الموضوع: تتجوزي واحد مفلسسسسس

السلام عليكم ورحمة الله وبركاته

جزى الله كل من شارك في موضوعي خيرا

أنا كنت متوقع أن أرى هجوما شديدا على الأسئلة اللي وجهتهها

رغم إن فيه خيارات مختلفة قلتها ؟؟؟؟





عارفين إحنا واقعين في ورطة كبيرة ليه بقى
الواحد فينا اتعود إنه لما يواجه مشكلة يواجهها بحل واحد ويلف حواليها باحثا عن مدخل يقدر يدخل فيه مفتاحه للحل الذي لا يتطابق مع المشكلة نهائيا
بيتمنى أن تتحور المشكلة وتتغير حتى تلائم الحل الذي في يده والذي يعتقد أنه لا يوجد حل غيره

ولكن للأسف المشكلة تبقى كما هي وتستمر وربما تختفي نهائيا مع إختفاء الظروف كليا ولكن تظهر بدلا منها مشكلة قد تكون أكبر



الكلام ده فلسفه كبيرة قوي ههههههههه




الموضوع ببساطة إننا بنواجهة أزمة عنوسة في مصر وهذه العنوسة من الطرفين الذكور والإناث ولكن مشكلة الإناث بتكون أكبر لتعرض المرأة إلى استمرار مشكلة عنوثتها إلى ما لا نهاية وكلما مر بها الوقت كلما ضاقت عنها الفرص
أما الرجل ففي كل عمر يكون له فرص مناسبه له

عارفين يعني إيه سن الجواز يرتفع لغاية الأربعين بالنسة للرجل ( اللي مشكلته أقل نوعيا )
إذا افترضنا أن متوسط عمر الإنسان منا هو ستين سنة فهذا يعني أنه أمضى ثلثي عمره بدون زواج
وأنه ظل ما يقرب من ثمانية وعشرين عاما بالغا ولدية رغبة في الزواج لا يستطيع أن ينفس عنها
وأنه أمضى أحلى وأقوى أيام شبابه في التفكير والأحلام والضغوط النفسية والضيق والخجل والحرمان

ربنا سبحانه وتعالى يقول : بسم الله الرحمن الرحيم " حَتّىَ إِذَا بَلَغَ أَشُدّهُ وَبَلَغَ أَرْبَعِينَ سَنَةً قَالَ رَبّ أَوْزِعْنِيَ أَنْ أَشكُرَ نِعْمَتَكَ الّتِيَ أَنْعَمْتَ عَلَيّ وَعَلَىَ وَالِدَيّ وَأَنْ أَعْمَلَ صَالِحاً تَرْضَاهُ وَأَصْلِحْ لِي فِي ذُرّيّتِيَ إِنّي تُبْتُ إِلَيْكَ وَإِنّي مِنَ الْمُسْلِمِينَ * " صدق الله العظيم

الإنسان في الأربعين يكون قد وصل قمة الهرم العقلي والجسدي ويبدأ بعدها المنخنى في الهبوط، ولذلك فالله سبحانه وتعالى يفترض أنه حتى لو كان سيئ العمل قبل الأربعين فلابد انه إذا وصل إلى هذا العمر فقد أدرك انه بدأ الإقتراب من الدار الآخرة وبدأ يرجع إلى الله

الإنسان يولد طفلا ثم يمر بمرحلة الصبا ثم الفتوة والرجولة وهكذا
نحن في مصر الدولة الوحيدة تقريبا الذين عملنا ترحيل لهذه المراحل
فأصبح الولد عنده عشرين ستة وتتحدث معه كأنه في مرحلة الصبا لا يستطيع أن يتحمل مسئولية أو أن يعي ما يدور حوله جيدا
وترى الرجل في سن الثلاثين يفعل أفعال الفتى وفي الأربعين يدوبك بدأ يكون رجل

وكذلك الفتاة
في أي دولة في العالم المتحضر - زي ما كانت مصر في السابق
البنت بعد ما تبلغ أهلها بيعدوها نفسيا وعلميا لأن تكون ربة منزل ومديرة لمملكتها القادمة خلال سنوات قليلة
أما في مصر تلاقي البنت عدت الخمسة وعشرين وهي هايفه وما تفكرش غير في التفاهات - طبعا مش الكل لكن فيه كتير كده

هذا ليس الطبيعي والفطرة اللي ربنا خلقنا عليها

سيدنا أسامة ابن زيد قاد جيش المسلمين وهو ابن السابعة عشر

هل ممكن نتخيل إن سيدنا أسامه لو موجود وسطينا دلوقتي هيكون لابس بنطلون ساقط والبوكسر ظاهر من تحته مثلا زي ما بنشوف دلوقتي ؟؟؟؟!!!!!





فيه ناس بيقولوا الواحد المفروض ما يحبش ولا يفكر في الجواز غير لما يكون عنده القدرة ومخلص

أعتقد يا جماعة احنا مش بنناقش المفروض لكن بنناقش الواقع
الواقع إن فيه ميل قلبي بيحصل نظرا للاختلاط الموجود
الواقع إن فيه شباب الواحد فيهم محتااااااااااااااج يتجوز وهو في سن الكلية وفعلا بيعاني من هذا الأمر
وفيه كتير بيغلط وبيتجوز عرفي

طيب الأفضل إيه
إنه يتجوز عرفي بورقة من الكراسة ولا إنه يتجوز على سنة الله ورسوله وبفرح ومعازيم وبدلة وفستان وهدايا وفرحة وإطمئنان

هتقولي ما يتجوزش خالص
أقول لحضرتك ما حدش له الحق إنه يحذر على واحد إنه يفكر في أمر حلال ؟؟؟؟

طالما ربنا أحله يبقى إحنا ليه نحذره

يمكن ما يناسبش ناس لكن أكيد يناسب ناس تاني

أنا مش بأقول نعممه ولا نفرضه على حد

كتير شباب مصري شفتهم في دبي وأثناء حواراتنا أفاجئ بذكرهم إنهم مارسوا الفاحشة قبل كده في دبي وأبو ظبي
واللي يقولك بس الحمد لله دلوقتي أنا ربنا تاب علي وخطبت وماشي في السليم
واللي يقول كلام تفهم منه إنه مازال في الحرام
والواحد يبقى مكسوف من نفسه وعاوز يفهمهم إن طالما ربنا ستر عليك ما تفضحش نفسك لكن ما بيبقاش عارف يوصلهاهم إزاي وسط الناس




إحنا عندنا أزمةةةةةةةةةةةةة اللي مش فاهم كده يبقى أنصحه يبص حواليه كويس
أزمة عنوسة
أزمة حرمان
أزمة إنحراف



من فترة كنت سمعت حوار اجروه في إذاعة القرآن الكريم مع الأول على طب الأزهر
في حكايته قال إنه لما وصل لرابعة ثانوي أزهر ( أيام ما كانت أربع سنوات ) قال لوالده : بص يا حاج أنا جبت آخرى ومن الآخر كده هتجوزني هأكمل مش هتجوزني يبقى أطلع من المدرسة أكرملك وأكرملي لأني هأصقط !!!!

أبوه تفهم الموضوع وفعلا جوزه والولد طلع الأول على الثانوية الأزهرية ودخل طب أزهر وطلع الأول على الدفعة في جميع السنوات !!




فيه حاجة هأقولها وأكيد إحنا كبار

الفتاة لا تعلم شعور أي شئ غير لما تمارسه بداية من إنها تلمس إيد ولد

أما الولد فهو بيبقى في إثارة داااائمة بمجرد التخيل فقط




الحل الأخير اللي الناس استهجنته لو حد فيكم راح الغرب أو حتى دبي هيلاقي إن المجتمع الغربي قائم عليه ولكن بدون زواج ومش بيعانوا من المصارييف والتجهيز والحاجات اللي احنا وقفنا حياتنا عليها فقط


فيه دكتور أعرفه في جامعة المنيا وهو من أطيب الناس اللي شفتهم - كان عضو مجلس شعب سابق
شخص خدوووووم لدرجة لا تقارن ومشتري بيت واسع علشان يستخدمه في عمل الخير
وحتى زوجته ربنا يكرمها تلاقيها من دعائم مدارس تحفيظ القرآن الكريم ولها نشاط واسع
ودخلهم كويس
وبسم الله ما شاء الله عنده عيال زي العسل
أحد الأصدقاء القدامى شاورلي على شاب قاللي إنه اتجوز بنته وعاش في الشقة اللي كانت فاضية في بيته

بنته كنت أعرفها لما كانت طفلة ووالدها جوزها وهي في الثانوية تقريبا وكملت تعليمها عادي
والشاب كان مجتهد ومتفوق وتقريبا اتعين معيد في الكلية

ومازال الدكتور بنفس طيبته ودماثة خلقه
حد ممكن يتخيل واحد يفكر إنه يدي لبنته شقة قبل إبنه على أساس إن الاتنين لهم حقوق عليه ؟؟؟!!!



ليه دايما بنفكر إن ما فيش غير حل واحد تقليدي لا غير

وأي واحد يشز فهو في النار



أنا نفسي أقابل بنت اتجوزت عرفي وأسألها ليه وافقتي تتجوزي الولد ده عرفي وليه لو كان اتقدملك رسمي وطلب إيدك في الحلال وتعيشي معاه على نفس ظروفه كنتي هترفضي


أنا شفت ناس كتير فضلوا لغاية ما وصلوا الأربعين وكل ما نقولهم ما تتجوز يقولك منين يا حسرة

وفي الآخر أخذ زمام المبادرة واتقدم واتجوز وبنفس الظروف


يعني لو كان حب يتجوز من خمستاشر سنة كان هيلاقي وبنفس الظروف المادية
ويمكن لو كان راح لواحد كان قاله يا ابني مستعجل على إيه لما يكون معاك الباءة ابقى اتقدم لبنات الناس
ولما وصل الأربعين ومش معاه الباءة اتجوز إزاي
ليه قبلناه في الأربعين على فقره ورفضناع في العشرين على نفس الظروف ؟؟؟؟؟


الأخت الأكريمة دونزي
تحية لحضرتك
وانا خايف يقولوا إني قريبتي ( وده يشرفني ) وعلشان كده بتقولي رأي في صفي - لأن أغلب الرجالة اللي علقوا اعتبروني خرجت على النص


أنا عن نفسي أب لطفلتين صغيرين لكن بكل ثقة أقول لحضراتكم لو بنتي لقيت شاب كويس في الجامعة مقتنع بيها وهي مرتاحه للجواز منه وشفت فعلا إنه شخصية لقطه وشاب ابن ناس واتأكدت إنه هيصونها
والله لو طلب إيدها على إنهم يتجوزوا وهم طلبة ومن غير سكن مش هأرفض
إيه المانع يتمتعوا في الحلال ويعيشوا حياتهم في النور وممكن أساعدهم كمان وأشيل معاه
مش كده كده انا هأصرف عليها وهي في الكلية
إيه المشكلة لما أصرف عليها وهي في الكلية ومتجوزاه

المهم أضمن إنهم فعلا مناسبين لبعض وإنه هيصونها وإنه إنسان مسؤووووووووول
طالما إنسان كويس هأأجل فرحتهم ليه عشر سنين ؟؟؟؟؟؟؟