حل وسط ان الواحد يشتري عمله من مكاتب الصرافه و مش مهم حكايه مضاعفه راس المال دي
عرض للطباعة
حل وسط ان الواحد يشتري عمله من مكاتب الصرافه و مش مهم حكايه مضاعفه راس المال دي
انا اسف لصاحب الموضوع ان الموضوع تحول الى نقاش حول حكم التعامل فى الفوركس
ربنا يكرمك على انك بتتحرى الحلال والحرام وبتجتهد انك توصل للحلال
بس حضرتك ديه مش وظيفتك
يعنى حضرتك لما لا قدر الله بتتعب بتجتهد وتعالج نفسك ولا بتروح لطبيب
يعنى الاجتهاد المفروض يقوم بيه ناس مؤهلين بدراسة علوم قرأن وحديث وتفسير وفقه وكذلك علوم اقتصاد وديه الفتوى الى نقلتها لحضرتك
ديه فتوى مجمع البحوث الاسلامى يعنى بيجتمع علماء من الفقه والشريعه والحديث وعلماء اقتصاد و خبراء اسواق مالية ..... الخ وفى النهاية وبعد نقاشات طويلة بيطلعوا بفتوى انا نقلتها لحضرتك فارجوك لو عندك رد على النقاط الى وردت فيها يا ريت توضحها الرد على كل نقطه وفى الحالة يبقى فعلا التفكير منظقى والردود منظقية
يعنى ان امش جايب فتوى شيخ مسجد او فتوى فرد مهما بلغت قامتة دول مجموعه علماء ذوات مكانة رفيعه جدا كلا فى مجالة اجتمعوا وخرجوا بهذه الفتوى
يعنى العملية مش كوبى وبست وخلاص لازم حضرتك لو حابب تنقل فتوى تكون فتوى مين وايه العلم الى عند الى بيقول الفتوى
وانا فعلا معنديش اى مشكلة لو ثبت ان الفوركس حلال وعلى استعداد لتقبل اى فتوى مخالفة طالما صادرة من جهة معتبرة وفى الحالة ديه هيكون التعامل بالفوركس مختلف ليه بين العلماء وفى الحالة ديه حضرتك ممكن تستفتى قلبك لكن لو الموضوع فيه اجماع للعلماء المعتبرين ومجامع البحوث الاسلامية ويجى شيخ مسجد او موقع الكترونى ويقولوا رأى مخالف للاجماع فدول طبعا رأيهم لا يؤخذ بيه
سؤال ... هو مكسب حضرتك بيجى منين ؟؟؟
يعنى بينتج عن نشاط انتاجى او نشاط خدمى بيستفيد منه اشخاص او جهات معينة وعلى اساسه بيكون ليك هامش ربح ولا الربح بيكون خسارة شخص اخر
فى النهاية اقسم بالله العظيم انى اتمنى ان كلامك يطلع صح ويطلع الموضوع حلال .. بس للأسف المنطق مش بيقول كده
هو بعتذر اولا عن التأخر فى الردود و ذلك لعدم التفرغ فى الوقت ليس اكثر و لكن كل ما اقصده زي ما حضرتك كده جيت فى الاخر و سألت سؤال و انا هجاوبك عليه من عيني حاضر
ده هو المقصود الموضوع يكون سؤال و جواب و للعلم مش من الغلط انى اكون مخطأ بالعكس
و لكن النقاش هيكون هدفه يا تصحيح معلوماتى يا تصحيح معلومات حضرتك و الله المستعان
سؤال ... هو مكسب حضرتك بيجى منين ؟؟؟
يعنى بينتج عن نشاط انتاجى او نشاط خدمى بيستفيد منه اشخاص او جهات معينة وعلى اساسه بيكون ليك هامش ربح ولا الربح بيكون خسارة شخص اخر
مكسبي يا فندم للناس اللى بس مش فاهمه اليه العمل فى السوق ده بيجي من نشاط خدمى و طبعا بيستفيد منه ناس كتيره جدا و اغلبهم مراكز و بنوك ماليه حضرتك تقولى ازاى اشرحلك نظره مبسطه جدا
اولا الفوركس او اى كانت البورصه فهى نظام تعاملى واحد و اللى بينجح فيه و يحقق منه مكاسب مش الانسان اللى بينجم و يقول ده طالع و ده نازل و لا الكلام ده بالعكس
عشان نحلل مثلا سهم ما او عمله ما لازم اتبع علم و دراسه اسمها التحليل المالى و التحليل الفنى و التحليل الاساسي
و بعد ما اقوم بالتحليل ده بناء على دراسه و خبره فى المجال اطلع بنتيجه للسهم ده او العمله و قابله طبعا للصواب و الخطأ و برده ممكن حضرتك تقولى ده اسمه تنجيم
اقول لحضرتك بالعكس انا معتمد على الماضي و على ان التاريخ بيعيد نفسه يعني اساس البناء و التحليل ليا من الماضي من حاجات حصلت بالفعل و انتهت
زي مثلا ما نقول فى اتفاقيه للجات هتطبق بعد 10 سنين يبقى طبيعي اسعار العربيات هتقل بعد 10 سنين
طيب مثلا فى شكل جديد نزل لموديل ما من السيارت يبقى فى احتمال بنسبه كبيره ان الشكل القديم هيقل فى سعره لو الجديد ثبت كفاءه
ده بالنسبه لطريقه العمل بصوره عامه اما عن الموضوع الخدمي فبسهوله اقول لحضرتك
ان تحليل اتجاه عمله ما و ليكن الدولار مثلا ده بيأثر على حضرتك شخصيا فى الاستيراد
فى سعر صرف الذهب اللى حضرتك بتشتريه
فى سعر برميل البترول اللى حضرتك بتستورده
يعني لو قلت لحضرتك كمثال بناء على تحليلى ان الدولار فى هبوط و ده معناه ان الذهب و البترول هيعلوا و معناه برده ان السلعه اللى داخل جماركها بالمصري هتقل
يبقى حضرتك كشخص اهوه لو مستورد هتأجل استيرادك عشان تستفاد باتلفرق فى الجمارك
و لو عايز تشترى دهب هتشترى اسرع عشان تستفيد من فرق السعر و توففر مبلغ ممكن يفيدك فى شيء اخر
طب ما تحسبهالى كده بالنسبه بقى للبنك المركزى المصري !!!!!!!!
و انا على اتم استعداد انى اشرح اليه العمل و بدايات الفوركس من الالف للياء فى المنتدى لرجاله نايل موتورز فقط و مجانا من غير اى مقابل
نرجع لنقطه الحلال و الحرام
اولا انا بقدم شغل ما بيفيد ناس تانيه و انا بستفاد منه و بكسب و مش معنى انى كسبت انى غيرى خسر ده مقوله غلط تماما
مثال : لو حضرتك بتبيع عربيتك ب 100000 جنيه و انا معايا 150000 جنيه و انا اشتريتها منك بعد الفصال ب 98000 معنى كده انى خسرتك ؟
و لا معنى كده ان حضرتك كسبت مبلغ اقل فقط ؟ و انا وفرت مبلغ اكتر ؟
لكن مش معنى كده انك خسرت عشان انا اكسب و لا قدر الله اخدت مكسبك منك و لا رزقك لا سمح الله
و بعدين التجاره من ايام الرسول صلى الله عليه و سلم و هى مكسب و خساره
و ده طبيعي فى اى سوق ان فلان يخسر و فلان يكسب و بعدين مين اللى لما انا كسبت خسر قدامى حضرتك حددهولى و لو كان فى اخر بلاد العالم
و بالنسبه للفترى اتفضل ياباشا
Hotfile.com: One click file hosting: FOREX.ZIP
انا اتشرفت بالنقاش مع حضرتك وتقريبا انا قلت الكلام الى اعرفه وربنا يوفقك للخير
ناس كتير ما تعرفش الفوركس وناس تسمع عنه بس فياريت بما ان معانا اثنين من الاعضاء شغالين في شركات فروكس ممكن تبلغونا لو في سيمليتور او كورس مجاني في الاسكندريه للفوركس ممكن نستفاد منه
كمان انا كذا مرة احاول اجرب برنامج ميتاتريد للحساب المجاني بس مش بفهم منه حاجه بصراحه
اللهم امين يا رب
عموما ياباشا انا معاك فى النقاش لابعد الحدود و الله المستعان و انا بجد اتشرفت بالنقاش معاك
ودي و تقديري
و الله عايز اقولك ان فى ناس كمان لما تقولها فوركس يقولك هاته من الصيدليه :majd(4):
عموما السيمينارات بتكون اغلبها فى القاهره مش فى الاسكندريه و برده من المفترض انه هيقام معرض ترند الدولى اللى بيقام كل عام فى مصر ان شاء الله فى شهر 11 لو محصلش فى البلد اى قلق
لو تم اقامه المعرض هاوعد نايل موتورز و اعضاءها بسيمينار خاص على شرف المعرض ان شاء الله تعالى
و برده انا معاكم هنا يا شباب للى محتاج اى استفسار او اي سؤال و الله المستعان
استاذ soly ايه اللي حضرتك محتاج تعرفه بالظبط عن الفوركس؟؟؟؟ يعني حضرتك مبتدأ ولا عايز تعرف حاجات advanced اكتر وعلى فكره السيمنارات مش هتفيدك بحاجه مش هتزود معلومات انا انشاء الله احتمال انزل اسكندريه قريب لو نزلت اتمنى اتشرف نقعد مع بعض اعرف حضرتك كل اللي انت عايزه.....ولو حضرتك في حاجه معينه عايز تسأل عليها اتفضل في اي وقت وان شاءالله انا والأستاذ حماده نفيدك :)
طيب و الله يا استاذ عمرو ايه رايك لو نعمل يوم فى اسكندريه و يوم فى القاهره و نقابل كل المهتمين بالمجال ده
و نقعد معاهم قاعده وديه جدا من غير و لا سيمينارات و لا حاجه بالعكس تبقى قاعده تعارف اكتر
على الاقل نعمل تعارف5 ودي بين الاعضاء و نفيد بعض ؟
فكر و رد عليا
انا موافق و معنديش اي مانع.....نظبط ونشوف الناس اللي عايزه تيجي ونعمل الموضوع ده
معاكم يا باشا في اللقاء ده
أي يوم خميس أو جمعة