اسبيرانزا a620 مش حتقدر تغمض عينيك و انت بتسوقها

**Hosam** · 26-04-2007 05:34 PM

أعزائى و اخوانى أعضاء و مشرفى منتدانا الكرام..
عن تجربة واقعية نابعة من امتلاكى اسبيرانزا موديل a620 و عشقى لها يوم بعد يوم و نتيجة للجدل الكتير بخصوص السيارة الصينى فى مصر و خصوصا الاسبيرانزا اردت ان اقدم هذا الموضوع لكى يستفيد منه المهتمين بهذه السيارة و الحاجزين و مستنيين موعد الاستلام و فى ناس بتهبط من عزايمهم لكى يكون بين ايديكم معلومات حقيقية عن تجربة واقعية .. و حابدأ بانطباعاتى عن سيارتى و كنت قد بدأت جزء منها فى موضوع مواصفات اسبيرانزا a620 و حانقلها هنا و اكمل عليها ليكون الموضوع كامل متكامل للجميع .. ودايماً حتلاقونى باكتبلكم انطباعاتى عن سيارتى و تجاربى اليومية معاها .. و طبعا حاكون تحت امر اى واحد فيكم فى اى استفسار.

**Hosam** · 26-04-2007 05:39 PM

اولا نبدأ بمواصفات السيارة و هى منقولة عن مشرفنا الجميل م/آمر بعد اذنه طبعاً مع اضافات بسيطة:

2000 سي سي موتر mitsubishi galant
تكييف هواء ديجيتال بتحكم اوتوماتيكي
فرامل مانعة الانزلاق abs
2 وسادة هوائية للسائق والراكب الامامي
باور ستيرنج
فتحة سقف كهرباء
4 زجاج كهرباء بدون وحدات رفع
مرايا كهرباء
راديو كاسيت cd +vcd ماركة KENYOOD مع CD Changer لغاية 10 اسطوانات و بيشغل MP3 و Audio
6 سماعات و 2 شاشة عرض ماركة SYMPHONy بالمخادع الرأسية
جنوط اسبور واطارات رياضية مقاس 205/55/r16
فوانيس شبورة امامي وخلفي
ستارة خلفية كهربائية
الانوار الامامية قابلة للتعديل من الداخل hella
ولا توجد فروق واضحة بين موديل 2006 و 2007

**baher** · 26-04-2007 05:42 PM

قيها مثبت سرعه ولا لأ؟

**Hosam** · 26-04-2007 05:47 PM

المشاركة الأصلية كتبت بواسطة baher

قيها مثبت سرعه ولا لأ؟

لأ مفيهاش مثبت سرعة .

**baher** · 26-04-2007 05:47 PM

معلش انا كنت كتب السؤال قبل ما أشوق اجابتك وشكرا ليك على اهتمامك وردك

**Hosam** · 26-04-2007 05:51 PM

اما عن تجربتى مع السيارة فكانت غريبة جدا حيث اننى كنت رافض موضوع الصينى دا تماما و بالصدفة دخلت معرض سيارات و كانت واقفة .. اتفرجت عليها بهرتنى جدا بكل مميزاتها و خاصة سعرها و حسيت انها كتير على السعر دا و قلت طالما ليها ضمان ووكيل ذى ابو الفتوح فهى تستحق المغامرة و التجربة و على طول كتبتلهم شيك و روحت بالعربية و كانت الساعة تقريبا 11.30 مساء و طبعا السعر فى المعرض غير اللى للحجز فى التوكيل تماماً.
بعد تجربة السيارة ابهرتنى اكتر فى ثباتها و قوتها و نعومتها و فخامتها و حسيت انه اختيارى كان موفق
كل حاجة فيها تمام و هى لسة يادوب عاملة معايا 700 ك فقط و ماشاء الله ذى الفل
امبارح بس حاولت اشغل التكييف و للاسف لقيت انه قوة تبريده ضعيفة جدا و يكاد يكون الهوا خارج عادى
اما السخن فهو ممتاز ، الكمبروسور بيقوم عادى جدا و اعتقد انه يمكن محتاج فريون فقط
عموما عند صيانة 1000 ك حاشوف الموضوع دا مع التوكيل
المجمل العام للسيارة اكتر من ممتازة.

**Hosam** · 26-04-2007 05:52 PM

المشاركة الأصلية كتبت بواسطة baher

معلش انا كنت كتب السؤال قبل ما أشوق اجابتك وشكرا ليك على اهتمامك وردك

تحت أمرك عزيزى باهر المهم انى افيد الجميع قدر الامكان.

**Hosam** · 26-04-2007 05:56 PM

نسيت اقولكم ان كرسى السائق يتحرك فى 8 أوضاع لراحة السائق وكلها تعمل كهربائياً و كمان مزود بسخانات لو حبيت تدفى الكرسى.و من النوادر انى لما استلمت السيارة و طبعاً و انا بافحصها كان زر التسخين دا فى وضع On و انا مخدتش بالى و لما مشيت حسيت ان الكرسى طالعة منه حرارة وسخونة غيرطبيعية فوقفت و شيكت على الزر و قفلته.

**aamerbebo** · 26-04-2007 05:59 PM

الموضوع جامد جدا وربنا يوفقك وتكملة على خير
وربنا معاك يا حبيبي

**Hosam** · 26-04-2007 06:14 PM

و دلوقتى حأكلكم عن دوافع شرائى للسيارة لان البعض حيستغرب ايه اللى كان بيتفرج دا و فجأة كدا يطلع المبلغ دا و كانه بيشترى علبة عصير ..!!
أولاً عملية الشراء و زيارة الاسواق دى حاجة فى كل واحد مننا و ليها دوافع نفسية بتختلف من واحد للتانى و الموضوع انى لما فكرت اشترى لم يكن القرار وليد اللحظة لكنه كان من فترة و العملية انى كنت محتار فى الاختيار و كانت الاسبيرانزا كسيارة صينى مستبعدة تماماً و كنت اتفرجت على الفيكترا الجديد و عجبتنى لكن موتورها 1600 سىسى وكونها مانيوال بس كان مضايقنى .. لكن الحق قرار شرا الاسبيرانز هو اللى كان فعلاً وليد اللحظة و بارجح انه بسبب العامل النفسى..
و العامل النفسى بالنسبة لي مختلف شوية .. بمعنى انى عادة باشترى اى شىء بيعجبنى و اكون مقتنع بيه و معايا تمنه و على هذا الشىء انه يثبيلى انه يقدر يشبع الحاجة اللى عشانها جيبته .. و لو حصل العكس لا اسف و لا ندامة و الحمد لله معنديش حتة الندم على حاجة .. و هى دى تجربتى مع a620 و الحق كل يوم بتثبتلى جدارة و الحمد لله.