شراء لادا مستعملة

**MGB** · 02-10-2011 05:39 PM

السلام عليكم
انا جديد تماما فى موضوع السيارات و معلوماتى عنها قراءة من المنتدى فقط:
فكان عندى سؤال بسيط بالنسبة للادا الروسى (لانى ناوى اشترى واحدة مستعملة ان شاء الله)
فى واحد معرفتنا قالى فى لادا روسى 2009 كويسة و لونها فضى , و لسة حشوفها بعد يومين ان شاء الله , فكان سؤالى هل فى لون فضى فى اللادا الروسى , معظم الالوان اللى شفتها يا ابيض يا نبيتى , فانا خايف تكون مرشوشة او حاجة
ثانيا لو حد عنده نصيحة اما افحص العربية , بمعلومات مبسطة كده يبقى تمام , لان كل خبرتى فى السواقة 4 مرات على تاكسى و فى الميكنايكا معلوماتى عنها زى معلوماتى عن اللغة الصينى بالزبط
و الف شكر مقدما

**a7madramadan** · 03-10-2011 03:38 AM

مافيش لادا 2009 روسي فضي .... 2009 روسي بتكون بيضاء و زيتي غامق و نبيتي غامق و ازرق غامق جدا مش عارف اوصف درجة اللون بالظبط ... و كلها ألوان عادية مش ميتاليك ..... العربية المعروضه عليك والله أعلم تقفيل مصري .... هتلاقي الإكصدام الروسي بلاستيك اسود و فيه شريط كروم في حين المصري بيكون ألومنيوم وفيه شريط كاوتش فالمنتصف .... المصري كراسيها الأمامية متدورة يعني من منطقة الرأس بتكون على شكل نصف دائرة في حين الروسي بتكون مستطيلة ... المصري بتيجي بكاسيت راديو والسماعات الخلفية محطوطة في بوكسات سوداء... الروسي هتلاقيه يا إما مافيهاش كاسيت خالص يا اما متركبلها كاسيت من السوق أيا كانت ماركته نظيف او رخيص ... الروسي بتنزل انجيكشن فقط .. المصري بتنزل كاربيراتير فقط ... اسأل فيها ميكانيكي خليه ياخدله بصه عالسريع عالعربية هيقولك كاربيراتير ولا اينجيكشن .... ربنا يوفقك في شراء العربية الي تريحك ...

**a7madramadan** · 03-10-2011 03:44 AM

بالنسبة لفحص العربية ... شغل العربية بص على عداد الــ rpm لازم يكون 7600-8000 لفة ... و مايكونش بيتهز .... العربية تكون ثابته تماما ... الموتور يكون دورته ثابته مافيش رجرجات مفاجئة تدوس على البنزين العربية ما تتهزش جامد و الصوت مايكونش فيه خرفشات حديدية او بالعربي كده أصوات مرعبة من الموتور ....

و تشوف بعينيك العربية في كل الأماكن الي متدارية الى حد ما مايكونش فيها اي آثار للصدأ أبدا ... و يـــــــــاريت يكون معاك سمكري محترم يقولك لو العربية سبق وعملت حادثة ولا لأ .... و حبذا لو معاك ميكانيكي يديلك رأي محايد في حالة العربية ...

ربنا يوفقك ان شاء الله

**engaass** · 03-10-2011 05:47 PM

مفيس لادا روسى فضى

**mirra** · 03-10-2011 08:03 PM

الالوان الميتاليك بما فيها الفضى نزلت فقط فى موديلات 2011 و قبل ذلك كانت الالوان عادة فقط.

**a7madramadan** · 04-10-2011 12:33 AM

إلى الأخ العزيز mirra مافيش 2011 ولا 2012 حتى ألوان ميتاليك روسي .... الي انته شايفها دي مصري سيبك من الإكصدام .. انا متأكد من كلامي انا كنت باحسب كده زيك واكتشفت ان المصري حطولها نفس اكصدام الروسي . بس كاربيراتير و في اوبشن انهم يركبولك انجيكشن فالتوكيل .. و طبعا بكاسيت و سماعات خلفية و الكراسي الأمامية متدورة مش مستطيلة من فوق ... و ذراع تحريك ظهر الكرسي فالمصري على شمال الكرسي للسائق ... اما فالروسي تحت رجليك الاثنين المزلاج للكرسي و تحريك الظهر ...

**mirra** · 04-10-2011 12:52 AM

المشاركة الأصلية كتبت بواسطة thediesel

إلى الأخ العزيز mirra مافيش 2011 ولا 2012 حتى ألوان ميتاليك روسي .... الي انته شايفها دي مصري سيبك من الإكصدام .. انا متأكد من كلامي انا كنت باحسب كده زيك واكتشفت ان المصري حطولها نفس اكصدام الروسي . بس كاربيراتير و في اوبشن انهم يركبولك انجيكشن فالتوكيل .. و طبعا بكاسيت و سماعات خلفية و الكراسي الأمامية متدورة مش مستطيلة من فوق ... و ذراع تحريك ظهر الكرسي فالمصري على شمال الكرسي للسائق ... اما فالروسي تحت رجليك الاثنين المزلاج للكرسي و تحريك الظهر ...

باشا... واللة العظيم الادا روسى 2011 كلها الوان ميتاليك وطبعا قصة المصرى اللى نازلة باكصدام روسى انا واخد بالى منها بس طبعا مش دة اللى انا اقصدة.انا عايز اقول ان الادا 2107 روسى انجكشن نزل منها الوان ميتاليك كتير عندنا فى طنطا و اتفرجت عليها بنفسى.

**MGB** · 04-10-2011 04:25 AM

الف شكر يا عالردود ده , احسن ناس و الله
بالنسبة للاستاذ TheDiesel

" العربية المعروضه عليك والله أعلم تقفيل مصري"
انا لسه حشوفها بكرة ان شاء الله و اللى شايفهالى سواق صديق و بيقولى انها انجكشن , فهل ممكن تكون روسى انجكشن كموتور تقفيل مصرى و لا كله حته واحدة مصرى و لا روسى او ممكن يكون صاجبها راششها لعيب او حادثة
و بالنسبة لعداد الار بى ام , ده بيبقى فين و منين و ازاى , انا فاكر ان فى عداد عالشمال اعتقد ده الاربى ام (فى التاكسى اللى اتعلمت عليه) و كان تدريجه 10 20 30 مش بالالفات زى حضرتك مابتقول
معلش هى طبعا اكيد اسئلة بسيطة بس انت عارف المبتدئين
و الف شكر ليكم يا جماعة مرة تانية

**mrastra** · 04-10-2011 01:55 PM

فعلا هو دة عداد ار بى ام اللى تدريجة 10 20 30 والقراءة اللى هانرمزلها بالرمز x تضرب فى 10 يعنى لو القراءة 2 يبقى عدد لفات الموتور فى الوقت دة 200×10=2000 لفة/دقيقة

**MGB** · 05-10-2011 06:27 PM

الف شكر يا استاذ mrastra عالتوضيح , و منكم نستفيد
سؤال بقى , انا لسة شايف عربية لادا 2107 مصرى مو 2009 , هى حالتها كويسة مش راشة جوة و لا برة فى بس خدش فى البوية من عند جنب من الاجناب , و بطاريتها متغيرة , بدون باور و لا سنترلوك
الصراحة المنتدى هنا عقدنى من المصرى , انا شفتها فقط لاخد خبرة بس لما عرفت انها مصرى من الاول قلت فى لا
بس للمعرفة هو صاحبها كان طالب فيها 36000 و قالى ساعة لو فى نصيب حنتفاهم اكثر و واحد من اصدقائى قاللى بما انى لسة جديد فى السواقة فالمصرى كويسة , لان الروسى الكونتاكت بتاعها حساس و ممكن مش عارف يبوظ كارتة الكهربا و حاجات خزعبلية كده مش فاهمها
ف السؤال بقى
1-هل سعرها مناسب و لا غالى
2-هل كلام صحبى عن موضوع الروسى و المصرى و المستجدين فى السواقة ده حقيقى و لا فتى

3-انا من اسكندرية , و سمعت ان فى بنزينات بتاخد العربيى عشان ترفعها و تكشف عليها و تديك ريبورت بكفاءة الموتور و كده , هل ده صحيح , و هل تعرفوا بنزينات فى اسكندرية بنعمل كده , و يا حبذا لو قرب منطقة ميامى و سيدى بشر تبقى عظمة
معلش ياجماعة اسئلة كتير بس الواحد مبتدىء و خايف لا يتخدع و لاحاجة
و الف شكر مرة تانية