السلام عليكم ورحمة الله

كل سنه وحضراتكم طيبين وعيد اضحى مبارك عليكم جميعا

الموضوع وما فيه ان وانا راجع من مدينة العاشر من رمضان وداخل ميدان وسرعتي بطيئه لسه طالع من مطب وبتحرك واتأكدت ان طريقي سالك وبكمل , لقيت موتوسيكل طااااير بمعنى الكلمه وداخل الميدان بسرعه جنونيه !! انا اتخضيت وضربت فرامل (والحمدلله اني اخدت بالي منه وفرملت). ودخلت فيه بوش العربيه في جنب المتوسيكل بتاعه. شفت قطع البلاستيك بتطير قولت كده الفانوس بالسلامه. وطبعا قولت اكيد مش هاخد منه لا حق ولا باطل قمت شتمته وكملت شوية عشان ماوفش في الميدان واعطل الدنيا.

اول لما شفت العربيه من قدام لقيت كل حاجه سليمه ما عدا الاكصدام محكوك واللون طلع من بعض الاماكن و لقيت الكبوت جزء متطبق منه بس الحمدلله اللون موجود ماطلعش. بس اتخربش ولقيت الفانوس جزء منه اتخدش وهنا حمدت ربنا اني ضربت فرامل وإلا كان زمان الغبي دخل في الرفرف او اضعف الايمان كان اكل الفانوس.

دلوقتي انا عاوز اصلح الكبوت بس الخبطه جايه في مقتل. في بداية الكبوت ولما جيت افتح اشوف لو هعرف اردها لقيت ان في جزء حديد بيبقى ملحوم فيها دعامه بتخلي عملية سمكرتها اشبه بالمستحيل. بس بما اننا في مصر بلد اللامستحيل عاوز اعرف ينفع اعملها ولا لأ ؟ ولا مش مستاهله ؟
وربنا يبعد عنكم البهايم