[مشكلة الـ abs] جربت عصام و صفا ... أنا مش مصدق بصراحة !!!
السلام عليكم ...
في أحد أيام رمضان المباركة سافرت طنطا زيارة وقت الظهر كده و كنت راجع بالظبط وقت الفطار ... و طبعا خدت الطريق 150 - 170 من أوله لآخره ... المهم تاني يوم لقيت لمبة الـ ABS نورت و الـ ABS نفسه فصل !!! كتبت هنا للشباب فنصحوني أروح التوكيل ... و أنا أتقل حاجة على قلبي مشوار التوكيل ... فبصراحة نزلت آخر النهار من الشغل بجرب العربية لقيت اللمبة طفت فقلت :"قشطة" كان فيه مشكلة و اتصلحت ... طبعا ده تهجيص المهندسين المعتاد ...
المهم العربية يومين و نورت اللمبة تاني ... و آخر النهار طفت قلت يبقى الراجل و هوا بيغسلها بيبل السنسور و لما بينشف بتتظبط .... تهجيص مهندسين للمرة التانية على التوالي ... يومين تاني و حصل نفس الموقف ... صعب عليا فلوسي اللي دفعتها في العربية بصراحة ... و قلت مبدهاش ... أخطف رجلي عصام و صفا أعمل صيانة الـ 5000 بدري و أشوف الموضوع ...
رحت الصبح بدري مهتديا بالـ GPS شارع جوزيف تيتو من خلال الدائري ... الطريق من المعادي خد 40 دقيقة بدون قرص ... و صلت على 11 كده ... المكان رايق جدا منطقة مش زحمة نهائيا ... الناس في الاستقبال تحس انهم بيرحبوا بيك مش متحفزين عشان يقول لك العربية مفيهاش حاجة و هي كده ... قلت لهم على الوضع قالوا لي حنشيك ...
عملنا الصيانة المتينة و ركبوا الكمبيوتر و إذ: ...
مفيش errors !!! و في نفس الوقت اللمبة طفت و الـ ABS شغال زي الحلاوة !!! المهندس محمد صفا شخصيا طلع معايا ... و اختبرنا العربية و زي الفل ... لكن قال لي: أنا عايزك تمشي بيها يومين و لازم تجيلي تاني نقرأ الكمبيوتر عشان لو فيه مشكلة نحلها ... أنا بصراحة ... نويت أعمل الدنيئة و أهرب و مجيش تاني فشكرتهم و حاسبت ... رفضوا ياخدوا فلوس غير فلوس الصيانة و تمن الزيت !!!
يومين و العربية نورت و الABS عملها ... فقلت مجبر أخاك لا بطل أروحلهم تاني ... رحتلهم و قلت للمهندس صفا ... جايبلك اللمبة و هي منورة أهه .. مفيش أكتر من كده ... فرحوا جدا ... و دخلت صليت الظهر مع الشباب لقيتهم كلهم مع بعض بيصلوا (منظر جميل بصراحة و يخليك تطمئن) و بعد الصلاة جينا نختبر العربية ... لقينا اللمبة طفت !!! بس الكمبيوتر كان لقط المشكلة: العجل قاري فرق في سرعة كل عجلة ... تلات عجلات ماشيين بسرعة 26 - 27 و اليمين ورا مفيش خالص ...
رفعوا العربية و كشفوا ... لقوا طينة كثيفة على السينسور ورا يمين ... فنضفوه و غيروا مكانه ... و عملنا اختبارات زي اختبارات الرالي ... و الحمد لله كله تمام ... المهندش محمد صفا اداني رقم موبايله ... و قال لي إن شاء الله العملية اتحلت و العربية مفيهاش حاجة ... بس اختبر النهاردة و كلمني آخر النهار ... شكرته جدا ... و جيت أحاسب مش راضيين ياخدوا فلوس !!! علما أن الزيارة دي قعدت عندهم بالصيانة بالاختبارات بتاع 3 - 4 ساعات ... و شربوني شاي كمان :) ... بقيت بأتحايل عليهما أديهم فلوس أبدا !!! إيه ده أول مرة أشوف كده ...
المهم روحت و اختبرت العربية بطريقتي :) و الحمد لله زي الفل ... و نسيت تماما اتصل بالمهندس صفا !!! تخيلوا اتصل هو بيا مرتين ... و الموبايل كان صامت ... و تاني يوم الصبح شفته كان الوقت بدري قلت أتصل بيه آخر اليوم ... اتشغلت ... اتصل بيا تاني مرتين ... إيه ده ... في الآخر هو اللي وصل لي !!! و اطمأن و شكرته جدا و قلت له إن دي الروح اللي نفسنا تكون عند كل التوكيلات و إن أنا بصراحة سعيد جدا بالتعامل معاهم ...
بصراحة ... مركز صيانة ... يحل لك المشكلة و يفضل وراها بدون تهرب و بدون "هي كده" و يتصل بيك كذا مرة كأنه هو المستفيد و في الآخر يرفض ياخد فلوس !!! أنا مش عارف أقول إيه ... الناس دي محترمة يا جماعة ... محترمين جدا ... ربنا يجزيهم كل خير ...
بصراحة مقارنة بالتوكيل في صيانة الألف ... المهندس في الاستقبال كان بيتعامل معايا كأني عدوه اللدود ... و كأني بشحت منه الصيانة ... و لطعوني ساعة كاملة عبال ما حد قال لي انت مين و عايز إيه ... و معندناش جهاز ظبط زوايا روح الصحراوي ... و رفضوا يختموا لي دفتر الصيانة و لا يدوني فتورة مختومة !!! ده طبعا غير الداء المزمن: "هي كده" ... و بعد الصيانة تستلم عربيتك و جواها الكيس البلاستيك اللي عليه شحم مطرح الفنيين !!! محدش شاله ... بصراحة و بدون زعل ... التوكيل محتاج يراجع خدمة العملاء في الصيانة ... أنا بأحس إنهم بيهتموا بالعربية أكتر من العميل !!! مهندس الاستقبال يروح يشتغل شهرين في عصام صفا و حيبقى زي الفل ...
و طبعا مع اعترافنا بالامتنان لاخواننا في عصار صفا ... في حاجات ممكن يعملوها تحسن من الدنيا عندهم ... و للأسف بعض الناس لما نقول ممكن تحسن من كذا يعتبره ذم ... لأ طبعا كل حد في مجال يحسن من نفسه عشان يفضل في الطالع و إلا حينزل ...
أولا: استراحة العملاء محتاجة اهتمام و بوفيه و خصوصا لو العميل حيطول (و لو انهم بصراحة بينجزوا آخر حاجة مبتلحقش تقعد )
ثانيا: ملهومش تقريبا تواجد على النت ... لازم يبتدوا يعملوا صفحة على الفيس بوك فيها عنوانهم و لو حد عايز يتواصل معاهم و الأخبار و كده ... و ممكن موقع كمان دلوقت خلاص كله على الانترنت ...
ثالثا بصراحة مش لاقي حاجة ... الناس دول داخلين دماغي جدا ... ربنا يجزيهم كل خير ...
