انا نازل اسكندرية في دعوة لمكتبة الاسكندرية ، وكنت عايز ازور كارفور ، فلو ممكن حد يقولي المواصلات المناسبة من المكتبة لكارفور ؟!! ويديني نظرة عامة عن خط المواصلات والترام لو أمكن يعني !
عرض للطباعة
انا نازل اسكندرية في دعوة لمكتبة الاسكندرية ، وكنت عايز ازور كارفور ، فلو ممكن حد يقولي المواصلات المناسبة من المكتبة لكارفور ؟!! ويديني نظرة عامة عن خط المواصلات والترام لو أمكن يعني !
^
^
^
^
تاكس من المكتبة لكارفور يقضى الغرض عشان مفيش مواصلات مباشرة من المكتبة لكارفور ( للعلم كارفور الشارع اللى بعد المكتبة ع طوول بس مسافة محترمة لو فكرت بس فكرت تمشيها )
ماشي يا باشا تشكر علي الرد ، بس ليا سؤال تاني لو عايز اروح المعمورة من المكتبة برضه لو خدت تاكس ياخد كم وهل في سرفيس ولا لا ، وهل هينزلني قريب من بوابة شاطئ المعمورة ؟
المعمورة من المكتبة سهلة جداااا
اول حاجة تطلع من المكتبة و تمشى ورا كانك رايح محطة الرمل ( مسافة صغيرة ) حتلاقى اشارة اقف عندها و اى مشروع قولو المندرة ( الاجرة معرفهاش كام بس ف حدود 1.50 تقريبا ) و من المندرة مشروع ابوقير و قولو عند البوابة اللى عند المزلقان انزل حتلاقى بنزينة بعد القطر (خلى البنزينة ع شمالك) و طول ف الشارع ده قدامك بوابة المعمورة ( وممكن تلاقى مشروع ابن حلال و يقول ابوقير ع طول )
المواصلة التانية ف اوتوبيس يدخلك المعمورة وش مكتوب علية معمورة الشاطئ لو لقيتو يبقى حظك حلو :)
المواصلة التالتة
لو م لقيتش مشروع المندرة و قالك الساعة بيس ( بس انت و حظك ممكن تركب للمندرة و بعدين تركب ابوقير او من فيكتوريا لابوقير) اركب و ينزلك عند فيكتوريا و من فيكتوريا اركب ابوقير و ينزلك برضو عند المزلقان
نصيحة اوعى تاخد تاكس م المكتبة لابوقير حتعد جامد:)
يا باشا والله انت زوق وزي الفل ، تسلم ايديك ، بس معلش اسمحلي ازودهم واسالك سؤال زيادة ، بالنسبة لجرين بلازا من محطة الرمل ، ايه الدنيا التاكسي هيشيلني جامد ولا في مشروع ؟
بص من محطة الرمل اركب ترام رقم 2 اللى هيا النصر و قول للكمسرى انزل سيدى جابر (لو مالقيتش اركب الترام الصفر بس اتاكد انها سيدى جابر المحطة سيدى جابر المحطة مش الشيخ عشان فى مسافة بينهم محترمة )
حتنزل سيدى جابر حتلاقى كوبرى مشاة بسلم كهربا اطلعو و عدى الناحية التانية حتلاقى كبدة فهمى ع شمالك و فى نفق تحت القطر انزل النفق و اطلع منو امشى ع الشمال شوية حتلاقى موقف اوتوبيسات قولو جرين بلازا حيقولك اوتوبيس اركبو و قولو انزل عند جرين بلازا حينزلك قدامو بالظبط
المشوار كلو 75 قرش :)))
.25 ترام
50 اوتوبيس :))
تقلت عليك معلش ، بس فعلا اثبت ان الاسكندرانية اهل شهامة ، الف شكر
ولا تقلت ولا حاجة احنا اخوات حبعتلك رقمى ع الخاص عشان لو فى حاجة تكلمنى
و اى خدمة