من عفى واصلح فاجره على الله
عرض للطباعة
من عفى واصلح فاجره على الله
صحيح بس أعتقد لما تسيب حد يعمل كده من غير ما توريله العين الحمرا ( باتكلم على الناس اللى بتقصد تعمل كده مش اللى بتعمل حاجة من غير قصد ) أعتقد أننا لو سبناهم هما هيتمادوا فى اللى بيعملوه
يعنى أخر مرة حصلت معايا حاجة كده كنت فى أسكندرية وفى عربية بيبسى ( 3\4 نقل ) واقفة على اليمين فى ملف أنا داخله لقيته هايبتدى يطلع وهو بيكسر شمال مش عارف ليه مع أن قدامه فاضى, قلبت نور وكلكست ييجى 10 مرات عشان يبطل كسر شمال لحد لما أعدى ومفيش فايدة كسر برضه وكان هيشيلى الجنب اليمين كله ده أسيبه وأمشى ؟؟؟؟؟؟؟؟؟؟؟؟؟؟؟؟؟؟؟؟؟؟
طبعاً لآ
طلعت جنبه و بتكلم معاه قولت يمكن يعتذر بس هيهات هو شايف أنه معملش حاجة غلط وتقريباً ترسخ الأعتقاد ده فى نفسه لما شاف عربيتى ملاكى القاهرة.....يمكن على أساس أختلاف قوانين المرور بين دولتى القاهرة والأسكندرية ؟؟
المهم لقيته بيبلطج ومش هامه حاجة وبيزعقلى كمان رحت طالع من جنبه شوية راح حارق وكسر عليا عاوز يزنقنى ورا عربية
بالذمة دا يتساب ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟ ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟ ؟؟؟؟؟؟؟
كسرت عليه ووقفت عربيتى ونزلتله راح نازل بقلب جامد هو والتباع اللى معاه ( على أساس أنى لوحدى يقى و كده ) بس البيه أول ما لقى عربيتين تانين وقفوا ( أصحابى ) لم نفسه و عمل قطة
السلام عليكم ورحمة الله وبركاته
أفتكر فى فرق بين إن واحد يضايقك عمدا أو إنه يعمل كده من غير قصد
طبعا الحالتين غلط لإن مفروض إن اللى سايق يبقى عامل حساب السيارات اللى حواليه واللى خلفه، الحالة الأولانية: الناس اللى بتتعمد تكسر عليك او تاخد حارتك برضه ممكن يتصنفوا إلى نوعين: نوع مش عارف يسوق صح (جديد مثلا فى السواقة مش عارف إيه الصح أو كبير فى السن وتقديره للمسافات والسرعات ماعدش زى الأول او السواقيين اللى يبقوا داخلين الملف معاك على الواسع وبعدين يخاف العربية تفلت منه يقوم رامى على الضيق) والنوع التانى عفاريت الأسفلت بكل أنواعهم وفى منهم تلاقيه ببدلة وكرافت وشكله محترم ومع ذلك مش راحم نفسه غرز وتزنيق
الخلاصة إن كل واحد فينا مفروض يفكر فى تصنيف السواق اللى ضايقه وبناء عليه يقرر هو هيعمل معاه إيه
الاخ زلاباني 2007لو كل واحد اتحدف عليه او عربية زنقته راح ينتقم يبقى ان شاء الله هنلاقي في الشوارع كل عربيتين بيجرو ورا بعض.ولو كل واحد حصله الموقف دا وجه يحكيه على المنتدى يبقى المنتدى ان شاء الله بعد فترة هايكون كل موضوعاته تافهة.السواقه محتاجة اعصاب هادئة، وليه تتعصب لما حد يحدف عليك مثلا، اكيد وانت بتتعلم السواقة سمعت الكلمة دي: لازم تتوقع اخطاء الاخرين، وبكدة مش كل واحد يقف امامي او يحدف عليه اروح اجري وراه واقول لازم اخد حقي احنا كدة نكون همجيين وهانحول الشارع الى مولد وهو مش ناقض اصلا.ياريت كلنا نهدي اعصابنا ونفوت طالما انه ليس هناك ضرر.
يا جماعة السواقة مش فتونه .... السواقة دوق وفن وأخلاق قبل كل شيئ وكل واحد بيعبر عن أخلاقة من خلال سواقتة
أنا شايف إن الشباب هنا عملة تقول كسر عليه وكسرت عليه ... زنقته ... بيبلطج ...إية يا جماعة هي حرب ...
الأخ الفاضل good_driver
"لو كل واحد اتحدف عليه او عربية زنقته راح ينتقم يبقى ان شاء الله هنلاقي في الشوارع كل عربيتين بيجرو ورا بعض.
ولو كل واحد حصله الموقف دا وجه يحكيه على المنتدى يبقى المنتدى ان شاء الله بعد فترة هايكون كل موضوعاته تافهة"
مع إحترامي الشديد لرأيك في إن الموضوع تافه وان بس ياريت ماحدش يحجر على آراء حد ولا يحكم عليها بإنها تافهه او لا لان احنا هنا كلنا بنعبر عن اللي جوانا وبنحكي اللي بيحصلنا وبنتعلم من بعض حتى لو كان الموضوع تافه زي ماحضرتك بتقول وده مش معناه ان احنا هانقلبه تافه موتورز مش نايل موتورز
بصراحه انا مش دايما بنتقم يعنى لما واحد سايق جنبى يغلط و يكسر عليا مثلا بس غصب عنه ويعتذر طبعا ده يبقى ذوق وكده الموقف يعدى بس للاسف فيه ناس وهما كتير جداا يكسر عليك او يخبطك ويسيبك ويمشى ولا اكنه عمل حاجه وده بقى اللى ينرفز وغصب عنى وبطريقه لا اراديه بعمل فيه نفس الحركه اللى عملها فيا ومابهتمش بقى هوا ملاكى ولا اجره ولا نقل ولا اوتوبيس المهم يعرف غلطته ... من حوالى اسبوعين كنت رايح الشغل وفى طريق الكورنيش اللى داخل على وسط البلد كان فيه واحد ظريف راكب شاهين كان على يمينى كل ما الطريق يقف يكسر عليا علشان يعدينى واستمر على كده حوالى 4 مرات لغايه ماجيت جنبه وقولتله يا استاذ انتا عمال تكسر عليا وهاتخبطنى تخيلوا بقى الظريف من غير مايتكلم بصلى بسخريه واستهزاء وقعد يضحك وجرى بالعربيه وللاسف الطريق علشان زحمه معرفتش اجيبه تانى وده من حسن حظه لانى كنت هاطلعه على اقرب رصيف يركن فوقه
لا إله إلا الله ..... يا جماعة هدوا أعصابكم شوية .... السواقة ذوق وفن وأخلاقاقتباس:
هاطلعه على اقرب رصيف يركن فوقه !!!!
ولإن صبرتم فهو خير للصابرين
مابعرفش اسكت خاصة لو حسيت باستهزاء او اللي قدامي بيستقل بيا
سواء بقي ميكروباص او نقل او تاكسي مش فارقة
اقل فئة عندي بتوع الملاكي معظمهم عارف ان غلطاتهم غلط سواقة مش عمد ومعظمهم بيتاسفوا لما ببصلهم
بصيتله تنح بقت ليلة اللي جابوة اسود من عيشتة واطلعة علية طول الطريق