تسعيير السيارات المستعملة الجزء الرابع

**engineer05** · 22-10-2011 06:44 PM

أستاذ شريف

رجاء الافادة بخصوص فيات سيارة سيينا 2003 1400 سي سي فابريكة من جوة و رشة نضافة من برة و عاملة حوالي 120 ألف
فيها تكييف و بور و الكماليات العادية

العربية معروضة عليه ومش عارف أدفع فيها قد إيه.

**HRH_Sameh** · 22-10-2011 08:55 PM

المشاركة الأصلية كتبت بواسطة sherifowahba

تعمل 40 الف

شكرا على اهتمامك

**MMohamed2** · 22-10-2011 09:46 PM

لو سمحت بسأل عن عربية فى حدود 65 ألف أوتوماتيك فبريكه بره وجوه وتكون حالتها ممتازه فايه الاختيارات اللى قدامى وحضرتك تفضل اي أختيار فيهم وجزاك الله خير

المشاركة الأصلية كتبت بواسطة sherifowahba

طيب ممكن اعرف متطلبات حضرتك ايه من السيارة واي صناعة تفضل وهل اهتماماتك في السيارة الموديل الاحدث ولا وسع الصالون ولا قطع الغيار ولا اعادة لبيع
ارجو التوضيح لتصغيير دائرة البحث ومساعدة حضرتك طبقا لمتطلباتك

الأهم عندى يكون الموديل الاحدث وفى نفس الوقت ميكونش الصالون ضيق وقطع الغيار تكون متوافره بأسعار معقوله اما بالنسبه للصناعه فمعنديش خبره بالموضوع ده مع العلم انى اول مره أركب عربيه وشكرا للإهتمام

**nournagy** · 22-10-2011 10:56 PM

المشاركة الأصلية كتبت بواسطة sherifowahba

مكيفة ولا بدون تكييف

بدون تكييف

**engineer05** · 23-10-2011 09:35 AM

معلش يا أستاذ شريف أنا بتقل عليك بس إن شاء الله يكون آخر طلب

فيات تمبرا 1997 عاملة 37ألف كم صاحبها بيقول بحالة الفابرقة برة و جوة- مانيوال و بور و تكييف - 1600 سي سي وهو طالب فيها 40ألف
إيه رأي حضرتك في الرقم دة؟

جزاك الله خيرا وآسف على تعبك معايا

**hashour** · 23-10-2011 12:09 PM

المشاركة الأصلية كتبت بواسطة sherifowahba

لا ولا يهمك وهرد عليك تعمل 130 الف
والجيتا ال 2008 الاخيرة تعمل 125 الف

استاذ شريف....جازاك الله خيرا على ردودك.....انا بس كنت عايز اسألك على سعر الجيتا ال 2008 اللي عدادها 29 الف....انا كنت متوقع السعر أقل من كده على اعتبار ان حضرتك كنت مره قبل كده عن جيتا 2008 عداد 45 الف وكان الرد رقم 79 في نفس الموضوع ده انها تعمل 112 الف......فهل فرق العداد ده (حوالي 16 الف كيلو) يعمل فرق السعر ده (حوالي 13 الف جنيه).......معلش اذا كان سؤالي غلس ...بس انا بحاول أفهم....عموما هي العربيه عاجباني وعايز أخلص فيها بس صاحبها طالب 131 الف

**MEDO84EG** · 23-10-2011 01:25 PM

جزاكم الله خيرا شريف باشا
انا اسف انا و الله دورت و ماخدتش بالي
و ليا توضيح بسيط
حضرتك قلتلي ان اللوجان احسن حاجه اشتريها في حدود السبعينات
طيب
هل لو مقارنه بين اللوجان و اف اس في و اف ارفي ال بريليانس - و لو دخلنا معاهم ال بي وادي اف 3
هل بردو اللوجان تكسب
اصلي بصراحه مقتنع جدا باللوجان لكذا سبب
لكن خايف من الصيانه و شراء قطع الغيار
سامحني للتعب
بس صدقني رأيك عندي اهم شيء
و جزاكم الله الف خير

**amir** · 23-10-2011 03:32 PM

شريف باشا ايه الاخبار ان شاء الله بخير

واحد حبيبي معروض عليه عربيه هوندا اكورد 86 اوتوماتك زجاج كهربا تكييف و سنتر دواخل فابريكه و السقف برضو
العربيه دي تخلص علي كام و لو في حاجه في رينج ال 25 ياريت لو تشور عليا انصحه لأن شغله في مصر الجديده و سكنه في العبور فالعربيه برضو لازم تكزن حاجه تستحمل و شكرا