارت تايم و شغله الأصلي في صيانة أبراج اتصالات و عنده موتوسيكل ... الواد قاله "يا عم سيد و انت داخل علينا بالمكنة زي ما تكون أسد " و الراجل مروح خد ملف اتقلب يالمكنة و تاني يوم دخل يصلي في جامع في قريته جنب بيته المكنة اتسرقت ..... نقول ايه بقى ؟؟؟
أنا أخدت شغلانة تركيب جمالون في المصنع اللي جنبي البيه قاللي " يا هندسة هوه صحيح انت بتدي المساعد 100 جنيه يومية ؟" في نفس اليوم عربيتي اتقلبت و الخسارة أكبر من فلوس الشغلانة مرتين تلاتة ....
و كمان كام موقف كده مش فاكرهم دلوقتي ....
المصيبة بقى أنا بقيت بخاف جدا منه و بقلق جدا لما بشوفه بس الواد شغال معايا , كمان كل العمال و الفنيين اتعقدوا منه ...... مش عايز أمشيه لكون بفتري عليه و كمان عشان أبوه عشرة عمر , كمان هوه هيتجوز على العيد الكبير و انا عارف حالته المادية الضايعة ....
هوه فعلا فيه ناس كده تبص للواحد تجيب خبره ؟
انا عارف ان الحسد حقيقة بس معقول يكون للدرجة دي ؟؟؟!!!!!