الكاوتش مخروم يااستاذ....خلى بالك دا نصب

**zambarota** · 18-09-2011 08:33 PM

حاسس ان الكاوتش نايم شويه...مريح شويه

الطبيعى هاتدخل بنزينه او ورشه كاوتش علشان تزود العجل

خلى بالك بقى من الى جاي

الراجل الى بيزودلك الكاوتش وبالذات الامامى هايقولك هات الدريكسيون على اخره (يمين او شمال)

وينديلك ويقولك يااستاذ الكاوتش مخروم ويجبلك شويه مياه بصابون ويوريلك الاخرام وتكون اكثر من خرم

وتضطر اسفا انك تلحم الكاوتش عنده (بتسعيره الخاصه)

المفجأه بقى مين الى خرملك الكاوتش وخرمهولك امتى

وحضرتك قاعد جوه العربيه هو بيكون معاه بلف وجواه مسمار يقعد يخرملك الكاوتش

انا حصل معايا الموقف دا فى رمضان عند البنزينه الى بعد لما تخلص طريق اسماعيليه ومتطلعش الكوبرى الى بيوديك على جوزيف تيتو وتمشى من تحت الكوبرى وكانك راجع طريق اسماعيليه تانى البنزينه الى بعد الملف على طول

وطبعا الحمد لله معملتش عنده الكاوتش واستنيت لحد مرحت لواحد معرفه قالى على القصه
لانى استغربت جدا انه ازاى عرف ان الكاوتش اتخرم

وكمان بعدها بكام يوم شوفت قدامه ضحايا جداد وهو بينصب عليهم تانى

**heart_sugar** · 18-09-2011 08:43 PM

معلش يا باشا انا حصلي برضوا الموضوع دى في بنزينه شيل الي في اول الهرم بعد الخزان الي على اليمين دخلت حطيت بنزين وان طالع قلت اشوف ضغط الهواء المهم راح مزود هواء وقلي ضغط الهواء في العجلة 12 بس دي اكيد فيها مشكله نزلت جاب صابون وماء وحطه لقيت 6 اخرام في 20 سم استغربت العجل والعربية جديدة قلي دى اكيد قزاز المهم عملتهم ودفعت 160 جنية
بعدين عرفت انها نصباية حسبي الله

**grinsh** · 19-09-2011 02:13 AM

نعم نصب وبكل تأكيد وخصوصا بنزينة التعاون بتاعت ولاد التيييييييت الي في مدخل قليوب علي اسكندرية الزراعي بنزية كبيرة كده علي اليمين وانت خارج من القاهرة نصبو وعلي ودفعت كتيييييييييييييير وبلاش اقول ارقام علشان محدش يضحك عليا بس والله العظيم الناس دي ادعا عليهم دعا من القلب في ساعة اجابة وانشاء الله ربنا يستجيب وتولع بيهم البنزينه وللعلم ايضا السائل اللي بيحطوا علي الكاوتش ويوريلك بيه الاخرام هو اصلا اللي بيطلع الفقاقيع دي وتكون الفردة سليمة ويدفعك الشئ الفلاني ....ربنا يخدهم

**Mohatfhd** · 19-09-2011 10:11 AM

المشاركة الأصلية كتبت بواسطة heart_sugar

معلش يا باشا انا حصلي برضوا الموضوع دى في بنزينه شيل الي في اول الهرم بعد الخزان الي على اليمين دخلت حطيت بنزين وان طالع قلت اشوف ضغط الهواء المهم راح مزود هواء وقلي ضغط الهواء في العجلة 12 بس دي اكيد فيها مشكله نزلت جاب صابون وماء وحطه لقيت 6 اخرام في 20 سم استغربت العجل والعربية جديدة قلي دى اكيد قزاز المهم عملتهم ودفعت 160 جنية
بعدين عرفت انها نصباية حسبي الله

انا حصلى نفس الموقف بالظبت فى نفس البنزينة ورحت لمدير المحطة قالى الكاوتش مأجر منة وبعد ما رحت لصاحب المركز بتاع الكاوتش ماعمليش حاجة رحت قدمت شكوى لشركة شل للتسويق وكلمنى المهندس هشام مدير المبيعات للقاهرة والجيزة(راجل محترم جدا ) وكلمهم وقالى اروح اقابل مدير المحطة وهوا هايغيرلى الفردة الى باظت ومشوا الواد الى عمل كدة وقالى اتأكد انو مشى و لو شفتوا قلى......

**Ashraf_Ibrahim** · 19-09-2011 11:26 AM

حصلت فيا الحركة دي في بنزينة شل شارع شبرا
وللأسف كنت لسة جايب العربية مبقالهاش معايا شهر مثلا فمعرفش ايه النظام ودفعت ليهم 180 جنيه لحامات وانا معرفش ان بيتضحك عليا
دلوقتي اللي يقلي كدة اقلهه اه عارف انها مخرومة سيبها ملكش دعوة ومش بزود في بنزينات اصلا دلوقتي خلاص
عندي بتاع كاوتش محترم جدا بتعامل معاه راجل زي الفل وأمين جداااااااااااا مبقيتش اروح لحد تاني غيره
حتى العجلة ريحت مني في المنوفية مفكتهاش روحت لبتاع كاوتش وزودتها ورجعت بيها القاهرة وانا عارف انها مخرومة وتاني يوم وديتها للراجل بتاعي طلع منها مسمار صلب محترم ولحمتها ونفختها نيتروجين كمان ب 5 جنيه
حاجة زي الفل يعني :d

**waelfarid** · 19-09-2011 12:02 PM

صح كده

**mohamed_rhem** · 19-09-2011 12:22 PM

انا الحوار ده حصل معايا من اكتر من 10 سنين برضه في بنزينة في الطريق من بنها للقاهرة

وطبعا كنا قاعدين جوا العربية علشان كان في مطر وبهدل الفردة واخد 160 جنيه

الدرس المستفاد

بقيت اخلي معايا داخلي في السفر خصوصا اني بسافر شرم كتير

وعدد من 2 الي 5 بلوف من التوفيقيه البلف التيوبلس ب 80 قرش

ولو اتزنقت خليه يقطع البلف التيوبلس ويركبلك الداخلي ولما ترجع بالسلامه شوف انت بتستأمن مين وصلح عنده

**zambarota** · 24-09-2011 03:53 PM

المضمون بصراحه هى بنزينه وطنيه بس لو مش متأجره

-

الموضوع: الكاوتش مخروم يااستاذ....خلى بالك دا نصب

LinkBack

أدوات الموضوع

عرض

-

-

-

المواضيع المتشابهه

خلي بالك من خدعة ازازة المية بصابون في الكشف على الكاوتش

فينك يااستاذ / حسام سيف

مشكلتي مش عارفلها حل دلني يااستاذ MMamdouh

الردياتير طلع مخروم!

كـل سنه وانتا طيب يااستاذ casber

الكلمات الدلالية لهذا الموضوع

المفضلات

المفضلات

ضوابط المشاركة