شكرا علي التوضيح
عرض للطباعة
شكرا علي التوضيح
بصراحه يأستاذ فرحات ويأستاذ هاني نقاش أكثر من رائع
ومع احترامي للجميع بس عموما انا محتار بين الجيتا 2012الشكل الجديد والأوكتافيا 2012 بس في حاجه مخوفاني في الجيتا وهوا موضوع الفتيس الdsg ياترى حيكون فيها نفس العيب ولا لأ ياريت حد يقدر يفيدني بصراحه مش عارف أخذ قرار لحد دلوأتي هل فعلا هيختفي العيب ده ولا هيفضل ولازم اخد بالي في السواقه زي ما قلت يأستاذ فرحات
السلام عليكم
الاستاذ هانى و الاستاذ فرحات جزاكم الله خيرا كثيرا على التوضيح العلمى الاول من نوعة هنا انا كنت خلاص تعبت جدا من التدوير على معلومات علمية .
المهم انا كنت خلاص باخد قرار انى اشترى باسات 2009 dsg و كنت متردد جدا طبعا الموضوع اتحسم خلاص دا الواحد بيجيب الفلوس بالعافية :)
المهم يا اخوانى انا عندى سؤالين
1- هل الباسات ال FSI 1600 شرائها اَمن و من غير مشاكل ؟
2- الفتيس بيعيش عادى ولا فية مشاكل ؟
3- لو العربية عاملة 80 الف كيلو متر او 100000 الف دة عادى و كدة الماتور بيكون بردة بصحتة ؟
4- ارجو اجابة سؤال اخونا nadoooor جيتا DSG ولا فانتازيا ؟
5 - مش عارف اشكركم ازاى على و الله على مشاركة العلم دة ربنة يكرمكم
الأستاذ احمد و الاستاذ نادور
جيتا 2012 برضه dsg و الاختيار يرجع لحضرتك
الباسات fsi 1600 هي و الاوكتافيا 2011 فتيس اوتو عادي 6 سرعات ما فيش منه مشاكل و عمره الافتراضي اضعاف dsg زي الاوتوماتيك الياباني
الاوكتافيا 2012 مش متأكد انها dsg و لا لأ بس اللي يشتري يبقى يتأكد من عدم وجود حروف dsg على ظهر الفتيس ويدور العربيه ويجيب الدراع على +\- و يتأكد انه 6 نقلات
ملحوظتي الوحيده ان العربيتين طلعتهم بطيئه بس منتهى الفخامه
تسلم ايدك انا مقتنع جداً بكلام حضرتك طبعا لانى قرأت قبل كده حاجه زى كده مش شطاره منى واقتنعت بيه جداً الناس ديه مبتلعبش و كنت مستنى اخلص قراءة جميع المشاركات بصراحة اعتقد انه فعلاً فى الزحمه مفروض تمور وكمان الضغط على دواسة البنزين لازم يبقى بحكمه علشان مع الكبس بيعمل كيك دون اتوماتيك القياده بشكل رياضى يمكن تكون بتهنج العقل بتاعه الذى يتولى النقل بدل السائق لانه غير مبرمج على هذه الطريقه ويمكن ده اللى خاضع للتطوير بحيث يكون قابل للتأقلم مع انواع القياده المختلفه والمشكله دى قديمه لما كنا بنقول ان اكتر من رجل على السياره غلط وبتتعبها لانها بتتعود على رجل صاحبها
انا فى رأىى الشخصى المتواضع ان اللى يستخدمه لازم يكون فاهمه اوى
ويا باشا مشكور والله يعطيك الف عافيه
وعلى فكره انت عامل موضوع تحفه اكتر من رائع والمشاركين نخبه ممتازه وراقيه وناس كتير هتفهم الموضوع ده بس بعد عشر سنين والله الموفق
شاكر ليك يأستاذ ابراهيم بس على فكره الواحد بيفكر بشكل عملي مش نظام مظاهر أنا الليهمني في العربيه في المقام الأول بشكل عملي اعتمادي عليها مش أعد أحسس عليها واحسب ازود السرعه بأنتظام ازاي وأليلها ازاي بانتظام معقوله ده كلام يتعقل ناقص تقولي اقرا الكتالوج وأن بسوق لكون دوست على زرار غلط ولا حاجه
خلينا نكون موضوعيين بس وممكن اتفق معاك انه اختراع بس للأسف اختراع فاشل مش مناسب للظروف والبيئه المصريه من حيث زحمة الشوارع مين فينا وهوا سايق مش ممكن يقرص شويه في الغيار ولا حتى يسيدي مايمورش في الأشاره بصراحه كلام مش عملي وعلى فكره انا ذهبت لأكثر من معرض سيارات وكلهم نصحوني بلاش الdsg ونصحوني بالأوكتافيا وكان رأيهم مفيش فايده لازم الdsg هيخسر مهما حاولت وضطر برده تغيره وأسف للأطاله
وانا الى زعلان انى بغير ديسك و اسطوانه ايزى ترونيك بعد 100 الف كم :)
استاذ ابراهيم
احب اقول لحضرتك اني اول واحد هايجيب باسات ب dsg بشرط يحصله تطوير جذري في التصميم مش اصلاح بوش الدبرياج بحته ورده وكل شهر سوفت وير بدون فايده
ولو حضرتك كان اتحرق دمك فوق 25 مره في التوكيل و اسف في الكلمه و خسرت دم قلبك عشان تخلص من العربيه صدقني كان رأيك هايتغير خالص ثم ان الفتيس ده نزل بره بقاله 6 سنين فواضح ان ده اخرهم
استاذ احمد
الفيصل في شراء المستعمل الاتي
1-فابريقه بره و جوه عشان اللي بيحافظ على عربيته من الخارج والداخل غالبا بيسوقها بطريقه محترمه الا لو حاجه غصب عنه زي المسامير
2-تكون استيراد وكيل
3-تتأكد من عمل جميع صيانتها حتى تاريخه بالتوكيل
4-الكشف عليها بالتوكيل و طلب معرفة تاريخ الاعطال السابقه و نوعها (حوادث - موتور-فتيس-تكييف----الىاخره)
5-كيلومتر قليل بقدر الامكان
و على العموم ممكن العربيه تعدي 200000 بدون مشاكل جوهريه بشرط انك تجيب حاجه نضيفه و تحافظ عليها
طيب بعد اذن البشمهندس انا سمعت انى برده الفتيس بتاع الاوكتافيا لو متغيرلوش زيت الجير بعد ال60 الف الفالف بادى بيبوظ
هل الكلام ده صح ولا غلط ده غير انى معايا سكودا اوكتافيا 2007 ايه فايف ومكملتش 51 الف والجير بينتش فى النقلة ما بين الاول والتانى هل كده انا محتاج اغير الفالف بادى ولا ديه ممكن تكون مشكلة بسيطة
طيب سوال لو انت خليت نمط ستب ترونيك (مانوال ) وانت اللى تتحكم فى النقلات هل ممكن يطول عمر الدبرياج شويه ؟لانك ساعتها اللى بتتحكم فى النقلات (فى الزحمه)وبتقلل عددها
[frame="1 80"]
طيب بعد اذن البشمهندس انا سمعت انى برده الفتيس بتاع الاوكتافيا لو متغيرلوش زيت الجير بعد ال60 الف الفالف بادى بيبوظ
هل الكلام ده صح ولا غلط ده غير انى معايا سكودا اوكتافيا 2007 ايه فايف ومكملتش 51 الف والجير بينتش فى النقلة ما بين الاول والتانى هل كده انا محتاج اغير الفالف بادى ولا ديه ممكن تكون مشكلة بسيطة
[/frame]
بص حضرتك احتمال عندك مشكله في عقل الفتيس ولازم يتغير منعا لتطور المشكله يا ريت تحلها فورا وياريت يطلع الموضوع بسيط
[frame="1 80"]طيب سوال لو انت خليت نمط ستب ترونيك (مانوال ) وانت اللى تتحكم فى النقلات هل ممكن يطول عمر الدبرياج شويه ؟لانك ساعتها اللى بتتحكم فى النقلات (فى الزحمه)وبتقلل عددها [/frame]
الكلام ده عملي بالنسبه لو بتجري عشان تمنع الكيك داون وانا فعلا كنت عامل كده و كنت مغير الطاره بواحده فيها شيفت لسهوله النقلات من الطاره
اما في الزحمه هاتحس بالنقله بطريقه مزعجه فتضطر تغليها تنقل بمزاجها
مساء الخير يا استاذ هانى
عندى سؤال هو الباسات ال1600 fsi ممكن يستخدم معاها بنزين 92 ؟
هوه الاول الموضوع ابتدا ان العربية بتنتش لما بتيجى تنقل فى الاول والتانى فقط فسالت كذا واحد وقالى الفالف بادى لازم يتغير وفى ناس قالتلى نصلحه بس الله اعلم ممكن يتظبط وممكن لاء
المهم انا قلت سيبها كده فبعديها بشهر ابتدت تنتش وهى بتنقل من الخامس للسادس
وبالفعل رحت التوكيل وكشفوا عليها وقالولى لازم نغير الفلف بادى وزيت الجير
فعلا حاجة غريبة جدااا ليه محدش بيعرف يصلحه انا مش عارف وهل القديم ده لو خدته ممكن حد يشترية وممكن يجيب كام
أولاً أحب اعتذر على التأخير في الرد عشان كنت مشغول جداً اليومين إلي فاتو ويادوب ابتديت أفوق امبارح
بالنسبة لأسئلة حضرتك واحد واحد :
1- الباسات 1600 بالموتور السابق (ال-FSI ) والفتيس السابق صفقة جيدة ولكن غير متميزة ، أولاً لأن الموتور ال-FSI بيخرج 115 حصان فقط ، وعزم 150 نيوتن متر، ودة على وزن عربية أقل شوية من 1500 كلو يعتبر رقم ضعيف جداً ، وبالتالي أداء متواضع ، لو حضرتك رجعت في المنتدى من سنة ولا اتنين كنت هتلاقي شكاوي الناس كلها هنا إن العربية دي تقيلة جداً ومش بتمشي ولا بتجري ، بس كانت الناس بتحبها عشان الفخامة إلي فيها ، ودة مقبول بالنسبة لعربية عائلية أو لراجل كبير ووقور ، لكن مش عربية شبابي .
عشان كدة لم نزلت بموتور 122 حصان وعزم 200 نيوتن متر، يعني موتور أقوى سحب أعلى كتير ، وكمان مع فتيس سريع في النقلات ومعتمد على دبرياج مش على زيت يعني معناه إن العزم العالي د كله طالع على العجل بدون نقصان ذي ما بيحصل في الفتيس الاوتو العادي إلي فيه زيت ، معناه إن الأداء والسرعة أحسن كتير من أي عربية تانية ، لأنه أولاً موتور أقوى من أي 1600 وفتيس عزمه أعلى من أي فتيس اوتو وكمان نقله أسرع من أي فتيس مانوال ، يعني حلال كل مشاكل العربيات إلي في الدنيا. وفوق كل دة توفير في البنزين من الناحيتين أولاً عشان الموتور 1400 ومن ناحيه تانية عشان الفتيس دة نسبة الفاقد فيه قليلة جداً بتوفر 8% من البنزين .
لو حضرتك مفيش عندك مشكلة تستغنى عن ال-3 مميزات دول يبقى توكل على الله في ال-1600 العادي
2- الفتيس السابق كان تصميم شركة ياباني ، وعشان كدة مشابه لنعومة العربيات الياباني ، ولكن تجميع الفتيس بيتم في الصين ، وعشان كدة كان فيه بعض الشكاوي من الناس في بعض أجزاؤه ، بس الشكاوي بتاعته أقل من الفتيس ال-DSG .
وهو نفس الفتيس في ال-Jetta والباسات والاوكتافيا ، يعني أي شكاوي من أي فتيس في العربيات يعتبر شكوى في حق الفتيس نفسه مش في حق العربية على حدة .
3- 100 ألف على موتور ألماني فعلاً مش مشكلة كبيرة ، ولا حتى على موتور كوري ، تكنولجيا السبيك والمواد المستخدمة في تصنيع أجسام المواتير والقطاع بتاعتها دلوقتي أصبحت بتطاول عمر الموتور نفسه جامد ، ولا يقل بأي حال عن 300 ألف في أي عربية كوري ، ما بالك التكنولوجي الألماني إلي غالباً سابقة الكوري بحوالي 10 سنين .
لكن المشكلة بتكون في المستهلكات ، لأن خاماتها مش بنفس القوة ، ولا ليها نفس العمر ، ودي مشكلة في الفتيس الاوتو للأسف ، لأن عدد الكلتشات فيه كتير ودي عبارة عن خامات ذي التيل كدة ، يعني معمولة عشان تتأكل ، وبالتالي عمر الفتيس الاوتو أقل من عمر الموتور ، وأقل من الفتيس المنوال ، وفي عرف الصناعة الفتيس الاوتو بيتعمل ليه عمرة في بعض فترة من 100 ألف إلى 200 ألف كيلو حسب أسلوب الإستخدام (عشان الحكاية دي ).
4- أنا عمري ما هقدر أحكم حكم مباشر، لأن كل واحد ليه إحتياجات ، لكن أنا بحول أوضح المعلومة إلي تساعد أي حد ياخد قرار سليم ومناسب ليه ولظروفه .
5- يا باشا ربنا يكرمك ، ولا شكر على واجب ، ربنا يقدرنا على التعلم وعلى مشاركة هذا العلم ، و مش مطلوب أكتر من الدعاء
جزاك الله خيرا كثيرا و ربنة يزيدك من العلم اللى انتا بتساعد بية الناس و مش بتبخل على حد بية
انا ليا بقا سؤال لحضرتك
1-من وجهة نظرك هل اشترى فانتازيا زيرو افضل ولا اجيب بنفس الثمن باسسات مستعملة 1600 ؟ مع العلم انى هاشتري قسط من عند كونتاكت
2- هل فتيس الاوكتافيا الحالى بيحصل فية مشاكل ؟ ولا مشاكلة بتحصل من سؤ المعاملة و عدم تغيير الزيت فى الموعد المظبوط ؟
و لك جزيل الشكر
أستاذ هاني ..
أنا حاسس بيك و حاسس إن شكلك عانيت مع الفتيس أو على الاقل سمعت معاناة حد منه وعشان كدة حاسس إنه مش كويس .
بس اسمحلي من وجهة نظر هندسية بحتة أوضحلك إيه إلي بيحصل، وأرجو تتقبل كلامي من الناحية دي مش على إنه هجوم على رأيك ..
أولاً هو ازاي التطوير دة بيحصل ؟ مش مجرد وردة ولا حاجة :) ،
دلوقتي حضرتك فولكس لما بتغير الفتيس كله للعميل هي مش غاوية تخسر يعني، إلي بيحصل إن هما بيجمعو كل الفتايس (لو كان جمع فتيس فتايس يعني :)) ) إلي فيها مشكلة ويخدوه على المعامل بتاعتهم ويطلعوا منها الإسطوانات ويمسكو مثلاً الاسطوانة الأولى ويحللوها ، يعني يشوفو فين عمقين التأكل وشكل التأكل وعمق التأكل وزوايا التأكل .. ، ويقرر نفس القياسات على أكبر عدد ممكن لنفس الموديل ، ومن هنا بيحدد السبب سواء كان في خامة الاسطوانة أو تصممها الهندسي أو وسائل التبريد فيها أو حاجات تانية كتير بتأثر فيها ، وبعدين يعملوا تعديل على الحاجة دي سواء تعديل التصميم أو الخامة أو أي جزء بيسبب المشكلة أو المشاكل إلي شايفينها ،ونفس الكلام بيتكرر على كل جزء في الفتيس لحد ما يتحلل كله ويتعدل كله ، وبعدين يطرحوا التعديل دة في الإصدار إلي بعده أو بمعنى أصح في الشحنة إلي بعديها .
طب وبالنسبة للسوفتوير .. برضه مش حتة سوفتوير ولا حاجة :)
ناخد برضه مثال واحد بسيط ، حضرتك دواسة الدبرياج العادية لو إنت بتسوق منوال أو بتتابع سباقات السيارات والرالي ، هتخد بالك إن شكل النقلة وطوقتها بيفرق كتير في الأداء وحسب إنت عايز تتحكم في السرعة ازاي ، يعني مثلا ممكن تدوس بسرعة وتنقل لكن تسيب بالراحة ، أو تدوس نص دوسة عشان مش عايز عزم جامد على العجل لو إنت بتطلع في حتة مزحلقة أو مش عايز العربية تنط .. وهكذا
دلوقتي إلي بيعمل الكلام دة كله دواس كهربة ، والشكل بتاع تحريك الدواس دة بياخد شكل بياني معين على حسب المعلومات إلي بيجمعها من حساسات الطريق وطريقة السواقة مع قدرة الموتور مع بيانات الجو من حرارة و غيرها ، ويستعمل البيانات دي مع بعض عشان يعمل شكل مختلف للدوسة في كل وضع .
إلي بيحصل برضه لما بيجمعو الفتايس المعيوبة دي برضه مع تحليل نفس المعلومات مع أشكال العيوب وحصلت فين وفي أنهي جزء بالظبط وبقوة شكلها إيه ، مع خبرة وعلم شركة ذي VW ، بيحدد إن الدوسة الفلانية فيه أمشكل ومحتاجة يتعدل شكلها بزيادة عند نقطة معينة أو تقليل عند نقطة تانية .. وهكذا لحد ما يحسن الموضوع في كل الاوقات . ويطلع version جديد .
حضرتك متخيل الدراسة والتحليل والتعديل دة بياخد وقت قد إيه ؟ ، على أحسن الفروض ومع وجود مهندسين كتير وشركة كبيرة ومعامل ضخمة ، الموضوع ياخد من 6 شهور إلى سنة لكل إصدار . ولو شركة أقل هياخد وقت أطول (ودة الفرق بين شركات ذي BMW و-VW وغيرها من شركات شرق اسيا مثلاً )
طيب الفتيس ال-DSG-7 ده نازل من امتى ؟ من 2007 تقريباً ، يعني ليه بالكتير قوي 4 سنين ، يعني بالكتير قوي نزل منه 3 إصدارات ، وذي ما الناس قالت هو فيه تحسن ولكن لسة مش أحسن حاجة .. بإختصار إلي عايز أقوله إن دة مش أخر فولكس ومش دي النهاية ويبقى خلاص كدة الموضوع فشل ، د احنا لسة بنبتدي
وعشان تتصور كلامي ، لو حضرتك سواق قديم أو بتسوق عربيات زمان .. ، الفتيس الاوتو ابتدى من التمنينات مثلاً ، حضرتك فكر عربيات إلي فيها فتيس اوتو بتاعة سنة تمانين كانت شكلها إيه وكان إيه عيوبها ، وعربيات 90 وعربيات 2000 ودلوقتي 2010 ، لو فكرت في معدل التطور بتاع المنتج لحد ما يبقى مستقر والناس تستوعبه وتحس إنه فعلاً أحسن من غيره هتلاقي إن أكيد احنا لسة قدمنا شوية على ما يبقى فيه DSG فيه مشاكل معدومة ، ولكن احنا مش بعيد لأن VW مش ساكتة وعمالة تحسن وتعدل وأدينا مستنيين :)
مرة أخرى تقبل تحياتي .
نظرياً الفروق المكانيكية مفيش يبقى الفرق كله في شكل وحجم العربية وكمالياتها ( وألو إن الكماليات تقريباً واحدة حالياً ).
يبقى السؤال كله دلوقتي في الشكل والحجم وكمان بما انك هتجيب تقسيط يبقى المميزات المادية هتكون أكتر للمستعمل ولا الزيرو ؟ ، الواحد إلي يجاوبك على هذا السؤال هو حضرتك بعض ما تتفرج من قريب على الاتنين عشان تحكم على الشكل والحجم مع احتياجاتك ، وبعض ما تقعد مع مندوب البنك عشان تشوف شروط التقسيط مع مين فيهم أفيد ليك. لو جاوبتك هيكون بناءً على احتياجاتي أنا والفلوس إلي في جيبي أنا :)
موضوع الفيتس بقى .. أنا شايف إن حضرتك معاك عربية اوتو برضه ، وكوري ، هل معاك من الزيرو ؟ ولو معك من الزيرو سواقتك محافظة على الفتيس كم ألف كيلو ؟ لو حضرتك هتجيب عربية زيرو بفتيس ألماني وهتعاملها نفس المعاملة إلي بتعامل بيها عربيتك الحالية يبقى حتعيش أكتر منها على الاقل ضعف المدة ، لو هتعاملها أحسن يبقى أكيد حتعيش أكتر . فكر كدة إنت بتعمل إيه في عربيتك من تغيير زيت فتيس وصيانة وغيره ، الفرق الوحيد يمكن انك محتاج في الالماني حد بيفهم عشان الصنايعي المصري بيفتي على روحه أصلاً ، ما بالك في حاجة دقيقة كدة !! ، وكمان قطع غيار هتكون أغلى شوية .
لا لاعربية معاية كانت عاملة 19 الف كيلو لما اشتريتها الصيانة بعملها فى التوكيل ايوة فى التوكيل من غير تريقة :)و تغيير الزيوت و السيور فى المواعيد لما بكون واقف فى اشارة او حتة زحمة لما اقف لازم اموار العربية بدة كلة نقلة حقها و لما و عمرى ما بحرق على نفس النقلة باخف دواسة البنزين فا ينقل العربية بالنسبالى فرد من افراد الاسرة العربية دلوقتى عاملة 72 الف بتعرق مية من الشكمان بتجيب ال ماكس سبييد 180 كم / ساعة دية طريقة معاملتى للعربية حاجة كمان هاتضحك عليها لما بعمل بيها مشوار كبير و تكون على اخرها اول ما اوصل و انزل ارح مطبطب عليها و اقولها 100 100 تسلم ايدك :) جنان شوية هاهاها انا عارف :) المهم انت كدة بقة تنصح اعمل اية ؟:)
بسم الله ما شاء الله ، لأ لو كدة بقى يبقى أنصحك تجيب عربية فيها فتيس dsg وإنت مطمن ،وأقدر أقولك إنه بإذن الله هيعيش معك أكتر من 100 ألف مستريح
أنا عارف إن الناس دلوقتي هتثور علي ومش بعيد ألاقي هجوم وضرب :)))
لكن بصراحة دة رأيي .. لو معاملة جيدة للعربية وصيانة منتظمه يبقى الواحد ممكن يتعايش مع أحدث التكنولوجية وهو مستريح تماماً وهيستمتع بيها .. ليه لأ ؟
يا باشا انا بعد الكلام العسل اللى سمعتة دة عن ال dsg ممكن بس ابقى اتفرج علية فى الصور :) و لو ربنة احيانا لمة ينزل الشكل الجديد من الباسات كمان 5 سنين هابقى اشتريها على الاقل يكونو خلصو تعديل فية :)
المهم سؤال هو ال s فى فتيس الفانتازيا بيثبت الجير على نقلة معينة يفضل يحرق عليها و بس ولا بيعمل اية بالظبط ؟
فتيس الفانتازيا هو هو فتيس ال باسات ال fsi 1600 ؟
ال-s في فتيس الأوتو دة عبارة عن وضع القيادة الرياضية ، يعني الفتيس بينقل عند أعلى نقطة عزم للموتور أو على rpm أعلى يعني ، مع مراعاة الظروف الخاصة بالطريق وسرعة العجل وحالة العجل (دة لو فيه abs ) وحاجات تانية كتير عشان يدي أعلى أداء (ولكن ليس الاكثر توفيراً !! ) ، نظام ال-d بيكون إقتصادي أكتر لكن أداء أقل .
إلي بيثبت النقلة دة نظام الستيبترونك ، عشان يديك إحساس المنوال وتنقل بمزاجك .
فتيس الاوكتافيا هو هو فتيس الباسات وهو هو فتيس الجيتا
السلام عليكم ورحمة الله وبركاته
لسة.جايب باسات 2011 الشكل الجديد وعاوز اعرف ازاي احافظ على الجيربوكس dsg وعلى فكرة انا معظم مشاويري طوالى
معنى كلامك كده يأستاذ فرحات ان الجيتا 2011 وجيتا 2012 فيها نفس نوع الفتيس الي راكب في الفانتازيا 2012 وده نوعه فتيس ستيبترونيك يعني مفيش فرق خالص في نوع الفتيس
أرجو التوضيح للأهميه عشان أنا كنت سامع ان فيه مشاكل في الفتيس بتاع الجيتا بس مكنتش عارف نوعه ايه بالظبط والكلام ده سمعته من بتاع المبيعات في معرض سيارات وعشان كده نصحني بالفانتازيا وألي سيبك من الجيتا ياريت توضحلي أكتر وشاكر جدا لمجهودك وتحليلك الممتاز
رجاء مستني رد سريعا عشان ناوي اخد قرار واشتري ان شاء الله وأسف للأطاله
عزيزي ، حضرتك مش محتاج تعمل حاجة مختلفة عشان تحافظ على الفتيس ال dsg أكتر من الحاجات إلي بتعملها عشان تحافظ على أي فتيس ، و هي دي الحاجات إلي بتكون مكتوبة طبيعي في الكتالوج بتاع العربية ، زي تجنب القيادة بعنف ، يعني مفيش تسريع مفاجئ بشكل عنيف ولا فرملة مفاجأة بشكل عنيف (مش من مرة ولا مرتين ، لكن مايكونش دة الإسلوب العادي للقيادة )،
و تجنب القيادة بسرعرت موتور عالية (يعني rpm عالي ) عشان دة بيحمل على الفتيس ، وأي فتيس مش بس ال-dsg ، يعني الناس إلي ماشية تفصل ليل نهار كدة بتبهدل الفتيس .
تقليل النقل المتكرر قدر الإمكان ، يعني الناس إلي بتفتكر إن الفتيس الستيبترونك دة منوال بجد وعشان أسهل كمان لأنه بدن دبرياج بتلاقيهم كل شوية يسقط نقلة ويقعد طالع نازل ، أو كل شوية يعمل كيك داون ، دة برضه بيضر الفتيس ، سواء dsg أو اوتو عادي
يمكن الحاجة الوحيدة الزيادة في ال-dsg إن أثناء الإنتظار مفروض مايكونش متعشق ، يعني يتحط في ال n لم تكون العربية في حالة إنتظار أو إشارة طويلة ، ودي مش هتكلف السواق مجهود زيادة يعني
وأخيراً ربنا يحافظ لك على العربية و تستمتع بيها في الخير دايما
مع احترامي ، أنا مش عارف العربية إلي حضرتك بتتكلم عليها تحديداً دي فيها أنهي فتيس ، كالآمي كان رد على سؤال الزميل لأنه كان محدد إنه بيسأل على باسات 1600 FSI ، وفانتازيا ودول فيهم فتيس ستيبترونك عادي ، حتى الآن .
لكن حضرتك دلوقتي بتسأل على عربية ومش محدد فيها أي فتيس ، لأن الجيتا بتنزل في بعد الدول بالفتيس الستيبترونك وبعد الدول بالفتيس ال-DSG ، وبالتالي لزم حضرتك تشوف العربية إلي هتجبها دي جاية منين (خليجي ولا اروبي ولا وكيل ..) و
الأسهل من كل دة تركب العربية وتقرأ مكتوب إيه على عصاية الفتيس ، لو هو DSG لازم تلاقي التلات حروف مكتوبين بالحفر على العصاية بتاعة الفتيس ( D S G ) بشكل واضح جداً على الجزء النيكل إلي في منتصف العصاية
http://www.vwvortex.com/gallery/albu...-%20EU/013.jpg
[QUOTE=farahat;3873883804]مع احترامي ، أنا مش عارف العربية إلي حضرتك بتتكلم عليها تحديداً دي فيها أنهي فتيس ، كالآمي كان رد على سؤال الزميل لأنه كان محدد إنه بيسأل على باسات 1600 FSI ، وفانتازيا ودول فيهم فتيس ستيبترونك عادي ، حتى الآن .
لكن حضرتك دلوقتي بتسأل على عربية ومش محدد فيها أي فتيس ، لأن الجيتا بتنزل في بعد الدول بالفتيس الستيبترونك وبعد الدول بالفتيس ال-DSG ، وبالتالي لزم حضرتك تشوف العربية إلي هتجبها دي جاية منين (خليجي ولا اروبي ولا وكيل ..) و
الأسهل من كل دة تركب العربية وتقرأ مكتوب إيه على عصاية الفتيس ، لو هو DSG لازم تلاقي التلات حروف مكتوبين بالحفر على العصاية بتاعة الفتيس ( D S G ) بشكل واضح جداً على الجزء النيكل إلي في منتصف العصاية
http://www.vwvortex.com/gallery/albu...-%20EU/013.jpg[/
شكرا يأستاذ فرحات على التوضيح لكن أنا بقصد الجيتا الوكيل في مصر2011 و 2012 بتنزل بفتيس نوعه ايه
هل هو فتيس dsg ولا ستيبترونيك زي الفانتازيا أرجو التوضيح
شوف يا باشا ، أنا مش متأكد لأني ما أعرفش حد إشترى الجيتا 2012 ، لكن أنا سمعت إن إلي راكب فيها ولا دة ولا دة ، سمعت إن إلي فيها ال-dsg ال-6 سرعات ، فياريت لو حد يعرف حد اشتراها أو راح التوكيل بنفسه وشاف مواصفاتها يقول لنا ، عشان دي حاجة جديدة خالص على السوق
[frame="1 80"]
شوف يا باشا ، أنا مش متأكد لأني ما أعرفش حد إشترى الجيتا 2012 ، لكن أنا سمعت إن إلي راكب فيها ولا دة ولا دة ، سمعت إن إلي فيها ال-dsg ال-6 سرعات ، فياريت لو حد يعرف حد اشتراها أو راح التوكيل بنفسه وشاف مواصفاتها يقول لنا ، عشان دي حاجة جديدة خالص على السوق
[/frame]
استاذ فرحات
اي عربيه جيتا توكيل او خليجى 2010 فما فوق موتور 1600 MPI 102 حصان نازله بفتيس DSG 7 سرعات
ومن اول 2012 الشكل الجديد نازله بالموتور 1400 TSI 140 حصان توين تشارجر والموتور ده بالامر لازم يركبله DSG 7 سرعات عشان ما يحصلش تربو لاج
بالنسبه للفتيس DSG 6 سرعات ده معمول للمواتير TSI 1800 cc فما فوق عشان اقصى عزم يمشى مع DSG 7 سرعات 240 نيوتن زي موتور الجولف ال TSI 1400
ياريت يا جماعه تجيبوا الوسيط بتاع امبارح قسم السيارات بيع vw
هتلاقوا 6 عربيات جيتا وباسات موديل 2010 من اجمالي 14 عربيه للبيع!!!!!!!!!!!!!!!!!!!!!
ياريت ياجماعه تفسير للموضوع ومش هأقول رأيي عشان استاذ فرحات مايزعلش