السلام عليكم

تقدمت للمحكمة في شهر مايو الماضي للحصول على اعلان وراثة بمساعدة محامي
تحددت جلسة يوم 3/7/2011 لسماع اقوال الشهود
ذهبت انا واتنين شهود الى مقر المحكمة في اليوم المحدد في تمام الساعة التاسعة صباحاً
لم نجد اي مكان داخل المحكمة للجلوس فيها لانتظار فضيلة القاضي
جلسنا على الرصيف خارج المحكمة وكل شوية ادخل اسال يقولو جاي بعد ساعة لحد ما جت الساعة 2.00 ظهرا
وهنا حصلت المفاجأة :

القاضي ياجماعة مش جاي انهاردة وكل سنة وانتم طيبين بدأت الاجازة بتعت القضاة وتعالو بكره اعرفو ميعاد التأجيل .
ساعتها حسيت ان حد ضربني بشومة على دماغي
قلت حسبي الله ونعم الوكيل
الظاهر الثورة موصلتش هنا ومفيش تغير ابدا وعمرنا ما هنتغير
مشيت وكنت محرج جد جدا جدا من الاتنين اللي معاي

بعد كده تحددت جلسة يوم 3/10/2011 قلت يافرج الله
خدت اتنين شهود جداد غير اللي فاتو وسميت وتوكلت على الله على المحكمة
وصلت 9.30 سألت القاضي بدأ ولا لسه قالوا سيادة القاضي مش جاي انهارده
يالهوووووي

امال ايه الحل ؟!!

قالو الموضف فوق بياخد بيانات الشهود واقوالهم
قلت مش مهم المهم اخلص
طلعت كان في ضرب نار فوق وكله عايز يدخل اوضه 4*4 مفيش نظام قمة التخلف والهمجية وقمة قلة الادب
استنيت شوية لحد مالعملية راقت ودخلت
سيادة الموظف المحترم خد بيانات الشهود اللي على بطايقهم ومضاهم وقالي مع السلامة تعالى بعد 10 ايام استلم اعلان الوراثة
المحامي قال هجيبهولك << مكنش الافندي موجود معاي يوم الجلسة >>

وعدى 10 ايام واتصل بي سيادة الافكاتو وقالى نسيو اخوك احمد في الاعلان ومتكتبش
وقلت وايه المشكلة خليهم يكتبوه
ضحك وقالي مينفعش خلاص طلع برقم ومعرفش ولو تكتب هيعتبر تزوير
ربنا ينتقم من الموظف اللي عمل كده كان اتعمى في عينه وهو بيكتب

بقالو اسبوعين بيحاول يزبطه لكن مفيش فايدة في مظاهرات في المحكمة وكلام فاضي

قال هات شهادة وفاة تانية واعملك طلب جديد

ايه الحل ياجماعة انا زهقت وتعبت من دي بلد