المشاركة الأصلية كتبت بواسطة tito29
بص يا باشا
أنا درست الموضوع ده كويس جدا جدا
علشان أنا بأسافر كتير و بأشوف موتوسيكلات بحالة جيدة جدا و برخص التراب و بالذات في أميركا
أما أنجلترا الأسعار هناك عالية جدا بس فيه طريقة أنك تسترد الضريبة أللي هي 17,5%
الخلاصة كالأتي:
أشتري من هنا أرخص و أضمن الا في حالة واحدة أنك حاتشتري حاجة حديثة جدا و غالية جدا
ليه بقي أنا وصلت لهذه النتيجة :
التاجر بيشتري من بره أرخص بكتير من الزباين و ساعات بيشتري بالجملة من تجار الخردة بتوع اليابان (السوق الرمادية) و بيوفر جامد جدا في الشحن لأنه بيشحن كونتينر كامل و بيحشر فيه أكبر عدد ممكن من الموتوسيكلات و بالتالي تكلفة الشحن لكل موتوسيكل علي حدة بتبقي أقل ما يمكن
و في الجمارك (و ما أدراك ما الجمارك) بيكون عنده شبكة من المعارف رهيبة و ساعات بيعملوا ورق مضروب ان الموتوسيكلات دي خردة (أسكراب) علشان يدفع جمرك أقل و ساعات بيجيب فاتورة من الخارج بقيمة أقل من الحقيقية (و يعتمدها من السفارة هناك) الخلاصة دي مافيا شنيعة عمرك ماتسلك في وسطهم أبدا
علشان تستورد موتوسيكل و تكون تكلفته أقل من هنا لازم تشحنه مثلا مع قطع غيار أستيراد أو أي حاجة شبه ذلك علشان توفر في الشحن
أقولك علي حاجة غريبة جدا:
لو جربت تدخل علي أيباي أمريكا و شوف أسعار الموتوسيكلات و سوف تكتشف أن أسعار المعارض هنا أرخص (ده بعد مصاريف الشحن و الجمارك و الربح و الأستغلال طبعا)
ده تجربتي البسيطة لذلك أنا أشتريت من هنا و بسعر جيد و الحمدلله
و أي خدمة يا باشا