الموضوع: فيرنا

تقرير سريع عن الفيرنا بعد 32000 كم -فيرنا 2010 -
أولا الموتور:
الموتور لا زال بنفس الكفاءة نشيط جدا وصوته هاديء جدا على السرعات المنخفضة ما تحت ال 140 كم اما ما بعد ال 140 كم فيبدأ صوته في الارتفاع بس هيعجبك صوته المرتفع يعني
لا يتأثر أداء الموتور بالتكييف إلا على النقلتين الأولى والثانية ومع النقلة الثالثة لا تشعر بوجود التكييف مطلقا حتى تأثيره على النقلتين الأولى والثانية يعتبر شبه غير ملحوظ

*العفشة:
عفشه طرية مريحة جدا في المطبات وفي مطبات الهواء تشعر بارتفاع بسيط وانخفاض بسيط عن الطريق
لا أنكر أنها تعجبني لكنها لو كانت ناشفة شوية بحيث تزود الثبات كانت تبقا أحلى طبعا

*الثبات:
العربية ثابتة جدا وانت لوحدك لحد 110 كم والمناورة رائعة جدا
لما تركب ناس معاك في العربية ترتفع قدرة العربية على الثبات والمناورة لحد 160 كم
انا ركبت 6 افراد في العربية وكنت ماشي 150/160 وكنت بغير بالحارتين مرة واحدة وبلعب وسط العربيات ودا شيء جيد جدا
*انا جايب بالعربية 180 -اقصى سرعة جبتها عشان ملقيتش طريق كويس اعرف اقفل عليه العداد - وكانت مقبولة- ودا كان بالتكييف كمان

*ارتفاع العربية:
ارتفاع العربية عن الارض للموديلات 2010 وما يليها جيد جدا
هتلاقي ان العربية بقت أعلى وكمان الشكمان بتاعها اترفع ودا بيديلها ميزة في المطبات وهتاخد مطباتك بصورة مباشرة جدا حتى وانت محمل العربية كل اللي هتحتاجه بس انك تاخد المطب بالراحة بس ليس الا

*الفرامل:
فرامل السيارة ليست سيئة للغاية ولكنها أيضا ليست ممتازة للغاية لكني يمكن أن أعطيها تصنيف 6/10
يمكنك جعلها أكثر كفاءة مع عدم الضغط على دواسة الدبرياج أثناء استعمال الفرامل مما يجعل الموتور يستخدم الفرملة الاوتوماتيكية مما يقلل من مسافة التوقف
وكذلك بعدم الضغط على دواسة الفرامل بالقدر الذي يقوم بعمل انغلاق تام للفرامل وبالتالي العربية تزحف معاك ودا بيزيد من مسافة التوقف أولا وبيقلل من ثباتها لو حبيت انك تغير حارة ثانيا وهيخلي العربية تخمس معاك -أي انك تقوم بنفس وظيفة ال abs لكن بطريقة يدوية وليست الكترونية-

الصيانات:
مكلفة في التوكيل طبعا لكن خارج التوكيل مش مكلفة مطلقا لأن اي ميكانيكي بيفهم فيها وتكاد السيارة تكون عديمة الأعطاء لو عملتلها صيانتها في الوقت المناسب وحسب جدول الصيانة

*الاعتمادية:
سيارة الخدمات الشاقة والمسافات الطويلة المباشرة دون توقف ولا تقلق مطلقا فهي قادرة على قطع أكبر المسافات دون توقف وثق أن الموتور سيكون سعيدا بمثل هذا الاختبار ولن يرفض مطلقا ان يعطيك الأداء الأمثل

*الكماليات:
السيارة فقيرة للكماليات للأسف وتقفيل العربية بمواد رديئة للأسف أيضا اضافة للأسوات العجيبة اللي هتسمعها من الصالون جوا واللي للأسف التوكيل نفسه مبيعرفش يحلها !

لو تحب تسأل على حاجة تانية قول!
على فكرة بالنسبة للثبات والفرامل انا بتكلم عن العربية بالكاوتش النسر اليي هي جاية بيه لأني لسة ماشي بيه وعامل بيه ال 32000 كم وشايف انه كاوتش رائع بعكس ما الناس بتوصف فيه بس طبعا هو مش الأفضل