الموضوع: رينو داستر...إنطباعات أولية

عرض جميل وبأسلوب مميز كالعادة، وألف شكر ياباشا على الإفادة :)

المشاركة الأصلية كتبت بواسطة Meggieboy

أحبائى الوحوش....إنهارده و بالصدفة البحتة قدرت أجرب الرينو داستر فى تجربة قيادة سريعة....العربية كانت 2X4 فول أوبشن....يعنى من اللى أنا فاكره كان فيها 2 إيرباج، ABS , EBD ، و 4 زجاج كهرباء و جنوط و 2 قايم للشبكة بلون فضى و من جوه كان فى تطعيمات بلون أسود لامع يشبه الأبانوس و لكنه من البلاستيك...

أكر الباب كانت فضى، الكاسيت بريموت تحت الدركسيون زى بتاع الكليو بالظبط و هو سى دى مع مخرج AUX.
دراعات المساحات فى اليمين و الأنوار فى الشمال بالظبط زى الرينو كليو.

التابلوه هو هو بتاع اللوجان.....

مصمم السيارة لم يوفق فى إختيار أماكن الأزرار....أضف إلى ذلك محاولة إخراج العربية بأقل شريحة سعرية و النتيجة أماكن الأزرار غير عملية أو مريحة.....

التحكم فى الزجاج الكهرباء للركاب الأماميين و زر الفلاشر موضوعين فى النصف تحت الكاسيت....لا يوجد زراير بالمرة فى ماسكة الباب سواء عند السائق او الراكب الأمامى.....

التحكم فى المرايات الكهرباء أيضا فى المنتصف.....أزرار التحكم فى الزجاج الكهرباء الخلفى موجودة فى الخلف فى المنتصف مكان فتحات التكييف الخلفية (طبعا لا توجد فتحات أو مخارج تكييف خلفية).

خامات البلاستيك المستخدمة فى التابلوه أو فى تبطين الأبواب من الأنواع القاسية جدا و التى تدل على الرخص و التوفير فى إختيار الخامات.

يوجد بكرة فى الشمال من تحت للتحكم فى إرتفاع الإضاءة.

النتيجة اللى ممكن نتطلع بيها إن المصمم حاول يخلى كل حاجة متشافة حلوة و كل حاجة مش متشافة رخيصة و ذلك للتوفير قدر المستطاع.

بالنسبة لإستهلاك البنزين و ده اللى كان غريب شوية إن صاحب العربية أكد لى إن إستهلاكها كويس جدا بالنسبة لحجمها و هو بيقارنها بنيسان صنى أتوماتيك و بيقول أحسن بكتير فى الأستهلاك.....

التكييف فعلا رهيب و لا يقل عن اليابانى فى شىء و ده إنطباعى و تأكيده من صديقى.

العربية فعلا شكلها حلو و شاذ من بره و يوحى بالخشونة و بإنها فعلا عربية 4X4 مصممة لأقصى الظروف و لأى نوع شارع....على الأقل ده الإحساس اللى الشكل بيديه......

الخلف مميز أكتر من الأمام من ناحية الشكل....العربية لا تخطئها العين عندما تراها و مميزة فعلا.....

الشنطة معقولة جدا إن ما كانتش تعتبر مميزة بالنسبة لهذه الفئة من السيارات.....

الdriving position رائع و الرؤية للشارع جيدة، العربية واسعة و الكراسى مريحة....

الغريب إن العفشة فعلا كانت ناعمة بالنسبة لسيارة فى هذه الفئة....العربية كانت بتمتص المطبات بنعومة جدا و ده مختلف تماما عن طبيعة هذه الفئة من السيارات و لكن طبعا بيدل إن المساعدين مش مصممين للقيادة الرياضية.

ثبات العربية كان جيد حتى سرعة 100 كم فى الساعة .

الموتور مكنش مأخر و لكن تجميعه مش سريع أو مكنش بيجرى مش لأن العربية تقيلة لأ....الموتور نفسه مش صاحى....يعنى لو إنت من أصحاب القرص و التجميع السريع و الطلعة الأولى القوية أكيد الداستر مش هتكون من أولوياتك....طبعا صديقى مكنش ملاحظ الموضوع ده....

الموتور مش بيأخر علشان يجمع لأ....الموتور تحس إنه مش بتاع شد....يعنى الموتور حاسس بيك جدا و لكن مفهوش روح طويلة...

الفتيس هو هو بتاع اللوجان و هو 5 سرعات مانيوال......و النقلات ناعمة و فى مكانها يمكن بس مرة أو حاجة الغيار معشقش فى مكانه.

صوت الموتور عالى شوية جوه الكابينة و أعتقد ده برده نتيجة إن العزل مش جيد جدا......

إنطباعاتى إن العربية معقولة جدا.....الشكل مميز...العربية واسعة كشنطة و ركوب....العفشة مريحة...

تكييف رائع....كماليات أساسية جيدة و شريحة سعرية مناسبة......

الموتور مش peppy لكن كمان مش مأخر و لا العربية تقيلة عليه...العربية موزونة و مش بتعوم على السرعة.....

دى كانت إنطباعاتى بمنتهى الأمانة عن الرينو داستر.......

احب اشكر حضرتك علي العرض الرائع بس حضرتك بتتكلم ع اساس ان حضرتك سوقتها مرة واحدة و كانت دفع ثنائي بس انا معايا الدفع الرباعي احب اقول لحضرتك :
- السحب فوق الممتاز من بعد الغيار التالت
- العربية 6 نقلات و ممكن حضرتك تطلع ع الغبيار التاني و ده بيدي انطباع ان عزم العربية قوي في الطلعة الاولي و خصوصا لو حضرتك محمل العربية ع الآخر
- السحب بيعدي عربيات كتير من نفس الفئة تيريوس, تيجو , ماتريكس, الكارينز عن تجربة .
- العربية حضرتك ثابته لاقصي درجة علي 140 كم
- اتفق مع حضرتك ان التابلوة هو ما اسوأ في العربية و اسوأ حتي من التيجو بس ده اقدر استغني عنه قصاد ماتور + عفشة فوق الممتازة .
- مش متفق مع حضرتك ابدا ان نظام العزل للسيارة مش كويس بالعكس فوق الممتاز بشهادة جميع اصحابي و من تجاربي السابقة للعربيات من نفس الفئة مش عارف ده علشان اللي معايا الفئة الاعلي ولا اية.
- اتفق مع سيادتك ان استهلاكها للبنزين معقول جدا لو سيادتك جايب وضع 2wd اما الاوضاع التانية فتسحب بنزين شوية .

واحب طبعا اشكر حضرتك ع الموضوع و ان آسف اني بعقب علي حضرتك