تغيير بطارية اللانسر بومة

**salah_86** · 23-10-2011 09:16 PM

عربيتى لانسر 1300 خليجى موديل 2009 البطارية اللى كانت نازلة فيها عادية سايلة بس طبعا كانت يابانى
اول امبارح بدور العربية وللعلم كانت بقالها اسبوع مركونة مدارتش
العربية دارت بس صوته التدوير زى مايكون البطارية نايمة وطبعا انا وانا بدور العربية لفتح الكونتاك وبستنى لحد ما لبمة الفحص الخاص بالماتور تطفى هيا ولمبة الاير باج وبعد كدا بدور طبعا وقت ما الكونتاك بيكون مفتوح بتكون المؤشرات مرفوعة البنزين والحرارة لقيت بعد مادورت ان مؤشر البنزين نزل تانى وطلع بس ببطئ
فسالت مهندس اللى فى مركز الصيانة اللى بتعامل معاه قالى دى بطارية
هيا بقالها قد ايه ؟ قلتلة من ساعة ما العربية جت وهيا فيها
قالى يعنى من امتى ؟ قلتلة بقالها سنتين و3 شهور
قالى ياباشا غيرها وهات جافة
روحت على توكيل بطاريات واطارات عندنا
وسالته على نوع بطارية كويسة بس يكون يابانى
قالى ياباشا مصر كلها مفيهاش يابانى ولا المانى ممكن تلاقى المانى بس هيكون تقفيل اتحاد اوروبى وبالنسبة لسعرها هتبقى غالية قوى
قلتلة طيب ايه الاحسن قالى عندى كورى اصلى
فور تى 55 امبير ب 400 جنية
قلتلة لا انا عاوز 70 امبير قالى ب 450
وسالته هتاخد البطارية القديمة وبعد ما شافها قالى 70 جنية
وادانى ضمان سنة
ودفعت 380 جنية كدا تمام ولا ايه وفعلا النوع دا حلو؟
الرجاء الرد بخبراتكم

**salah_86** · 23-10-2011 09:19 PM

ملحوظة هيا مكتوب عليها 62 امبير ولما سالتة قالى ال 70 بيكون مكتوب عليها 62
واول مركبتها الار بى ام كان واطى قوى ولمبة البطارية قادت مرة واحدة بس وطفت تانى بس لما مشيت بيها حوالى 30 كيلو اتظبطت
سالت مهندس الصيانة بتاعى قالى دا عادى وكانت ممكن تاخد يوم بحالة علشان العربية تظبط مع البطارية

**bassem_sams** · 24-10-2011 12:03 AM

الف مبروك يا استاذ صلاح على بطاريه جديده انا عربيتى بردوا موديل 2009 و بقالها 3 سنين كده شكلها هتعملها معايا بس بقول يارب لما كنت عملت صيانه 20 الف يكون شيكوا عليها و عملوا لها شحن فتقعد شويه
.المهم ليه حضرتك جبت 70 بالرغم ان 55 مناسبه لنا و هى دى احتاجات عربيه لها انما 70 مش هتفيد فى حاجه و هتخلى دينامو بتاعك يشحن بطاريه 70 بدل 55 ده مجرد استفسار
نجى بقى لأستفسارك طبيعى جدا بعد ما تغير بطاريهبيحصل عدم انتظام فى سرعه دوران محرك وهى rpm زى ما حصل مع حضرتك و مفروض كمان تشعر بالصدمات عند استخدام فتيس فى نقل و ده طبيعى جدا و سببه ان بعد استبدال بطاريه بيحصل مسح للبيانات خاصه بنظام تحكم فى موتور و فتيس تمام كده ده طبيعى فمفروض حضرتك
بعد استبدال بطاريه تعمل خطوات دى علشان تعيد ضبط موتور و فتيس:
1-وقف سيارة فى مكان امن و هى دايره و شغاله
2-لو كانت سيارة اتوماتيك خلى فتيس على و ضعp و لو مانيوال مورها المهم فى كلتا حالتين تكون على سرعه لا تعشقيه
3-اوقف تشغيل محرك يعنى بطلها
4-اعيد تشغيل سيارة تانىو متشغلش تكيف يكون مقفول علشان ميحملش على موتور علشان نعرف نظيط اى بى ام
5-خلى محرك يسخن لحد ما يوصل عداد حرارة الى منتصف
6-وقف تشغيل موتورثم اعد تشغيله
7-خلى محرك داير على وضع تموير او سرعه لا تعشيقيه اللى هى n لمده عشر دقائق
8-عندها تصبح سرعه دوران محرك مستقرة و تنتهى عمليه اعادة ضبط محرك

و الف مبروك يا استاذ صلاح على بطاريه جديده متعرفش فرتا المانى سعرها كام دلوقتى و فى سؤال تانى هو توكيل عنده بطاريات عربيه اصليه و لا نظامه ايه فى موضوع ده
اتمنى خطوات ضبط تكون سهله و واضحه

**salah_86** · 24-10-2011 02:45 AM

الله يبارك فى حضرتك
هو انا كنت اقصد نى جبت البطارية من توكيل بطاريات واطارات عندنا من المنوفية انما انا معرفش التوكيل الخاص بمتسوبيشى فيه بطاريات ولا لا
بس وانا بشترى البطارية سألتة عن سعر الفارتا قالى هتعمل حوالى 570 جنية بس دى 55 امبير وهتبقى المانى تقفيل اتحاد اوروبى
بس بخصوص انى جبت بطارية 70 امبير دا علشان انا العربية عندى كانت نازلة بكاسيت كينود سى دى فشيلت الكاسيت دا عندى فى البيت وركبت كاسيت سونى اكسبلود سى دى فلاشة وايه يو اكس جايلى من ايطاليا فلما كنت بعلى الكاسيت كان نور الصالون مع البيز لو كنت فاتح الباب بحس انه بيتاثر ولما سالت بتاع الكاسيت قالى لو ركبت بطارية اقوى هتخف الموضوع دا معاك
هو خف فعلا بعد ما غيرت البطارية كمان نصحنى بال 70 امبير مهندس الصيانة اللى بتعامل معاه وقالى يفضل 70 امبير علشان الدينمو

**SASA3** · 24-10-2011 03:12 AM

لا كده تماما و الى انا فاكرة ان البطاريات معظمها تقفيل مصرى فيه اوروبى و امريكى و المانى بس كله بيتقفل فى مصر و الفرق بين الجاف و السائل 100 جنيه

و احسن حاجه لييك انك تروح لبتاع البطاريات و تخليه يقيسلك الشحن و شحن الدينامو لو طبيعى يبقى خلاص الف شكر على كده و انسى بقا البطارية كمان كام سنة

**salah_86** · 24-10-2011 03:16 AM

هو متوسط عمرها بيقولو سنتين بس عموما ربنا يسترها معانا

**SASA3** · 24-10-2011 03:20 AM

و ممكن كمان لو انت محترم العربية و مش بتهلكها تكمل معاك فى الـ3 سنوات

و خير ان شاء الله لا تقلق ^^

**kh_talaat** · 26-10-2011 01:39 PM

الف مبروك على البطارية يا استاذ صلاح واعتقد السعر معقول جدا خصوصا انها كوري

وانا بستغل الموضوع فرصه للتحذير من بطارية نسر فارتا (السائلة) المصري لأني جربتها مرتين ورا بعض وكانت سيئة للغاية

المره الأولى مكملتش سنة مع اني كنت بتابع الميه بنفسي وازود ميه مقطره لما تنقص وقولت يمكن انا اللي بوظتها لأني كنت بزود الميه المقطره بدون ما اقيس نسبة الحمض بالقربه زي ما الكهربائي بيعمل

المره التانية أشتريتها وواظبت على الصيانة كل 3 اسابيع في اول 6 شهور ثم كل شهر او شهر ونص عند محل البطاريات لضبط الميه وقياس شحن الدينامو وتنظيف القواطيش لكن في النهاية برضه كملت بالظبط سنة ويومين

لذلك انصح اي حد ناوي يغير البطارية بالبعد تماما عن نسر فارتا

المره دي اشتريت بطارية جافة كوري اسمها شارك ومحفور عليها Made in Korea

واتأكدت من تاريخ الانتاج انها نفس الشهر تمنها 450 جنية + القديمة

**salah_86** · 26-10-2011 08:42 PM

المشاركة الأصلية كتبت بواسطة kh_talaat

الف مبروك على البطارية يا استاذ صلاح واعتقد السعر معقول جدا خصوصا انها كوري

وانا بستغل الموضوع فرصه للتحذير من بطارية نسر فارتا (السائلة) المصري لأني جربتها مرتين ورا بعض وكانت سيئة للغاية

المره الأولى مكملتش سنة مع اني كنت بتابع الميه بنفسي وازود ميه مقطره لما تنقص وقولت يمكن انا اللي بوظتها لأني كنت بزود الميه المقطره بدون ما اقيس نسبة الحمض بالقربه زي ما الكهربائي بيعمل

المره التانية أشتريتها وواظبت على الصيانة كل 3 اسابيع في اول 6 شهور ثم كل شهر او شهر ونص عند محل البطاريات لضبط الميه وقياس شحن الدينامو وتنظيف القواطيش لكن في النهاية برضه كملت بالظبط سنة ويومين

لذلك انصح اي حد ناوي يغير البطارية بالبعد تماما عن نسر فارتا

المره دي اشتريت بطارية جافة كوري اسمها شارك ومحفور عليها made in korea

واتأكدت من تاريخ الانتاج انها نفس الشهر تمنها 450 جنية + القديمة

الله يبارك فيك ياباشا فعلا كلام الرجل اللى انا اشتريت منه ان الالمانى دلوقتى كتير علية الفلوس اللى هتندفع فيه وانا بطاريتى ليها ضمان سنة وانا جبتها لما لقيت واحد صاحبى معاه لانسر بومة برضة مركبها عنده وشغالة كويس