ممكن تدوني رأيكو

**BMW5260** · 04-10-2011 02:28 PM

أنا في الوقت الحالي معروض عليا ثلاث E36 موديل 98 وأنا لسة مشوفتهمش

الأولي صاحبها دكتور في القانون وحسيت من كلامه بالصدق ،،، العربية 316 كاملة أتوماتيك وهو تاني يد بس هو مغير المتور من 1600 إلى 1800cc وطبعاً غير عداد الكيلو متر بتاع الموتور الجديد وهو عامل 122 ألف كم وقالي إن فرش السقف عايز شوية شغل والعربية مكانش عايز يبيعها بس ظروف سفره لفرنسا هي سبب البيع وهو طالب 73 ألف قابل للتفاوض .

أما الثانية فهي 318 أوريجينال كاملة أتوماتيك صاحبها جواهرجي وهو ثالث يد والعربية عاملة على حد قولة حوالي 160 ألف كم وقالي كمان إن العربية بحالة ممتازة وطالب 83 ألف قابل للتفاوض .

أما الثالثة مع تاجر بس هي 325 سيدان والحالة كويسة برضو علي كلامه وممكن تخلص على 78 ألف ،،،،،،،،،،،،، وعموماً أصحاب الثلاث عربيات عندهم إستعداد للكشف في التوكيل

مبدئياً أيهما أفضل اللي متسقط لها موتور و لا الأوريجينال ولا 325 والأسعار غالية ولا كويسة

برجاء الرد لأخذ القرار ،،،،،،،،،،،،،،،،،،،،،، شكراااااااااااااااااااااا ااااااً

**fahd_628** · 04-10-2011 03:11 PM

انا رأى تستنى شوية و تشوف واحدة 316 اصلية متلعبش فيها موتور و الكلام دة و حالتها تكون ممتازة

انا شفت كام واحدة على كونتكت بس كانو طالبين غالى فى حدود ال 80 الف بس كانو ماشيين كيلومتر قليل و باين ان حالتهم حلوة

**BMW5260** · 04-10-2011 04:43 PM

المشاركة الأصلية كتبت بواسطة fahd_628

انا رأى تستنى شوية و تشوف واحدة 316 اصلية متلعبش فيها موتور و الكلام دة و حالتها تكون ممتازة

انا شفت كام واحدة على كونتكت بس كانو طالبين غالى فى حدود ال 80 الف بس كانو ماشيين كيلومتر قليل و باين ان حالتهم حلوة

طب لوبعدت عن الملعوب فيها الــ 318 وحشة ولا سعرها عالي وبعدين إشمعنا 316 ‘‘‘ إديني وجهة نظرك لأني بثق في رأيك يا فهد

**bedooracle** · 04-10-2011 04:06 PM

حاجة تحير انا شفت اكتر من عربية 316 موديل 97 و 98 السعر فوق 83 الف بس اللى محيرنى محدش باع عربيتع و فيهم حاجاة كويسة من الواضح من كلام الزملاء هنا ان السعر اللى فوق الثمانين مبالغ فيه من اصحاب العربيات دى و الدليل انها متبعتش انا بدات اميل انى اجيب جولف احسن و بنفس الثمن و اقرب فى سنة الصنع
موضوع محير جدا

**fahd_628** · 05-10-2011 03:14 AM

انا متشكر جدا لثقتك :)

بالنسبة لل 318 انا مش عارف بس اشك انها اوريجينال 318 لأن منزلش فى مصر غير 316 ( ممكن يكون نزل 318 و انا معرفش ) !

على العموم هاتلى اخر 7 حروف و ارقام فى رقم الشاسية بتاعها و نعرف دية 316 ولا 318 اصلها !

و الصراحة انا احب اشترى الحاجة الى مش ملعوب فيها و الى نازلة كدة من المصنع ! بدون لعب الأيدى المصرية :)

انا عندى فى العربية كام حاجة متركبين فى مصر بيدايقونى اوى !!!!!!

مثلا السى دى تشينجر متركب هنا فى مصر و طبعا مشعرين و قرف انا مرة جيت افكة طبعا دوخت علشان التشعير دة !!! هوة المفروض فيشة تفصلها و تطلع السى دى تشينجر !! لأ تلاقى شيكارتون و قرف و قاصين فى الفيشة !!! و طبعا البية و هوة معدى السيلك مش معدية صح و فية حاجات مفارقة بس انا عدلت كل الكلام دة ما عدا التشعير دة !!!!!

و مثلا العربية كان راكب فيها زينون ! طبعا جيت اغير الفوانيس و احتست !!!! لأنى لاقيت اسلاك و حاجات ملهاش اى دخل بمعلوماتى و الحاجات الى انا قريها بس الحمد لله رجعت كل حاجة لأصلها و ركبت فوانيس عادية بلمض عادية و رجعت الضفيرة زى الفابريكة !!! كل حاجة تركب و تتشال بقمة السهولة

دة مثال بسيط جدا جدا جدا جدا جدا جدا طبعا و لكن دة يوضح ان اى حاجة راكبة مش في مكانها و مش فابريكة بتبقى مش تمام !!!! و انا مقتنع بالكلام دة ! و طبعا دية امثلة لحاجات تافهه جدا لكن فعلا حتى مش فى عربيتى فى عربية والدتى ( هيونداى i30 ) الأنزار الى متركب فى مصر زى الزفت !!! لأن الأيد المصرية هية الى مركباة و مش نازل كدة من المصنع

انا بس حابب اوضحلك ان دية حاجات بسيطة ( انزار و سى دى تشينجر و زينون ) ! ما بالك بقى بالمحرك و الفتيس و الضفيرة و الكلام دة !!! اكيد عمر ما حد فى مصر حيعرف يظبط الكلام دة 100 % زى الفابريكة !

**minicooper20** · 05-10-2011 04:55 AM

استاذ و الله الايدى المصريه تبوظ و تخترع فى اى حاجه

**BMW5260** · 05-10-2011 10:14 AM

الله ينور عليك يا فهد بس أنا لما أشوف 318 واكشف عليها مش التوكيل يقول لي إن كانت أوريجينال ولا لأ

**BMW5260** · 05-10-2011 10:32 PM

ياجماعة فين الردود و المساعدات بالخبرة

**BMW5260** · 06-10-2011 12:47 PM

هي الناس بقوا يبخلوا بالنصيحة ليه ،،،، أنا مجاليش إلا رأي أو إثنين فقط أمال فين باقي عمالقة البي إم

**inspiron** · 06-10-2011 10:44 PM

شوف يا باشا.الأول آسف علي التأخير ده..
إن شاء الله تخليك في تاني عربية دي.وتعمل الآتي.
تروح منصور لأن ده الإختيار اللي معاك دلوقتي عشان تكشف علي العربية.هتراضي العيال اللي هناك كده باللي في النصيب.وتقولهم يجبولك قرار العربية.هيكشفولك علي حالة الصاج والدهان ( وإن كان ده يمكن الكشف عليها بنفسك نظريا ) وتعرف العربية واخدة معجون واخدة سمكرة أو تسخين في الصاج الكلام ده كله ده بالنسبة للسمكرة والدوكو...هيكشفولك بردو علي المكنية بالنظر كده وده مش كفاية.فإما إنك تجرب العربية وتعمل إختبار كفاءة الفتيس بإنك وإنت واقف تديها وضع n وبعدين تديها الوضع p وبعدين تنزل علي الـ r في اللحظة دي في أي سلوك ملحوظ في الفتيس ولا لا,يعني رزعة أو صوت مش ولابد كده يعني..وبعدين تنزل من d علي دي بسرعة وتشوف بردو إيه الأخبار في حاجة ملحوظة ولا لا.وبعدين من d لـ r ومن r لـ d ورا بعض مرتين تلاتة بس مش بسرعة.هل في الخطوة دي في رزع بيحصل في صوت مش حلو حاجة بتخبط.مفيش يبقي الحمدلله كده الفتيس تمام.
نيجي للموتور..بعد الإطمئنان علي حالة الفتيس..هتدي وضع n وتبقي علي وضع إستعداد للإنطلاق..الطريق فاضي ومستعد...دوس يا ريس لأخر الدواسة مرة واحدة.شوف تسارع العربية أخباره إيه.من 0-100 بتيجي بسرعة ولا بتنام.وتاخد بالك برده من النقلات.يعني بين كل نقلة والتانية الـ rpm بيوصل لحد فين والنقلة طبيعية ولا لا..والأفضل بقي بالنسبة للإختبار ده إنك تخلي حد شايف العربية من ورا لحظة الإنطلاق دي.يشوف في دخان لا قدر الله بيطلع من الشكمان ولا لا.
كده موتور وفتيس تمام.
العفشة سهله.تاخد العربية شارع مدغدغ شوية.وتخلي سرعتك 20 مثلا.وإسمع في رزع في أصوات إلخ إلخ إلخ. وتشوف الدريكسيون ثابت في إيدك ولا عمال يلعب يمين وشمال..بس يا باشا.وأي حاجة تحت أمرك في أي وقت.