الموضوع: استلمت a113 .... انطباعاتي الاولية

السلام عليكم...
استلمت من 6 ايام a113 موديل 2012 و انا بجد هقول انطباعاتي عنها بأمانة هقول العيوب و المميزات وطبعا دي انطباعات مبدأية

نبتدي بالمميزات:
1- العربية واسعة من جوة
2-الاوبشن بتاعها حلو جدا وكتير من زجاج كهربا و وحدات رفع و فوجات وحاجات تانية
3-اماكن تخزين كتيرة و الطبلوه شكله شيك
4- العفشة كويسة نوعا ما مش بحس انها نشفة و لكن ( لما نيجي للعيوب هقولكم)
4-الموتور بدون تشغيل التكييييف صوته ناعم نوعا ما
5-العزل الصوتي و الحراري ممتاز
6- النظام الصوتي كويس
7-فرامل جيدة جدا
8-تكييف جيد جدا
9-power ممتاز بمعني الكلمة


نيجي للعيوب (وطبعا ممكن تكون في حاجات عندي فردية فياريت لو في مشكلة فردية الناس توضحلي برده عشان محدش يفتكر ان ده عيب شائع)

1- فيتيس خشن اوي اوي خصوصا النقلة التانية و R فيهم عضة
2-صوت الموتور بيبقي وحش اوي مع التكييف بسمع ونة كدة مع دوسة البنزين

طبعا دول العيبين اللي لاحظتهم لكن انا استلمت العربية كانت محتاجة ظبط زواية مش عارف ليه برده !!! وعملتها و بقت تمام

علي فكرة ياجماعة انا اصلا من ملاك السيراتو (بتاعة الحاج) وبقالي سنتين عايش مع الكوري
وحبيت اكون اسبرانزاوي لاني فعلا معجب بال A113 و لو عضة الفتيس تتظبط كدة هتبقي زي الفل والله.


ان شاء الله هقولكم اي حاجة اكتشفها ف العربية باذن الله


3