الموضوع: وانا اعرف ازاى انت شرطه ولا حرامى ؟؟

النهارده كنت رايحه الشغل كالعاده والدنيا كانت واقفه كالعاده برضه

المهم لقيت واحد عادى جدا بيقولى رخصك ؟؟؟؟؟؟

فبقوله نعم ؟؟ قالى ايه بقولك هاتى رخصك ولا انتى سايقه من غيرها

فطنشت شويه وبصيت قدامى لقيته بيقولى يا انسه رخصك

المهم قلت لايطلع عسكرى بجد وبصيت حواليا لقيت عربيات كتير واصلا المنطقه دى فيها شرطه عسكريه

فطلعت الرخصه قعد يقولى هى دى عربيتك قلتله اه

فبيقولى انتى مكنتيش عايزه تطلعى الرخصه ليه ؟ ماهى سليمه اهى

قلتله علشان مش لابس ميرى وبعدين انت عارف اللى احنا عايشين فيه اكيد مش اى حد هيقولى رخصك هطلعها يعنى
فقالى لا انا شرطه بس لابس مدنى وده شئ عادى المهم اعتزرتله انى كلمته برخامه فى الاول وهو قدر حاله الرعب اللى احنا عايشين فيها

لكن بعد ما الموقف عدى جه فى بالى كذا سؤال

هو انا هعرف ازاى ان اللى بيوقفنى ده شرطه فعلا مش حرامى ؟؟

طب لو هو شرطه وانا مطلعتش الرخصه ومشيت ؟ غرامتها ايه او الاجراءات هتبقى ازاى ؟؟

طب لو هو حرامى وانا اديتله الرخصه اعمل ايه ؟؟

طبعا اول ما الموقف ده حصل قلت اجرى على البيت اللى هو المنتدى طبعا واحكيلكم