أحيانا القرص على العربية بينفع

**kar!m** · 17-10-2011 01:37 PM

بقالى فترة العربية عندى بتنتش شوية و انا ماشى .. و لما بتدور الصبح كده بتفضل فترة عشر ثوانى كده صوتها مش مضبوط و بعدين تضبط.

الموضوع ده حصل بعد ما كنت مره مش لاقى بنزين خالص و حطيت 10 لتر 80 و بعدين حطيت عليهم 92 .. بس واضح أصلا ان البنزين كان مش كويس.

المهم أول امبارح كنت راجع من القاهرة للزقازيق الساعة 12 بالليل .. و الطريق مش مضمون اليومين دول و عندى شغل الصبح و أنا بصحى بدرى

المهم قرصت شوية بين الكارتتين .. يعنى وصلت 160 كده .. أنا عادة مبجريش مؤخرا.

بدور العربية امبارح .. لقيت صوت الموتور كويس و حتى أهدا من الأول .. و أنا ماشى بالعربية .. مفيش تنتيش و الدنيا سليمة .. قلت سبحان الله .. هى لازم تاخد على دماغها عشان تشتغل كويس.

حتى البطارية كنت حاسس انها بدأت تضعف لقيت العربية دارت فى ثانية.

هو طبعا من المهم ان الواحد بين فترة و تانية يقرص على العربية شوية .. ده اللى اسمه تفتيح العربية .. عشان يشيل الرواسب اللى جوه الموتور.

بس أى حد يقرص و موتورة يفوت .. أنا مش مسؤل