دي بلدنا طلعت مليانة بلاعات بشااااااااااااكل

**OlaOsman** · 19-05-2008 07:53 AM

طبعا الواحد أول ما بيبتدي يسوق بتظهر له حاجات أول مرة يكتشفها، مع انه ممكن كان بيعدي عليها قبل كده كل يوم و مش واخد باله

ايه كم البلاعات اللي في الشوارع ده؟

انا طول ما انا سايقة كل تركيزي في إني أتفادى البلاعات.. و لما احس اني حققت إنجاز بتفادي بلاعة، مافيش كام متر و الاقي بلاعة تانية

و طبعا البلاعة لوحدها مطب.. و مطب رخم كمان

هو الموضوع ايه؟ بلاعة لكل مواطن يعني و لا ايه؟

**aliabutaleb** · 19-05-2008 08:07 AM

فكرتيني بفاعل خير على المحور طريق أكتوبر جايب قالب أسمنتي من بتوع الأرصفة كبييييير وحاططه قدام بلاعة وحاطط سعف نخيل طويل نعشان ينبه اللي سايقين ان فيه بلاعة في المكان :)

**ahmedsamir79** · 19-05-2008 08:17 AM

بلاعه لكل مواطن؟؟
لالا أعتقد النسبه أكبر من كده

**ASD peugeot** · 19-05-2008 08:21 AM

طبعا المشروعه ده بلاعه و مطب لكل مواطن كان في الخطه الخمسيه اللي فاتت و الحمد لله بدل البلاعه و المطب لكل مواطن زادوا وده دليل علي مدي الشغل المبذول من جانب اخونا البعدي
وحسبنا الله ونعم الوكيل علي المسئولين عن الطرق

**Akram** · 19-05-2008 09:13 AM

موضوع البلاعات ده بقى مشكلة حقيقية ,
جزء منها تتحمله الحكومة و جزء يتحمله مقاولين الباطن , و جزء يتحمله الحرامية ,
الحكومة لازم تعمل صيانة و متابعة للبلاعات اللي متبدهلة ,
و مقاولي الباطن لازم يعملوا البلاعات دي كويس و تبقى سوى الشارع ,
و فيه ناس معندهاش ضمير (قصدي الحرامية) بتسرق غطيان البلاعات و ممكن يكونوا هما اللي بيحطوا حجر و زعف علشان تنبه الناس ان الغطي مش موجود ,

فيه طريق بعدي عليه و كل يوم الاقي غطاء بلاعة مسروق و يوم تاني الحكومة تغيب غطى مكانه فيتسرق غطاء آخر و هكذا و دا لأنه شارع هادي و ضلمة شوية , و في مرة لقيت عربية العجلة بتاعتها داخلة كلها في بلاعة من دول و الراجل صاحبها محتاس , و ساعدناه انا و كام واحد جم و شلنا العربية كلها ...

**memo_hefnawy** · 19-05-2008 09:33 AM

يا جماعه إنتم فاهمين الموضوع غلط تماما ليه ؟
--------------

لو روحتوا أى دوله فى العالم عمركم ما تلاقوا بلاعات فى منتصف الشوارع

حد أخد بالوا من الموضوع ده قبل كده ؟

طب حد سأل نفسه ليه عندنا إحنا فى نص الطريق ؟

الإجابه بكل بساطة :

مصر أم الدنيا فلازم يبقى الحاجة عندنا غير

ده إسمه مشروع البلاعات الذكية

الأهداف الأساسيه للمشروع:
--------

1- تنشيط تجارة قطع غيار السيارات خصوصا العفشة و لاوزمها و الجنوط و الكاوتش
2- إيجاد فرص عمل جديده (الشباب يتجه لفتح ورش عفشه و محلات قطع غيار)
3- إيجاد حاله من النشاط و التركيز للسائق المصرى بدل ما يمشى و يمل من الطريق لازم يبقى فيه تغيير و يبقى مركز هايقدر يفادى كام بلاعه من غير ما يحدف أو يلبس فى إللى جنبه

بجد مش فاهم البنى آدم الغبى إللى إفتكس إن البلاعه تبقى فى وسط الطريق كان بيفكر إذاى !!!!

**aliabutaleb** · 19-05-2008 09:52 AM

المشاركة الأصلية كتبت بواسطة memo_hefnawy

ده إسمه مشروع البلاعات الذكية
الأهداف الأساسيه للمشروع:
--------

1- تنشيط تجارة قطع غيار السيارات خصوصا العفشة و لاوزمها و الجنوط و الكاوتش
2- إيجاد فرص عمل جديده (الشباب يتجه لفتح ورش عفشه و محلات قطع غيار)
3- إيجاد حاله من النشاط و التركيز للسائق المصرى بدل ما يمشى و يمل من الطريق لازم يبقى فيه تغيير و يبقى مركز هايقدر يفادى كام بلاعه من غير ما يحدف أو يلبس فى إللى جنبه

ونسيت يا ميمو حاجة تانية وهي:
إيجاد موارد للأخوة سارقي أغطية البلاعات ومن ثم المساهمة في تنشيط تجارة الخردة

**aif** · 19-05-2008 12:01 PM

انتي خدتي بالك يا علا
كدة اقدر اقولك انك بدأتي تسوقي في مصر المحروسة ..... مبروك يا علا ....
لسة بقي في مراحل تانية ... كل مدي ح تاخدي بالك من حاجات عمرك ما لاحظتيها قبل ما تسوقي
الملحوظة القادمة .... الناس اللي ماشية علي رجليها ...... بيبقو في منتهى التناحة ... تحسي ان الواحد منهم عاوز يدوسك وانت سايقة العربية .... دي طبعا من عجائب الدنيا الخماشر ... ان المشاة يدوسو العربيات .. والمفروض تنزل في موسوعة ام نسرين للطرق والبدنجان المدألج