الموضوع: مش عارف أيه إللي حصل

بعد ما ركبت طقم كاوتش جديد ورصصت ومليت نيتروجين والدنيا إحلوت ... فجأة إمبارح بالليل الأر بي أم إرتفع لوحدة لما دوست دبرياج وبعد كدة الحكاية دي إختفت ودي كانت أول مرة تحصل م ساعت ما إشتريت العربية ... أما إنهاردة الصبح لقيت الأر بي إم بيعمل نفس الحكاية لما أدوس دبرياج ودة في حالة إن العربية ماشية مش واقفه والزيادة لما تابعتها لم تزيد عن 0.5 = 500 لفة ومش دايمة ... قولت مبدهاش وروحت صيانة منصور في المنصورة ... المهندس قالي عادي ما فيش مشاكل طالما لمبة الأعطال ما نورتش ... فمن معلوماتي من المنتدي قولت له عايز أنضف البوابات ... فعمل حاجة غريبة جاب بنزين 95 ونظف بيه البوابات مش منظف زي ما إخوانا في المنتدي بيقولوا ... وبعدين غير فلتر الهواء لأنه كان منتهي ... ونضف العربية بالهواء والعملية إظبطت ... وعلي الظهر الوضع رجع تاني زي ماكان الأر بي أم بيزيد لما أدوس دبرياج والعربية ماشية بمعدل 500 لفة والعملية دي مستمرة مع كل دوسة والماتور صوت علي وبقي خشن وزاد علي كدة إن العربية بطلت مني مرة وما رديتش تدور مرة إلا لو دوست علي دواسة البنزين عدة مرات ... إتصلت بالمهندس فقالي المشكلة مش في البوابات أو فيشة تي بي ِِإس المشكلة في فلتر البنزين ... قالي إنت غيرت فلتر الهواء فأصبح في هواء كتير بيدخل البوابة وفلتر البنزين لو مسدود هتكون نسبة البنزين للهواء قليلة جدا والعربية بالتالي هتعمل كدة ... الصراحة ركنت العربية تحت البيت وما رضيتش أروح الصيانة إلا لما أسأل خبراء المنتدي ... فما رأيكم؟