تجربه قاسيه بس هتعمل ايه لو كنت مكانه ؟؟؟؟؟؟؟؟؟
من حوالى اسبوعين كنت مع صديق لى راكب معاه سيارته الماتركس وماشين فى مصر الجديده وفجاه طلع من شارع جانبى عربيه 128 باقصى سرعه وراح داخل فى الرفرف الشمال الامامى لعربيه صاحبى ومن الخضه بتاعت المفاجاه الواد اللى كان سايق 128 معرفش يشيل رجله من على البنزين والعربيه كملت خبط فى جنب العربيه كله طبقت الباب الامامى والباب الخلف وجزء من الرفرف اللى ورا
نزلنا نشوف اللى حصل لقينا الرفرف الامامى معجون والدفيندر الامامى من الخبطه داخل فى الفانوس والكبوت والاكصدام الامامى وطاسه العجله دغدغهم
مسكنا فى البيه طلع سالف العربيه من واحد ومش عربيته المهم الناس اتلمت وصاحبى نزل عليه سهم الله قعد على الرصيف مافتحش بقه المهم مسكنا فى الواد وجبنا سمكرى وبتاع بويه يقدروا التكاليف
المهم قدروها ب6000 الى 8000 جنيه الواد سمع كده وجاله حاله هيستريا من البكاء وانه ممعاهوش المبلغ ده المهم فى الاخر اتصل بواحد معرفته جه وجاب معاه 2500 جنيه هو ده كل اللى يقدر عليه و حلفانات وايمانات انه لسه طالب وماحلتوش المبلغ ده وطبعا المطيباتيه بتوع الشارع يابيه هتاخد عوض يابيه المهم انك بخير وفداك مش عارف فدى ايه بالظيط المهم صاحبى اخد الفلوس ال 2500 وصورنا رخصه العربيه ورخصه الواد وبطاقته وصورنا الحادثه بالتليفون لاحسن نمشى من هنا يروح يعمل محضر اننا اللى خبطانه وجرينا
المهم جبنا عربيه شيلنها ووديناها لمركز غبور ابو رواش بصوا عليها وقالوا هيعملوا مقايسه وتيجوا بكره نقولكم تتكلف كام
تانى يوم رحنا لقينها هتتكلف 13500 جنيه تغير كابوت ورفرف وكرتيره بلاستك وفانوس واكصدام وباب كامل امامى وباب خلفى وهيسمكروا الرفرف الخلف وطبعا فى المقايسه كل مسمار هيتغير والزجاج الامامى والاستيكر اللى على البابين والباكتات
طبعا صاحبى قرر يعملها هناك
بس ياترى هل تصرف انك تقبل المبلغ البسيط ده مقابل الحادثه ده سليم ولا نعمل ايه ولا نمسك فيه ممكن ساعه تهور حد يعمل شئ يندم عليه ولا نروح للبوليس وفى الاخر ناخد بمبه وكان الله يحب المحسنين
ليه مش عندنا نظام الغلطان يتحمل نتيجته
ربنا يحفظنا ويحفظكم من كل شر