السلام عليكم

أزيكم يا جماعة

كل عام وأنتم بخير وأعاد الله عليكم العيد بالخير واليمن والبركات

الحقيقة محتاج مساعدتكم ضروري في شراء عربية بعد العيد إن شاء الله

أنا كان معايا تيدا 2011 بلس ياباني ميكسيكي والحمد لله راحت في حادثة من 3 شهور

مش هكلم عن التيدا عشان هي عربية ممتازة في موتور وكماليات بس بقى النصيب

المبلغ المتوفر معيا حاليا 110 ألف ممكن يزيدوا بالعافية ل 115 ألف

محتار أجيب بالمبلغ ده عربية جديدة أو مستعمل كسر زيرو أو سنة سنتين ورا

طبعا محتاج العربية أوتوماتيك عشان طريقي طويل 80 - 90 كيلو يوميا رايح جاي من حدائق الأهرام للتجمع الخامس

طيب المتاح بقى من وجهة نظري ومن أسعار موقعين علي الإنترنت

أولا الجديد

شيفرولية أوبترا - فيات بوتنو أيفو - ميتسوبيشي لانسر أول فئة - بروتون بيرسونا - رينو سيمبول أو سكالا - نيسان صني

* معلش مع كامل إحترامي للهيونداي والكيا ومالكيها كلهم ربنا يباركلهم أنا إستبعدتهم لأسبابي الخاصة ومن غير ما حد يزعل أو يسأل

ثانيا المستعمل

أوكتافيا a4 أو a5 علي حسب الحالة والسنة - أوبل فيكترا 2008 - مازدا 3 - رينو فلوينس 2010 - وإختيارات كتير علي حسب سوق المستعمل

معلش إذا كنت طولت عليكم ويا ريت اللي هيقول الإختيار يقولي ليه وإيه أسبابه عشان أقدر أدور وأبحث

وفي النهاية متشكر ليكم كلكم وكل عام وأنتم بخير