نفخ من فتحة تزويد الزيت

**khaled_sabry** · 27-09-2011 09:40 AM

السلام عليكم و رحمة الله و بركاته
ياريت حد يساعدنى فى المشكله دى
عربيتي تيوتا كورولا 1978
هى المكنه بتاعته حالتها معقوله فى الاداء
بس الناهرده الصبح لاحظت ان فيه نفخ شديد من فتحة تزويد الزيت و بيزيد النفخ مع زيادة البنزين
انا كنت عارف ان النفخ ده موجود من زمان بس ماكنشى بالشده دى

انا عارف ان ده من اعراض المكنه لما تكون خفيفه بس مافيش دخنه بيضاء و العزم معقول و الزيت مش بينقص الا بمعدل قليل اوى (يعنى نقص 2 او 3 مم على المقياس بعد سفر رايح جاى لأسيوط 400 كم ) و درجة حراره الموتور بقيت تسخن اكتر شويه عن زمان
انا مستخدم بوجيهات سن طويل و مش بحط زيت شنبر و لا حاجه بس بستخدم زيت شل الاحمر

فهل ممكن يكون النفخ ده بسبب حاجه تانيه غير ان المكنه تكون خفيفه ؟؟ هل ممكن يكون جوان وش السلندر اتقطع مثلا و خلط فتحات العادم مع الزيت ؟؟؟ و لو صبرت على الوضع ده هل فيه خطوره لأنى بسافر بيها و الحاله الاقتصاديه مزنقه شويه اليومين دول

**aYaBooY** · 27-09-2011 12:00 PM

ديه ظاهرة نفخ مش موتور خفيف
و ديه سببها عيب في جوان وش السلندر مش اكتر
و غالبا عندك الخلل بين غرفة الكبس و دورة الزيت علشان كدة حاسس بكبس الموتور من فتحة تزويد الزيت
حصلت عندي من فترة بس كانت بين غرف الكبس و دورة المياه و كانت النتيجة ان الريدياتير فرقع منه علبة
انصحك تعملها في اقرب وقت علشان ممكن الموضوع يطور شوية و يوصل لشرخ في البلوك
و خلي بالك من الحرارة علشان كدة منظومة التبريد مش متكاملة

**ahmedfd** · 27-09-2011 12:19 PM

أعتقد في رأيي إن دي أعراض إن الموتور خفيف و سبب النفخ ده إن السلندرات وسعت و أصبحت غير محكمة على البساتم يعنى بقى في خلوص بينها و بين شمايز البساتم و بالتالي ضغط غرفة الحريق فوق البستم و خاصة في شوط الإنضغاط بيتسرب لكارتيرة الزيت و منها لفتحة تزويد الزيت، و الدليل إن مع زيادة البنزين تسريب الضغط بيزيد و بالتالي التنفيث بيزيد من فتحة تزويد الزيت.
عملية حرق الزيت و خروج دخنة من الشكمان ربما تكون مرحلة متقدمة شوية عن اللي عندك و اللي بيحصل إن الشمايز مش بتكشط الزيت كاملا من سطح السلندر أثناء حركة البستم نتيجة عدم إحكامها و بالتالي الزيت اللي فاضل ده بيتحرق و يخرج من صمام العادم و منه للشكمان.

**khaled_sabry** · 27-09-2011 12:55 PM

المشاركة الأصلية كتبت بواسطة ahmedfd

أعتقد في رأيي إن دي أعراض إن الموتور خفيف و سبب النفخ ده إن السلندرات وسعت و أصبحت غير محكمة على البساتم يعنى بقى في خلوص بينها و بين شمايز البساتم و بالتالي ضغط غرفة الحريق فوق البستم و خاصة في شوط الإنضغاط بيتسرب لكارتيرة الزيت و منها لفتحة تزويد الزيت، و الدليل إن مع زيادة البنزين تسريب الضغط بيزيد و بالتالي التنفيث بيزيد من فتحة تزويد الزيت.

مع احترامى لرأيك بس ان النفخ يزيد مع زياده البنزين مش شرط يكون متسرب من غرفة الحريق ممكن يكون متسرب من فتحات العادم من خلال جوان وش السلندر زى ما قال aYaBooY
هل حد عنده اختبار اقدر افرق بين الاتنين
علشان لو رحت للميكانيكي و قولتله حل وش السلندر ده فيها يوم كامل و حيتغير الجوان حتى لو كان سليم فى الاول و خساره اضيع اليوم و الفلوس و الجوان لو كان الجوان سليم اصلا

**ahmedfd** · 27-09-2011 02:00 PM

و الله هو كلامك في منطق طبعاً و ممكن يكون الصحيح. طيب ممكن تقولنا على عرض تاني يساعد.. هل النفخ ده له لون دخنة يعني ولا بدون لون؟
طبعاً إنت فاهمني يعني لو لون دخنة غالباً معنى كدة إن في زيت محروق و في الحالة دي ممكن يكون جاي من الكارتيرة تحت زي ما أنا قلت في الأول و لو مالوش ممكن يكون تحليلك هو الأصح.
طبعاً لازم مكانيكي شاطر هوا اللي يحدد في الآخر و في جميع الأحوال أتمنى يكون الموضوع بسيط بإذن الله.

**aYaBooY** · 28-09-2011 01:18 PM

بص يا معلم خالد
لو الموتور خفيف يبقي لازم ( لازم لازم ) يكون فيه دخنة و مكان الدخنة بيدل على مرحلة الخفية الي فيها الموتور
يعني اول مرحلة انه يجيب دخان من الفايز و من فتحة تزويد الزيت ( علشان تقريبا مفيش فرق بينهم )
تاني مرحلة مع الدخنة الاصوات تزيد شوية و صوت التكيهات يعلى علشان ضغط الزيت قل
3 مرحلة يزيد دخان رمادي ( مزرق ) من الشكمان مع الكبس
4 مرحلة دخان مستمر من الشكمان و ديه النهاية
لو انت في اول مرحلة بيقى انت في الاحتمالين
لو انت في تاني او تالت مرحلة يبقي ممكن عيب موتور
لو الموتور عندك مفيهوش دخنات يبقي الموتور كويس و ده عيب جوان
و في الاخر اتمنى حد يفيدك اكتر مني علشان كل ده اجتهاد مني

**essamenen** · 28-09-2011 02:14 PM

انا عندى نفس موضوع النفخ ده بس انا عارف ان الماتور ابتدى يخف بدليل لما اكون جاى من مشوار 100 ك مثلا يظهر دخنه خفيفه عند الضغط على البنزين عند سرعه 4000 rpm ولا تكون الدخنه موجوده على السلاتسيه وايضا الزيت بينقص كل 2000 ك 2 ملى تقريبا
مع احترامى لكل الاراء موضوع وش السلندر امر مستبعد او احتمال بسيط

**mrastra** · 28-09-2011 03:02 PM

العيب عندك فى جلد الصبابات

**khaled_sabry** · 28-09-2011 05:28 PM

المشاركة الأصلية كتبت بواسطة mrastra

العيب عندك فى جلد الصبابات

جديد الاحتمال ده ... طيب و لو طنشته الفتره دى فيه خطوره ؟؟؟

**aYaBooY** · 28-09-2011 05:38 PM

موضوع جلد صباب او اويل سي صباب
لو موجود كانت العربية اول الضوارة الصبح تفضل تدخن دخان ابيض كثيف لحد ما تسخن و بعد كدة الدخنة تروح

الموضوع: نفخ من فتحة تزويد الزيت

LinkBack

أدوات الموضوع

عرض

-

-

-

-

المواضيع المتشابهه

تيدا هاتش باك فتحة سقف ولا اوبل كوسا 2012 هاي لاين فتحة سقف

رواسب غير نظيفة في فتحة تغير الزيت

تزويد المياه

ما ضرر خروج البخار من فتحة الزيت

الكلمات الدلالية لهذا الموضوع

المفضلات

المفضلات

ضوابط المشاركة