لأ عربيتك مش أحسن عربية في الفئة دي في أحسن منها وبنفس السعر
فيه حاجة ملاحظها وبصراحة بتزايد مستمر وأنا في رأي انها حاجة خطيرة جداً على المدى البعيد
بالنسبة للأعضاء
وهي إن أعضاء كتير و ليس الكل يمتلكوا سيارة معينة من ماركة معينة بيكونوا متعصبين جداً للماركة دي ومتحفزين في الرد والدفاع عنها بأي شكل كان صواب أو خطأ وأي حد يسأل عن مقارنة معينة يبقى أكيد لازم يرشحوا الماركة دي ليه حتى لو مش مناسبة ليه وإن كانت ليست ضمن خياراته بردو يدفعوه إنه يضعها ضمن خيراته !!
أنا نفسي أفهم هو يعني إنت لو غيرت لماركة تانية هل هتتعصب التعصب القبلي ده ليها ولا هتفضل على ولاءك للقديمة
ولا هو إنت بس عايز تثبت لنفسك أو لغيرك إن اختيارك كان صح وانك حطيت فلوسك في الأفضل ولا تقبل الهزيمة وإن في اختيارات تانية أفضل بنفس السعر
ممكن يكون فيه خيارات تانية أفضل بس مش مناسبة ليك ممكن مناسبة لحد تاني وبنفس السعر اللي إنت دفعته
تاني حاجة بلاش التهويل والتفخيم ووضع العربية في مكانة أكبر من حجمها الطبيعي علشان محدش ينخدع بالكلام
وياريت نقول العيوب في العربية قبل المميزات
إنت اشتريت عربية واكتشفت إن فيها عيب معين
مش ثابتة مثلاً على السرعات العالية
موتورها ضعيف عليها
صوتها عالي
الباور ضعيف
الكراسي مش مريحة
تقفيلها مش للعمر الطويل
قول متنكسفش أو إمتنع عن الرد لكن متضللش حد بذكر المميزات وفقط المميزات !
بالنسبة للشاري
واحد معاه ١٠٠ ألف وحاطط ٣٠ نوع عربية ويقولك أجيب إيه من دول طبعاً التعصب يشتغل بموضوعية وبدون موضوعية وننتهي إن الراجل يا إما يتوه في النص أو يجيب عربية غير مناسبة ليه بسبب الضغط عليه إن دي أفضل ماركة في السوق وإن الوكيل أحسن وكيل في العالم وقطع الغيار بتتباع على النواصي وغيره
الموضوع ده هيفقد المنتدى مصداقيته على المدى البعيد بالإضافة إنه بيزيد إلتشاحنات بين الأعضاء على أسباب هايفة ويتحولوا من أعضاء لأعداء
والغريب فعلاً اني بشوف استماتة من ناس كتير على إثبات إن سيارتهم الأفضل وهي في الحقيقة بدون زعل مقارنةً بماركة أخرى ولا تسوا
لكن مقاوحة وبس والمظلوم في الأخر المبتدئ المسكين اللي جاي يستشير .
يا ريت نلتزم بالموضوعية أكتر من كدة ومفيش حاجة اسمها إن العربية دي أحسن من دي في حاجة اسمها العربية دي مناسبة ليك وعجباك على كدة و مناسبة لامكاناتك ودخلك .
يعني واحد بيسأل مرة عايز عربية في حدود ١٠٠ ألف وحاطط ٣ خيارات من الردود اللي فقعتني واحد دخل وقال هات الماركة الفلانية اللي أرخص بحوالي ٢٠ ألف ووفر الباقي كل ده علشان هو معاه الماركة دي والمشكلة انها ماكنتش ضمن خيارات السائل !!
الموضوع فقط للنقد البناء وليس للاتهام
Thanks
Eng.Sherif Shaker