لجمعية المصرية للتأمين التعاوني ... خدمة سيئة للغاية!

السلام عليكم

كنت مستني لحد ما أتأكد من مستوى الخدمة قبل ما أكتب رأي في شركة التأمين إللي مأمن معاهم.
الشركة: الجمعية المصرية للتأمين التعاوني
العربية: تويوتا ياريس
النسبة: 1.5 % من تمن العربية
سمسار التامين: الأستاذ ممدوح العربي وهو عضو معانا في المنتدى

طبعا من خلال المنتدى وخبرات الأعضاء جمعت بعض المعلومات عن شركات التأمين والنسبة ولكن لم يجزم أحد على مستوى الخدمة.
المهم الأستاذ ممدوح العربي كان فتح موضوع في المنتدى عن شركات التأمين يعني سؤال وجواب وبصراحة الراجل فاهم شغله كويس وعنده كل الأجوبة ... متدرب كويس!

بعتله على الخاص وأخذت رقم تليفونه وكلمته والراجل منتهى الذوق والتفهم وبالفعل عملت معاه البوليصة وهو في القاهرة وبعتهالي على إسكندرية .... كل ده تمام.

عملت حادثة بعد الإستلام بأسبوعين وصلحت على حسابي في التوكيل وقدمت التقارير والمعاينة وخلافة .... لحد دلوقتي داخل في 3 (ثلاثة) أشهر ولم أسترد فلوسي.... وكل يوم عدي علينا بكرة معلش بعده لا الإسبوع إللي بعده..... طيب الأستاذ ممدوح إللي انا وثقت فيه علشان عضو وزميل في المنتى؟؟؟ لا يرد على مكالماتي وكبر دماغه.

وهو ده شغل سماسرة التأمين او القروض في مصر..... كلا ناعم ووعود لحد ما توقع العقد وبعد كدة خلااااااص .... وكحال مصر كلها خدمة ما بعد البيع زي الزفت او تكاد تكون معدومة!

بيحضرني بعض الأسئلة إللي سألتها للأستاذ ممدوح قبل ما أأمن معاه علشان بردة عقلي يرتاح ومنها:

1- هو إنتم لية عندكم نسبة تأمين أقل من باقي الشركات؟
أصل إحنا نازلين بسعر تنافسي وعاوزين ناخد السوق كله عندنا
2- طيب الرشاوي والكلام إللي الواحد بيسمعه؟
ياباشا إحنا سمعتنا زي الفل ودي إشاعات
3- طيب لو واجهتني مشكله أعمل إية؟
تكلمني وأنا حكون معاك خطوة بخطوة لحد ما فلوسك ترجعلك ... وهو فعلا كان معايا خطوة بخطوة لحد ما صلحت ودفعت وبعد كدة إختفى!
4- حضرتك انا عرفتك عن طريق المنتدى ودي سمعة بردة ودعاية ليك وللشركة فياريت تكون عند حسن ظني؟
يا خبر .... متقولش كده انا تحت امرك وفي طبعا معاملة خاصة لأعضاء المنتدى.

اخيرا وليس بأخر

1- لا تثق في إعلانات المنتدى او أي شخص بيعمل دعاية لنفسة او لشركته على المنتدى "ما لم تكن" هذة الدعاية عن طريق او من خلال القائمين على المنتدى لأنهم بيدونا خدمة وهما مسؤلين عنها.

2- تدفع رخيص حتاخد خدمة سيئة ورخيصة وهو ده إللي حصل في الجمعية المصرية للتأمين التعاوني!

على فكرة ممكن تروحوا فروع الشركة وتشوفوا الخناقات على ودنه!

اللهم قد بلغت.

أحمد باشا مش هادخل معاك فى تفاصيل ما حدث لكن هادخل فى المفيد

عليك و على شكوى حلوة لهيئة الرقابة على التأمين و إن شاء الله فلوسك ترجع فى أقل من إسبوع ده على حد علمى من خبرات سابقة لمعارف و أصدقاء

استاذ Goodwave
فكرتني بالذي مضي

انا كنت عملت حادثة في يناير اللي فات و مش عايز اقولك ان اللي حصلي من التأمين مع الشركة دي كان افظع من الحادثة نفسهاز لدرجة اني بقيت مقتنع تماما ان الم الحادثة بتحس ب 5% منه ساعة الخابطة و 95% الباقي بتحس بألمها مع الجمعية دي.
اما طلع عين اللي جابوني معاهم و كنت ببقي كاره حياتي في كل مرة ابقي صاحي الصبح و رايحلهم. ربنا معاك و تخلص منهم

تجربتى معاهم سيئة جدا

السلام عليكم

انا حصل معايا كذا موقف بصراحه لكن لم اتعرض الحمد لله لاى من الامور اللى اتعرضت لها يا جود ويف

انا امنت على عربيتى عن طريق نفس الشخص واخدت رقمه من المنتدى ومش عاوزه احكيلك انا عربيتى اتخبطت كم مره وديتها التوكيل تتصلح عشان التامين ولما لا قدر الله بيحصل شى بتصل بالاستاذ ممدوح وجزاه الله كل خير بيخلص لى الاوراق بسرعه ومش بيتاخر بصراحه بمجرد استلم منه الاوراق بتاعه المعاينه وبكمل مع التوكيل

وكان عندى اختيارين

اما انى اصلح العربيه فى اى مركز صيانه تابع للتوكيل وادفع فاتوره التصليح وبعدين احصل الشيك من الجمعيه وده المفروض فى خلال 21 يوم

الاختيار الثانى انى اصلح فى توكيل متعاقد مع الجمعيه بحيث انى مدفعش تكلفه التصليح وادفع فقط 5% من اجمالى الفاتوره

عشان مدخلش فى موال تحصيل شيك اختارت انى اروح توكيل متعاقد مع الجمعيه وهو تويوتا العبور والحمد لله مفيش مشاكل صلحت عربيتى مرتين مره غيرت فانوس خلفى ومره الرفرف الامامى اخرها امبارح لسا مستلمه عربيتى من التوكيل دفعت 50% من اجمالى الفاتوره

مشكلتى كلها كانت مع توكيل العبور فى جوده الخدمه فقط
واعتقد يا جود ويف انت غلطت انك ما رحتش مكان متعاقد مع الجمعيه بالنسبه لتكاليف التصليح

اقتباس:

---

المشاركة الأصلية كتبت بواسطة دموع الثلج

الاختيار الثانى انى اصلح فى توكيل متعاقد مع الجمعيه بحيث انى مدفعش تكلفه التصليح وادفع فقط 5% من اجمالى الفاتوره

عشان مدخلش فى موال تحصيل شيك اختارت انى اروح توكيل متعاقد مع الجمعيه وهو تويوتا العبور والحمد لله مفيش مشاكل صلحت عربيتى مرتين مره غيرت فانوس خلفى ومره الرفرف الامامى اخرها امبارح لسا مستلمه عربيتى من التوكيل دفعت 50% من اجمالى الفاتوره

---

السلام عليكم

اولا هو حضرتك قصدك 5% ولا 50%

و ثانيا انا برضه حصل معايا حاجه شبه كده كان الزجاج الخلفى اتكسر
وغيرته فى مركز صيانه تبعهم وكان عندى حلين يا ادفع وأخد العربه فى يوميها وكنت هعمل كده بس خفت من الجرى وراء الشركه عشان هى مصر كلها ده
فقلتلهم لأ انا مش دافع فقلولى هتسيب العربيه 3 او 4 ايام
عملت مشكله وبرضه خدت 3 ايام وأخدتها فى الرابع
بس نا مدفعتش حاجه خالص ولا حتى 5%

اقتباس:

---

المشاركة الأصلية كتبت بواسطة Amr81

السلام عليكم

اولا هو حضرتك قصدك 5% ولا 50%

و ثانيا انا برضه حصل معايا حاجه شبه كده كان الزجاج الخلفى اتكسر
وغيرته فى مركز صيانه تبعهم وكان عندى حلين يا ادفع وأخد العربه فى يوميها وكنت هعمل كده بس خفت من الجرى وراء الشركه عشان هى مصر كلها ده
فقلتلهم لأ انا مش دافع فقلولى هتسيب العربيه 3 او 4 ايام
عملت مشكله وبرضه خدت 3 ايام وأخدتها فى الرابع
بس نا مدفعتش حاجه خالص ولا حتى 5%

---

اسفه هى 5% مش خمسين كتبتها خطا

فيه 5% قيمه استهلاك

اقتباس:

---

المشاركة الأصلية كتبت بواسطة دموع الثلج

اسفه هى 5% مش خمسين كتبتها خطا

فيه 5% قيمه استهلاك

---

طب هو انا مخدوش منى فلوس ليه؟

انا بارضو اتعاملت مع الجمعية لما فانوسين اتكسروا و رحت عاينت في الجمعيه و بعدين طلعت على السبع غيرت الفانوسين و دفعت 5% استهلاك دا لو هيا 2008

لو 2007 يبقا 10% و ماخدش ساعه في التوكيل

بس مش فاكر مين قالي دلوقتي خلاص بتطلع على التوكيل ايلي بتتعامل معاه من غير ماتروح تعاين و يصور و الكلام دا بس مش عارف صحة الكلام دا

مش عارفه والله بس هو الاستاذ ممدوح قالى انه فيه 5% من قبل ما يعمل لى وثيقه التامين وانا وافقت على دفع ال نسبه دى

ليه حضرتك مش بتدفع مش عارفه بس ده كويس

اقتباس:

---

المشاركة الأصلية كتبت بواسطة loai-omar

انا بارضو اتعاملت مع الجمعية لما فانوسين اتكسروا و رحت عاينت في الجمعيه و بعدين طلعت على السبع غيرت الفانوسين و دفعت 5% استهلاك دا لو هيا 2008

لو 2007 يبقا 10% و ماخدش ساعه في التوكيل

بس مش فاكر مين قالي دلوقتي خلاص بتطلع على التوكيل ايلي بتتعامل معاه من غير ماتروح تعاين و يصور و الكلام دا بس مش عارف صحة الكلام دا

---

السبع ناس محترمه
انا عملت زيك كده رحت عاينت في الجمعيه و بعدين طلعت على العوض جروب
عملو معايا الحوار اللى حكيته والعربيه عشان اغير زجاج اعدت 4 ايام

فى الحقيقه انا مصلحتش غير مرة واحده بس على حساب التامين وصلحت فى المصيلحى وده مركز خدمه معتمد من الجمعية وغبور الاثنين
ولكن لى معهم مواقف اكبر من التصليح وهى استرداد ثمن العربية
وده حصل معايا فى عربيتين واحده الشيك طلع بعد 6 اشهر مخصوم 10% من اجمالى الثمن
والثانية بعد 3 اشهر مخصوم 10%
فى الحقيقه هما يشبهو موظفين الحكومة ( للعلم انا موضف حكومة ) فى الاسلوب والمعاملة ولكن ديتهم معروفه ....... تظبيط
والتظبيط ده بعدة طورق معارف او فلوس او شكوى

بصراحة بس محدش يفهم إن ده دعاية للشركة وإن أنا ليا أي مصلحة معاهم.
أنا ليا 6 من قرايبي (ولاد خالي وعمتي وعمي شخصيا) شغالين في الدلتا للتأمين وعمي الحمد لله ماسك مدير الإدارة المالية.المهم علشان هما قرايبي فطبعا باخد حقي وأنا قاعد في البيت:)
المهم أنا كذا مرة أروحلهم الشركة وألاقي زباين هناك جايين يأمنوا وكانوا مأمنين الأول في الجمعية وجايين وهما مش طايقين نفسهم ولا أي شركة تأمين في مصر من اللي شافوه من الجمعية.بجد مشاكيلهم ملهاش حل.ربنا يكون في عونك وأنا سألتهم دلوقتي على اللي المفروض تعمله فعلا قالولي عليك وعلى هيئة الرقابة على التأمين وتكتب شكوى محترمة.

الاخ ميمو الحفناوي
كلامك مظبوط بس ممكن عنوان الهيئة العامة للرقابة على التأمين؟ ولو ممكن الخطوات المتبعة لتقديم شكوى واكون شاكر ليك جدا.

الاخت دموع الثلج

مع إحترامي لكلام حضرتك وتجربتك معاهم ولكن لي بعض التحفظات او التعليقات:

1- حضرتك ممكن تكوني محظوظة وده رزقك
2- حضرتك ممكن تكوني في نظر سمسار التأمين عميل مميز .... بمعنى إنه ممكن يشوف إن من خلال معارف حضرتك ممكن يستفيد بزباين تانية واصدقاء فبيحسن التعامل معاكي علشان يجيله من وراكي ناس تانية ... وحضرتك بنت والبنات ما بيسألوش كتير في الحاجات التأمينية ووجع القلب ... يعني حضرتك تلاقي معاملة كويسة مرة وتقومي عاملة دعاية للشركة على طول لكل اصدقاءك ومعارفك ..... بس النهاية واحدة لازم حتتصدمي فيهم لأنهم ما عندهومش مبدأ ..... حضرتك روحي الشركة بنفسك وشوفي كم الزعيق والخناق والشتيمة.
3- حضرتك صلحتي في مركز تابع لهم (ويارب ما تحتاحي ليهم تاني ابدا) بس حضرتك غيرتي حاجات وده مش مقياس لجودة المركز .... حضرتك صلحتي عند مركز هما متعاقدين معاه... يعني في شروط ودفع بالأجل وحاجات كتير .... بس إللي بيختار يصلح في التوكيل على نظافة (ولو إن التوكيل مش دايما نضيف) فدة بيطلع عينه زي حالاتي وحالات تانية كتير إتكلمت في الموضوع ولسة حتتكلم.

ياجماعة انا ياما حظرت محدش يامن فى الجمعية او مصر للتامين الا لما يكون عارف فى الشركة حد و واثق فية تمام الثقة غير كدا عوضك على الله

اقتباس:

---

المشاركة الأصلية كتبت بواسطة goodwave

الاخت دموع الثلج

مع إحترامي لكلام حضرتك وتجربتك معاهم ولكن لي بعض التحفظات او التعليقات:

1- حضرتك ممكن تكوني محظوظة وده رزقك
2- حضرتك ممكن تكوني في نظر سمسار التأمين عميل مميز .... بمعنى إنه ممكن يشوف إن من خلال معارف حضرتك ممكن يستفيد بزباين تانية واصدقاء فبيحسن التعامل معاكي علشان يجيله من وراكي ناس تانية ... وحضرتك بنت والبنات ما بيسألوش كتير في الحاجات التأمينية ووجع القلب ... يعني حضرتك تلاقي معاملة كويسة مرة وتقومي عاملة دعاية للشركة على طول لكل اصدقاءك ومعارفك ..... بس النهاية واحدة لازم حتتصدمي فيهم لأنهم ما عندهومش مبدأ ..... حضرتك روحي الشركة بنفسك وشوفي كم الزعيق والخناق والشتيمة.
3- حضرتك صلحتي في مركز تابع لهم (ويارب ما تحتاحي ليهم تاني ابدا) بس حضرتك غيرتي حاجات وده مش مقياس لجودة المركز .... حضرتك صلحتي عند مركز هما متعاقدين معاه... يعني في شروط ودفع بالأجل وحاجات كتير .... بس إللي بيختار يصلح في التوكيل على نظافة (ولو إن التوكيل مش دايما نضيف) فدة بيطلع عينه زي حالاتي وحالات تانية كتير إتكلمت في الموضوع ولسة حتتكلم.

---

يالهوووووووووووووووووووى يا استاذ جو د ويف انت انتقدت كلامى بمنتهى العنف ليه انا هرد على سعادتك وكلامى مش شهاده ولا دعايه لحد

1_ الموضوع مفيهوش اى حظ خالص اول مره رحت اغير فانوس رحت تحت الجمعيه ونزل واحد عاين الكسر وادانى جواب رحت بيه للتوكيل هناك بئه تبدا العطله وطالبين اوراق كثيره ومن الاخر كده موظف التوكيل بتليفون واحد من مكتبه بيخلص الاجراءات
2_انا مش عميل مميز ولا اى شى وبعدين علاقه العميل بالسمسار مش اكثر من اتصال بتبلغه فيه لا قدر الله ان فيه حادثه وخلاص عشان موضوع الاخطار ويبلغ فى الجمعيه عشان المعاينه بتاعه قبل الاصلاح
موضوع انى القى معامله كويسه اروح اعمل لهم دعايه اعتقد انهم مش منتظرين دعايه ومش شغلى عشان اجيب لهم عملاء وكمان انا كنت هناك امبارح رحت للجمعيه امبارح عشان استلم جواب التسليم واخد عربيتى من التوكيل وفى حلال 10 دقايق كنت استلمت الجواب ومشيت يعنى مفيهاش لا واسطه ولا معارف وخلافه
3_انا صلحت عربيتى فى توكيل تويوتا العبور ده مش مركز صيانه ده التوكيل ثانيا مشكلتى اول مره كانت تغير فانوس وده هنقول قطع فك وتركيب وانا واقفه فعىلا عملوها لى فى نص ساعه ومشيت
المره الثانيه اللى هى بتاعه امبارح انا كنت بعمل سمكره ودهان يعنى رشيت رفرف بعد السمكره وده اخد8 ايام فى التوكيل
صلحت فى التوكيل عشان اضمن نظافه الدهان ودرجه اللو ن وطبعا ده مطلعش بنسبه 100% فيه عيب فى اللون البترولى
ومدفعتش غير الاستهلاك 5% ومشيت

سعادتك عندك مشكله معاهم مش معنى كده ان اى حد هيقول انه لم يواجهه مشاكل معاهم يبقى بيعمل دعايه او متحيز
وبرضوه هقولك انت الغلطان المفروض كنت تروح مكان متعاقد معاهم ومتدفعش فيه ولو على جوده الشغل انت مش مجبر تاخد وتستلم العربيه فيها عيب

هو فى كام شركه تأمين تعاونى فى مصر ؟

الاخت دموع الثلج

بجد ضحكتيني بيالهووووووووي بتاعتك :) :) :) بصراحة تخيلت منظر يالهوي وهي بتتقال.

يا سيدتي الفاضلة انا مش بهاااااااااااااااجمك ولا حاجة ..... ولا بقول بتعملى دعاية علشان ليكي مصلحة عندهم .... بس طبيعي إللي بيشوف خدمة كويسة بيعملها دعاية "شفهيه" من غير ما يحس.

بالنسبة للإصلاح في مركز تويوتا العبور فدة عظيم لأنهم متعاقدين معاهم في القاهرة .... بس إسكندرية لا يوجد تعاقد إلا مع مراكز مجهولة الهوية .... وكمان العربية كانت مخبوطة بعد إسبوعين من شرائها فكنت محنتف قوي في تصليحها.

عندك حق اللون البترولي مشكلة وده بردة لون عربيتي لأنهم رشوها مرتين والتالت اللون إتظبط فيها وده إن دل على شئ فيدل على الجهل وعدم الخبرة.

وأخيرا سعادتي فعلا عندي مشكله معاهم وإن شاء الله حيكون حلها إني أغيرهم إن شاء الله من السنه التامينية الجاية..... وعلى العموم ربنا ما يحوجني ولا يحوجك ليهم ابدا

وبالمناسبة ممكن حضرتك تعملي فيا معروف وتتصلي بالأستاذ ممدوح وتشوفي هو مش بيرد على مكالماتي ليه؟ ممكن يكون مش بيرد على حد خالص!

الاخ الفاضل احمد باشا بسيونى اولا قلبى معاك وطبعا انت عارف ان احنا اتكلمنا مع بعض فى الموضوع ده قبل ماتجيب العربيه

بالنسبه لتجربتى الشخصيه المتعلقه بالجمعيه دى : لما جيت اشترى العربيه بالتقسيط كان لازم اامن عليها لان ده من شروط البنك (وانا شخصيا مبحبش شركات التأمين بصفه عامه وبحس انى بدفع فلوس على الفاضى واولا واخير ربنا سبحانه وتعالى هوا الحافظ ) ومش عارف الصراحه هل البنك هوا اللى اختار الشركه دى للتأمين ولا المعرض اللى اشتريت منه .... وقدر الله ان بعد شراء العربيه بشهرين واحد متخلف خبطنى من الرفرف الشمال تحت تنك البنزين على طول وقطع لى الدلايه اللى ورا الكاوتش الخلفى وانا طبعا مااستنيتش لا تأمين ولا دياولو وروحت للسمكرى بتاعى ظبطلى الخبطه على البارد والحمدلله مش باينه قوى ولما جيت اسأل على الدلايه لقيت الاصلى فى التوكيل ب 100 جنيه !!!!! واتصدمت من السعر ده الصراحه وقلت اما اشوف التأمين هيعمل ايه وكلمت الاستاذ مندوب الجمعيه وطبعا كان فى منتهى قله الذوق وكأنى بشحت منهه وقالى يعنى اكتب فى التقرير دلايه مقطوعه وقلتله ان الخبطه موجوده ومش الدلايه بس اللى اتقطعت وطبعا رفض تماما انه حتى يعاين العربيه والموقف ده احبطنى جدااا وخلانى اتأكد ان الجمعيه دى سيئه ... وبالصدفه عرفت ان الاستاذ ممدوح العربى شغال فى الجمعيه دى من خلال موضوعه اللى كان كاتبه عن التأمين وقلت اكلمه علشان يشوفلى حل للموضوع بتاعى وبصراحه اول ماكلمته لقيته قمه فى الادب والذوق معايا وانا احرجت من ذوقه واتفق معايا انه هايجبلى دلايه جديده بدل المقطوعه وفعلا قابلته وادانى الدلايه وقالى لواحتجت اى حاجه كلمنى وانا شكرته على اهتمامه ده واعتقد ان الاهتمام ده شخصى خاص بالاستاذ ممدوح يعنى هوا بمجهوده جابلى الدلايه وانا لو عملت ايه ماكنتش هاعرف اجيبها من الجمعيه دى .... وربنا يارب مايحوجنا ليهم ابداا ونفسى والله اخلص فلوس القسط علشان مأمنش تانى فى اى شركه

يا جماعة دى شهادة حق أنا تعملت مع أستاذ ممدوح راجل قمة فالاحترام وخلصلى موضوع التامين بسرعة مذهلة وكانت الفتورة7733 ودفعت .10 عشان 2007 دفعت651 ومابلتش مشاكل ومسالة الاخت دموع الثلج عشان هى بنت ومتسألش أنا راجل كنت شغال فالعربيات والحمدللاة فاهم أنا عربيتى ياريس وألولى فالشركة أصلح فالتوكيل وأدفع أنا أو أروح العبور و هما يدفعو مختصر الكلام أستاد ممدوح راجل محترم وخدمنى وتعب معاىا لوجة الله

انا كنت ناوى اعمل تامين مع الشركة دى ولكن الان غيرت كلامى
على المضرور منهم ان يكتب شكزى مدعمة بالمستندات الى الهيئة العامة للرقابة على التامين ومش حتخسر حاجة والجمعية هى التى ستخسر سمعتها عشان يعاملوا الناس كويس.

احمد يا حبيب قلبي
واضح ان في مشكلة بالاتصال بينك وبين استاذ ممدوح
وهو كان كلمني قبل كدة حاول تكلمة تاني يمكن عندة ظروف التمس لاخيك عذرا
انا مش بدافع عن حد وانت عارف بحبك قد ايه
وفعلا لو الكلام ماجبش نتيجة من حقك تعمل شكوي
بس جرب تاني
وابعتلة رسالة ولو على الموبيال
وابقي عرفني وصلت لايه

ابعدنا عنه يارب

ربنا يعزك يا كريم ويحفظك لأولادك

يا أخي والله كلمته أكتر من مرة وكل مرة يوعد ويخلف (الكلام ده بقاله 3 شهور) مش يوم ولا يومين يا كريم وإللي مضايقني إنه كان بيرد في الأول ومتعاون لأبعد الحدود بس لما جينا عند الدفع .... مرة يرد ومرة ما يردش..... بعدين يقولي حكلمك ويطنش .... وبعدين يقولي الشيك إتدفع وروح خده واروح مالاقيش حاجة .... وبعدين يقوللي هاتلي رقم الملف (بعد كل الدوخه) ويقوللي معلش الشيك انا قدمته النهاردة وواقف على الإمضاء والكلام ده من 3 أسابيع ... وبعدها أتصل بيه من ساعتها ومش بيرد! يعني شايف نمرتي ومش بيرد! وانا مش حعمل حركات مخابرات وأطلبه من رقم تاني والكلام ده! انا حعرف أجيب حقي من الشركة دية وهو كان مجرد سمسار وجاب الزبون وخلاص!

عارف يا كريم عندنا في الملاحة (الملاحة على الصعيد الدولي مش المصري طبعا) مهنة السمسار الملاحي او سمسار التأمين الملاحي من أنزه وأرفع المهن وإللي بيتنظرلها بإحترام شديد لأن الناس دي ليهم شعار واحد Our Word is Our Bond
بس فين الكلام ده في بلدنا!

على فكرة المبلغ مش كبير ولا حاجة ده كلهم 1600 جنية وإللي هو قالي إنه مفيش خصم ولا تحمل لو قدمت قطع الغيار وبعد ما قدمت قطع الغيار المكسورة ... لقيته بيكلمنى ويقوللي المبلغ 1400 بس علشان معرفش إية وإية ... طبعا قلتله ياعم ماشي اي حاجة بس أخد الفلوس .... والكلام ده كان من 3 أسابيع!

السلام عليكم ورحمة الله وبركاته
انا مع الاخ دموع الثلج انا عندى عربيتين واحدة لانسر والتانية تويوتا واللى امن عليهم هو نفس الشخص الاستاذ ممدوح العربى ومش عايز اقولكم الانسر دى اتخبطط كام مرة وكل مرة الاستاذ ممدوح بيخلص كل حاجة وكمان بيبعت العربية مع مندوب لحد عندى
بس انا علشان اتجنب انى استنى الشيك انا بتعامل مع مراكز الخدمة التابعة للجمعية
والعربية بتخلص بسرعة
وبعدين اللى اعرفة ان اشيك بيطلع بعديها بشهرين هو ده النظام هناك

اقتباس:

---

المشاركة الأصلية كتبت بواسطة goodwave

على فكرة المبلغ مش كبير ولا حاجة ده كلهم 1600 جنية وإللي هو قالي إنه مفيش خصم ولا تحمل لو قدمت قطع الغيار وبعد ما قدمت قطع الغيار المكسورة ... لقيته بيكلمنى ويقوللي المبلغ 1400 بس علشان معرفش إية وإية ... طبعا قلتله ياعم ماشي اي حاجة بس أخد الفلوس .... والكلام ده كان من 3 أسابيع!

---

احمد باشا
اعتقد انك قابلت استاذ ممدوح واخدت الشيك بتاعك
صح ولا انا غلطان
يا ريت تنوية عشان الامور تبان قدام الاعضاء

السلام عليكم

طيب ياجماعة لو الأستاز ممدوح ساب الجمعية الناس حاتعمل ايه؟ :boxing_smiley:

السلام عليكم

بالظبط يا كريم انا قابلت الاستاذ ممدوح في القاهرة يوم الجمعة وإستلمت منه الشيك بس حبيت التنوية يكون بعد ما اصرف الشيك وفلوسي تبقى في جيبي (معلش إللي يتلسع من الشربة ينفخ في الأيس كريم) وانا لسة صارفه والحمد لله.

ممدوح قابلني في القاهرة بمنتهى الترحيب والحفاوة وهو على فكرة وصله الموضوع بتاعي على المنتدى وهي كان متفهم ومقدر سؤ الظن إللي انا وقعت فية .... بس انا قلتله غنه في حال عدم الرد على مكالماتي وسوء المعاملة في فرع الشركة بالأسكندرية انا كنت خلاص فاض بيا.... وكمان بنا إن معرفتي بيه كانت في المنتدى فكان لازم أرجع للمنتدى وأطرح الموضوع من واجب النصيحة والتعريف.

إللي فهمته من الأستاذ ممدوح إن الشركة كبرت جدا جدا جدا (من حيث عدد المشتركين مش الخدمات) وذلك لتعاقدهم مع معارض كتيرة بجانب النسبة التنافسية للتأمين والأهم والأغرب إن هناك "شخص واحد" فقط بيمضي كل الشيكات من جميع أنحاء الجمهورية!!!!! وده لوحدة سبب كافي للعطلة بس أكيد ليه حل بس مش عندهم!

المهم إللي لا قدر الله يحصل لعربيته حاجة يا إما يصلح تبع المراكز التابعه ليهم يا إما يصلح على حسابة ولا ينتظر رد المباغ قبل شهرين ونص او تلاته أشهر.

هذا هو أخر ما حدث بالتفصيل وللأمانه.

بالحق أنا أخدت المبلغ إللي دفعته في التصليح ناقص 6.6% ودي أعتقد مصاريف إهلاك مع العلم إني سلمت قطع الغيار التالفة.

سؤال منطقي جدا يا أستاذ أشرف ....؟؟؟

بالفعل لنا الله على كل حال.

أعتقد يجب تغيير عنوان الموضوع لأن المحتوي غير العنوان

أستاذ إسلام جلال

مش فاهم قصد حضرتك ! ممكن توضح إنت لية بتطلب تغيير العنوان ولية لا يدل على المحتوى؟

العنوان: لجمعية المصرية للتأمين التعاوني ... خدمة سيئة للغاية!

البداية:
(عملت حادثة بعد الإستلام بأسبوعين وصلحت على حسابي في التوكيل وقدمت التقارير والمعاينة وخلافة .... لحد دلوقتي داخل في 3 (ثلاثة) أشهر ولم أسترد فلوسي.... وكل يوم عدي علينا بكرة معلش بعده لا الإسبوع إللي بعده..... طيب الأستاذ ممدوح إللي انا وثقت فيه علشان عضو وزميل في المنتى؟؟؟ لا يرد على مكالماتي وكبر دماغه.

وهو ده شغل سماسرة التأمين او القروض في مصر..... كلا ناعم ووعود لحد ما توقع العقد وبعد كدة خلااااااص .... وكحال مصر كلها خدمة ما بعد البيع زي الزفت او تكاد تكون معدومة!

اخيرا وليس بأخر

1- لا تثق في إعلانات المنتدى او أي شخص بيعمل دعاية لنفسة او لشركته على المنتدى "ما لم تكن" هذة الدعاية عن طريق او من خلال القائمين على المنتدى لأنهم بيدونا خدمة وهما مسؤلين عنها.

2- تدفع رخيص حتاخد خدمة سيئة ورخيصة وهو ده إللي حصل في الجمعية المصرية للتأمين التعاوني!

على فكرة ممكن تروحوا فروع الشركة وتشوفوا الخناقات على ودنه!

اللهم قد بلغت.)

النهاية:

(ممدوح قابلني في القاهرة بمنتهى الترحيب والحفاوة وهو على فكرة وصله الموضوع بتاعي على المنتدى وهي كان متفهم ومقدر سؤ الظن إللي انا وقعت فية .... بس انا قلتله غنه في حال عدم الرد على مكالماتي وسوء المعاملة في فرع الشركة بالأسكندرية انا كنت خلاص فاض بيا.... وكمان بنا إن معرفتي بيه كانت في المنتدى فكان لازم أرجع للمنتدى وأطرح الموضوع من واجب النصيحة والتعريف.

إللي فهمته من الأستاذ ممدوح إن الشركة كبرت جدا جدا جدا (من حيث عدد المشتركين مش الخدمات) وذلك لتعاقدهم مع معارض كتيرة بجانب النسبة التنافسية للتأمين والأهم والأغرب إن هناك "شخص واحد" فقط بيمضي كل الشيكات من جميع أنحاء الجمهورية!!!!! وده لوحدة سبب كافي للعطلة بس أكيد ليه حل بس مش عندهم!

المهم إللي لا قدر الله يحصل لعربيته حاجة يا إما يصلح تبع المراكز التابعه ليهم يا إما يصلح على حسابة ولا ينتظر رد المباغ قبل شهرين ونص او تلاته أشهر.)

اللي حايقرأ العنوان و بداية الموضوع لن يتوقع أبدا إن كان في سوء فهم و سيعطي انطباع سئ عن الشركة و عن الأخ ممدوح و خاصة إن كل شركات التأمين بتتأخر في رد مبالغ التعويضات بنفس المعدل تقريبا


علي فكرة أنا لا و لن أؤمن علي السيارة لقناعة عقائدية و لا أعرف الأخ ممدوح و لا الشركة المذكورة

أولا مشكور على التوضيح
ثانيا مش محتاج تبرر مشاركتك لأن والحمد لله لا يوجد غفتراض عندي لسؤ النية او المصلحة الشخصية
ثالثا ربنا يبارك لك في سيارتك ويثبتك على عقيدتك
رابعا.... الخدمة غللي أنا تلقيتها من الجمعية كانت فعلا سيئة ولا ترقى لمستوى شركات التامين الأخري إللي الواحد بيسمع عنها وعن معاملتها .... و"لولا" وجود الأستاذ ممدوح العربي لا أعتقد إني كنت حصرف الشيك إلا بعد شهرين كمان!

الموضوع إتفتح علشان طبعا كان عندي غحباط كبير من سؤ المعاملة في فرع الإسكندرية وإللي ظهر بعد إختفاء الاستاذ ممدوح وعلية حبيت أنبه الناس إن هيا دي الشركة وهو ده إللي بيحصل.

لإحقاق الحق كان لازم بردة أقول إن الراجل قابلنب وإداني الشيك بتاعي يعني الخدمة "سيئة" لكن مش نصابين! ولوكنت قفلت الموضوع او غيرته يبقى بساهم في تضليل الناس.

وأنا قلتها ومازلت بقولها .... الشركة مزدحمة جدا جدا
خدمة العملاء (بعد البيع) سيئة
صرف الشيكات بعد لا يقل عن شهرين ونص.
الإصلاح إلى أقصى درجة ممكن توصلها والتغيير في حالة الكسر او الدمار الكامل.
التصليح في التوكيل على حسابك مع إن في شركات تانية بتصلح في التوكيل على حسابها ودي حاجة انا ما كنتش عارفها قبل ما أأمن.
يبقى إللي بيفكر يأمن يعرف المزايا والعيوب لان الطبيعي إن مش كل الناس بتقول العيوب كلها لكن بتقول مزايا أكتر.

يعني تنصح بالتأمين مع الجمعية ..... لو تأمين وخلاص ومش محتاج تصلح معاهم ومش حتحتاج لهم إلا في حالة الهلاك التام او لو بتقسط لفترة صغيرة جدا وعاوز تدفع قسط صغير ... ممكن التأمين معاهم لأنهم قسط صغير وبيدفعوا في الاخر بس "بعد طلوع الروح وطولة البال"

بس لو معاك فلوس وعاوز تصلح في التوكيل وعربيتك موديل وخايف عليها وعاوز تصلح على حساب شركة التامين وعربية تبقى معاك وقت التصليح .... يبقى لا انصح بالتأمين معاهم.

توضيح حضرتك يوضح إن حضرتك لا زلت غير راضي كما كنت في بداية الموضوع و هو فهمت عكسه
عفوا و شكرا للتوضيح:flirt:

ياريت حد يذكر لنا اسماء و اماكن مراكز الخدمة التابعة للجمعية للعلم
اصل انا مأمن عندهم وعايز اطمئن , وعندى خبطة بسيطة بالباب و الرفرف , هل اصلحها بمركز خدمة تبعهم ام فى التوكيل , ولا مش مستاهلة علشان نسبة خصم عدم حوادث ؟