محتار من اللي بيحصل في سوريا
انا كنت سعيد جدا بالثورة في تونس
واسعد طبعا بالثورة في مصر
ومبسوط باللي حصل في ليبيا
وفرحاااااااان باليمن
لكن سوريا
مش عارف
بجد مش عارف
. . .
النظام السوري هو النظام العربي الوحيد الواقف شوكة في حلق اسرائيل
هو الكيان الوحيد اللي بيدعم المقاومة اللبنانية سرا وعلنا
اه بشار قفز علي الحكم
وكانت فضيحة انهم يعدلوا الدستور عشان البيه يركب
مقدرش يعملها حسني مبارك بكل جبروته وهو لسه عايش
عملوها هم بعد حافظ ابوه ما مات
انا انتهاكات حقوق الانسان هناك علي ودنه
وامن الدولة شبيه اوي باخوه المرحوم اللي كان عندنا في مصر
وكانهم راضعين علي بعض
اه هو سفك دم كتير من ساعة ما بدأت الثورة
لكن لما يبقي البديل الناس اللي بتتاجر بسوريا وبشعبها دلوقتي
وبتروح تعمل اجتماعات ومشاورات وتحضر ندوات وتاخد معونات اجنبية
وتدعو لتدخل دولي في سوريا
لما يخرج علينا معارضين سوريين وكتاب ومفكرين محترمين يقولوا ان المتحدثين باسم المعارضة السورية دول خونة
وان بشار برغم كل اللي عمله انظف منهم
طب ايه الحال لو سقط بشار وركب هؤلاء مكانه ؟؟؟؟؟؟
مش عارف .. اول مرة الاقي نفسي متلخبط بالشكل ده ومش قادر احكم علي موقف
عين في الجنة وعين في النار زي ما بيقولو
نفسي يقعد لاني مش شايف في البديل ليه اي خير وفي نفس الوقت شايف في دعمه للمقاومة ومعاداته لاسرائيل حاجة كده وان كان ملهاش تأثير ملموس
لكن كفاية انها ترفع من الروح المعنوية للانسان العربي المقهور
لكن اللي عمله في شعبه وبحر الدم اللي سفكه عشان يقعد علي الكرسي
الاعراض اللي انتهكت والدماء اللي ملأت الشوارع
تخليني اقول يغووووووووووووور ويتعدم في ميدان عام
ويبقي ربنا يستر في اللي هييجي بعده
مش عارف