البنك الاهلي المصري اداني فلوس مزورة ! !
السلام عليكم ورحمة الله وبركاته
النهارده اتحطيت في موقف محرج للغاية يكاد يكون من اكتر المواقف المحرجة اللى اتعرضتلها في حياتي
نويت اني اغير كاوتش العربية واغير طقم الجنوط
دخلت البنك الاهلي المصري فرع فيصل
سحبت فلوس من الفيزا (الماكينة بتاعة السحب)
وطلعت على مدينة نصر عند ارابكوم لقيت جنط عجبني دفعت عربونه ورحت اشتريت الكاوتش ورجعلت لارابكوم تاني
وهو بيركب الجنط طلعلته الفلوس والراجل وهو بيعد راح مطلع 100 جنيه وقالي غير ال 100 جنيه دي
بصيلته بإستغراب لاني شايفها جديدة والفلوس كلها لسه جايبها من المكنة
وقلتله ليه ؟
قالي دي مبلولة يا باشا وراح مديها لزميله اللى جمبه وقاله شوف كدة
راح قالي اه باين اوي
هو حس اني متنح ومش فاهم يعني ايه مبلولة وانا فعلا ماكنتش فاهم
قالي دي مزورة !
اول ماقالي كدة بصيتله بإستغراب وتنحت بزيادة وحسيته بيهزر قلتله ازاي الكلام ده ؟ انا لسه ساحب الفلوس حالا من البنك الاهلي
راح مديهالي مسكتها فعلا باين عليها اوي انها مزورة طبعا حسيت بإحراج شديد وقلتله والله انا ساحب الفلوس كلها من المكنة ومعرفش وازاي البنك يديني فلوس بالشكل ده
الحمد لله الناس هناك محترمة وذوق واخلاقهم عالية تفهمو الموقف وقالي بتحصل يا باشا ولا يهمك وحصلت معانا مع كذا زبون قبل كدة
اعتذرتلهم وطلعت 100 جنيه غيرها ومشيت
طبعا الفكرة مش فكرة انها 100 جنيه ! الفكرة ازاي الورقة دي دخلت جوة البنك ؟ ؟ يعني معقولة الواحد يسحب فلوس من البنك وتطلع مزورة ؟؟
ومين اللى قلبه ميت اوي كدة عشان يروح البنك الاهلي المصري ويعمل ايداع لفلوس مزورة ! !
طيب الحمد لله ربنا سترها المرة دي ووقعت مع ناس محترمة ومتفهمة وقدرو الموضوع
انا بفكر دلوقتي لو كان لاقدر الله دخلت بيها سوبرماركت ولا اي محل كان هيبقى ايه الموقف ؟ ؟
ويا سلام لو محل في مكان شعبي ؟ ؟
كان ممكن اكون في القسم دلوقتي وبايت في الحجز وسين وجيم ونيابة وقصص
مش عارف والله اقول ايه ومش عارف ازاي يعني حاجة زي كدة تحصل ومن بنك كبير زي البنك الاهلي المصري ! !
بفكر اروح بكرة البنك واعملهم مشكلة واقلبها عليهم بس اكيد هيقولو اثبت انها من عندنا وسعتها مش هعرف اثبت ! ! !
ياريت يا جماعة اي حد هيسحب فلوس بعد كدة ياخد باله ويبص فيها كويس عشان ماحدش يتحط في موقف محرج وربنا يسترها علينا
ولا حول ولا قوة الا بالله
