تيداوي قريب جدا ان شاء الله
السلام عليكم
انا ان شاء الله نويت على نيسان تيدا بعد حيرة كبيرة و لف كتير و سماع كلام كتير و فتاوي اكتر :d
اولا انا احب اقول العربية عجبتني ليه
اولا طبعا شركة نيسان دي اول حاجة و الي ناس كتيرة متعرفهاش كويس بسبب متطلبات السوق و تحكم التجار فيه
تاني حاجة كنا بندور على عربية تعيش و تدي كل حاجة عندها مهما حصل فيها و الميزة دي في الياباني و الالماني (بس الالماني حراق حبة ^^ )
لانسر؟ مش بستريحلها نفسيا , مازدا؟, ناس كتير قالولي لا بسبب قطع الغيار و و و , صني ؟ مش قادر اتقبل شكلها مع احترامي ليها كعربية و احترامي لملاكها بس دي اذواق
و انا بقلب في النت قابلت نايل موتورز و شفت المواضيع الي عن التيدا و اعجبت بيها بس مش عارف ليه شكلها معجبنيش * يمكن عشان مشفتهاش عالطبيعة* بس قريت كل المواضيع عنها و حبيتها جدا بس محطتهاش في دماغي و انا بلف عالعربيات
المهم رحت المصرية للسيارات بتفرج فا ورانا لانسر و اوبترا و افيو و كروز بس لا سيبك انتا دا كلو فاكسو فا قلنلو احنا عايزين عربية هاتشباك مواصفاتها كزا و كزا و كزا , قالنا طيب انا عندي نيسان تيدا جوا , احنا مشفنهاش من الاول عشان كانت جوة كدا في حتة مستخبية , المهم رحت شفت العربية و عجبتنا مع ان الاريال كن مكسور و متربة اوي , شكلها كانت مركونة عندو من فترة فا انا قلت خلاص اخش ع نايل موتورز تاني و اشوف كلام الناس ايه , و بردو استفدت كتير و استفدت من الجروب عالفيس بوك كتير الحمد لله , اعضاء قسم نيسان بجد ناس ما شاء الله على خلق و بيمدو ايد العون لاي حد جزاكم الله كل خير ^_^
و لما شفت العربية عالطبيعة لقيت ان شكلها مش زي ما كنت متخيل هيا لذيذة اوي الصراحة ^^
اهم حاجة كنت بدور عليها الامان و لقيتو في التيدا الحمد لله , خامات و تقفيل نضاف جدا ما شاء الله و ماتور قوي , واسعة من جوة بزيادة ودي حاجة حلوة و فيها اوبشنز كويسة و فتحة سقف و دي كانت حاجة مهمة جدا ملقتهاش في العربيات الي في فئتها
و ان شاء الله اول ما اجيب العربية باذن الله اعملكو تقرير متواضع و دا اقل حاجة اقدمها للمنتدى اللي انا استفدت منو كتيير جدا
بس كنت عايز التيداوية ينصحوني بقا اتعامل مع العربية ازاي مع العلم اني سواقتي مش طايشة هادي عالطريق و التيدا هتبقا اول عربية ليا فا لازم اخلي بالي منها و احطها ف عنيا طبعا ^^
بجد تحياتي لمنتدى نايل موتورز اللي مجاش اسمو من فراغ بل تالق بفضل الله ثم بتعاون و اخلاص و مجهود اعضائه الكرام