انبطاعى عن نيسان بلوبيرد سيلفى فى ال40 الف كيلو
السلام عليكم ورحمة الله وبركاته..
حبيت أكتب وانقل لحضراتكم صقور النيسان تجربتى لسيارتى نيسان بلوبيرد سيلفى وأوفى ذلك فى تقرير أرجو أن ينال إعجابكم رغم أن هذه أول مرة اكتب فيه موضوعا أو تقريرا..
ولا أخفى عليكم أن هناك من شجعنى على ذلك ، وهو ليس ببعيد عن خاطركم هو كبير الصقور الأستاذ أحمد مصطفى .. فقد كنت راسلته فى استفسار عن صيانة سيارتى البلوبيرد ففوجئت به فضلا عن قيامه بإجابة استفساراتى يقوم بالتوصية عليّ فى التوكيل رغم عدم طلبى ذلك منه وذلك ليس بالجديد عليه فيما يقدمه لكل عضو من أعضاء القسم لا يطلب مقابله شئ و يفعله بطيب خاطر.. فجزاه الله عنا خير الجزاء.
ولنكمل الحديث عن البلوبيرد: سيارتى اشتريتها مستعملة موديل 2009 كانت عاملة 30 ألف سوداء اللون العربية طبعا يابانى بس التقفيل فى الصين - ومحدش يعقب على حكاية التقفيل دلوقتىأنا لسه هرد تحت فى التقرير.-
- التصميم الشكل الخارجي :
هو أول ما شدنى وجذبنى إليها فهو تصميم رائع ومميز تقف أمامها وتشعر بفخامة الانفنيتي من ناحية خطوطها الخارجية وبفوانيسها الجميلة الأمامية والخلفية وهى مجهزة بمصابيح الضباب الأمامية و الخلفية و حساس ركن خلفي صوت من غير شاشة وكذلك بجنوط سبور مقاس 16 وطبعا ده كله فى صالح الشكل العام
- المقصورة الداخلية ( الصالون):
صالون العربية شديد الرحابة (واسع جدا) والكراسى كلها فرش جلد طبيعى ومريحة جدا سواء كرسى السواق أو الراكب الأمامى أو الكنبة الخلفية والسقف عالى يعنى الطوال مش هيلاقوا أى مشكله
وتابلوه العربية تحس فيه بالفخامة مع بساطة التصميم و ايضا جودة الخامات وطبعا جمال الابنوس المطعم بيه التابلوه والأبواب ، عجلة القيادة قابلة للتعديل، والمرايا الجانبية كهربا بس مش ضم ,وزجاج العربية كهربائي أمامي و خلفي وفتح الشنطة وتنك البنزين من الداخل وبرضه ممكن تفتح الشنطة من الريموت... وفيها تجهيزات داخلية للأمان زى وسائد هواء للسائق و لراكب الامامى، وشباك السواق فيه خاصية الإرتداد التلقائي عشان ما يقفلش الازار على صباعك مثلا، وفيها نظام مضاد للسرقة لمنع تشغيل المحرك إلا بالمفاتيح الأصلية، وده طبعا غير أنظمة الفرامل abs,ebd , ba اللى فعلا بتحس فيها بأى موقف صعب.
.... وطبعا هنا هيجو بتوع التقفيل الصينى ويتكلموا، وأنا هرد عليهم دلوقتى
وأقول لو اى حد منهم دخل وركب العربية من غير ما يعرف حكاية التقفيل الصينى ده عمره ما هيفكر لحظة إنها متقفلة بره اليابان .. ده كمان ممكن يفتكر إنها متقفلة فى ألمانيا أو أى حتة فى اوروبامن جودة التقفيل والخامات اللى هيشوفها.
وأزود على الكلام ده إنى ليا أخ معاه فولكس بولو سيدان وكانت نزلت فترة كده وبطلت وكانت برضه متقفلة فى الصين ولما تركبها متحسش بأى فرق بينها وبين أى عربية فولكس تانية متقلة فى بلدها.. لأن مفيش أى شركة محترمة هتاجر فى سمعتها واسمها وتقلل منه.
- بالنسبة لصندوق الأمتعة (الشنطة):
عكس ما ممكن تتوقع أن وسع الصالون يكون على حساب الشنطة فالواقع أن الشنطة واسعة جدا وعملية وزى ما بيقولوا حمالة أسية شيل فيها اللى انت عايزه.
- التكييف:
هو زى كل عربيات نيسان ثلاجة ومش هقول أكتر من كده .
- النظام الصوتي للسيارة :
هو جميل جدا فيها راديو كاسيت am/fm و cd و 4 سماعات اثنين قدام واثنين فى الخلف.
- تجربة القيادة:
زى ما قلت سابقا أن كرسى القيادة مريح جدا وعمرك ما تتعب منه وكل ساقها قال الكلام ده ومن أخويا الأصغر وهو طالب فى الجامعة وغاوى يركب عربيات كتير سواء عربيات أى حد من الاهل أو حد من صحابه وكنت بعته مشوار من الاسكندرية للقاهرة خد فيه العربية وقالى أنه أول مرة ما يتعبش من القعدة فى السواقة رغم السفر رايح جاى وزحام القاهرة.
عند بدء تشغيل الموتور تكاد لا تسمع صوته، وساعات كتير يكون عمال الجراج الى حاطط فيه العربية يشغلوا العربية الصبح عشان تسخن عقبال ما اجى وأنا اركب وعشان طبعا هدوء صوت الموتور افتكر العربية مطفية وهوب ادور وطبعا افوجئ إنها دايرة.
والعربية لا يوجد بها مقاس تدريجي لحرارة مياة تبريد المحرك و لكن لمبة زرقاء للبرودة ولمبة أخرى حمراء للسخونة الزائدة , قد يمثل ذلك عيبا ولكننى تعودت عليه.
والعربية ارتفاعها عن الأرض حلو يعنى عمرها ما تحك فى مطب إلا مرة واحدة كانت محملة ورا وقدام يعنى خمس أفراد وكمان الشنطة كانت مليانة شنط سفر وكانت الحكة بسيطة.
الدريكسيون الباور بتاعه جميل وسلس بيتقل على السرعات العالية.
نيجى بقى لسحب العربية أو زى ما بيقولوا التسارع فهو سحبها جيد جدا ومتحسش فى فرق كبير بينها وبين العربيات المانيوال بحكم إن قبل كده كنت بسوق مانيوال.
والسحب لا يتأثر بتشغييل التكييف.. وأقصى سرعة جبتها بيها وكانت على الصحراوى 175 وكمان بالتكييف وكانت الحمد لله ثابتة ومتحسش جواها بالسرعة العالية وعزل الصوت بيكون كويس لحد 140 وبعد كده بتبدأ تحس بصوت الهوا بره بس طبعا على خفيف كده.أما أخويا الأصغر فهو قالى إنه جاب بيها 200 وكانت ثابتة معاه.
وبالنسبة لصوت الموتور والعربية ماشية فهو صوته هادى زى ما قلت لكن وقت اللزوم لما تحب تشد أو ازنقت تسمع صوت رياضى قوى تحب تسمعه زى صوت عربيات السبق ، وكمان لما تزود فوق الـ 120 تسمع برضه صوت الموتور بس هتلاقيه صوت محبوب من غير نشاز والموتور أنا نسيت أقول إنه هو نفس موتور التيدا واللى معاهم التيدا هيعرفوا معنى كلامى.
- العفشة :
جيدة جدا مع النعومة الواضحة وتحس بالكلام ده اكتر طبعا مع المطبات لإنها ما تهبدش فى المطبات وزى ما قلت قبل كده إن ارتفاعها وعلوها كويس وده كله ما بيأثرش على إتزانها وثباتها.
- استهلاك البنزين:
الاستهلاك كويس بالنسبة لعربية اوتوماتيك وبرضه بحكم إنى كنت بسوق مانيوال.
أرجو أن يكون تقريرى قد نال إعجابكم وده من خلال تجربتى للعربية من وقت شرائها حتى الآن وهى دلوقتى عاملة حوالى 40 ألف.
والمرة الجاية هتكلم إن شاء الله عن صيانتها فى الـ 40 ألف .. واعذرونى إن كان فيه أى حاجة ناقصة عشان دى أول مرة زى ما قلت ... وأى سؤال أو استفسار أنا تحت أمركم...
وتقبلوا تحياتى