السلام عليكم و رحمة الله و بركاته
أنا كنت غاوى المزادات دى فى سنة 2000 و 2001 و كده و كنت فعلا بدفع التأمين و أدخل أحضر جلسة المزاد, كان أيامها التأمين 2000 جنيه بس و فى آخر الجلسة, أخد التأمين و أروح, رحت مرتين المزاد اللى بيبقى جمب باب 6 بتاع مينا الاسكندرية.
أنا كنت بلاحظ أن العربيات بتخلص فى أحسن الأحوال بسعر مقارب لسعر السوق, بحيث أن اللى بيشتريها بياخدها و يظبطها و يركب, لكن تجارة, ماكنتش تنفعنى, كنت ببقى فى الأغلب مركز على العربيات المرسيدس.
بس, من الكلام مع الناس, كنت بسمع أن فيه فعلا عربيات بتخلص بسعر مغرى أوى زى ما أنتوا شفتوا العربيات دى, بس ده بيبقى نادرا مابيحصل و ان حصل بيبقى فى عربيات ماحدش عارف سعرها كام فى السوق و لا ميتها ايه, يعنى مثلا, تلاقى عربية فورد لنكولن خلصانة ب80000 جنيه, أكيد هى تستاهل أكتر من كده, بس لأن العربيات دى ماحدش يعرفها و مش هيشتريها الا اللى غاويها و عارفها و عارف هيظبطها ازاى, تلاقيها تخلص فى المزاد أقل من سعرها, بس السؤال هنا, هل لو فرضنا أنك اشتريت العربية الفورد موستانج و لا الكرايسلر كروسفاير دى, هتعمل ايه بعد كده؟؟؟؟, هتظبطها فين و بكام و أنت أصلا ايه اللى يعرفك العربية دى محتاجة أد ايه فى تظبيطها, ممكن تكون محتاجة شغل ب1000 جنيه و ممكن ب50000 جنيه, مين بقى اللى هيفصل فيها دى و خلى بالك أنك لازم تكون عارف حالة العربية اللى أنت داخل تزايد عليها ايه و ده أكيد مش هيبقى مكتوب فى كراسة الشروط, ده أنت لازم تروح تتفرج على العربية الل أنت هتزايد عليا و تعرف حالتها ايه و تقدر بالظبط هتتكلف منك تظبيط أد ايه, كده و الا هتلبس فى الحيط, لكن لو فرضنا أن المزاد بيتباع فيه مثلا مرسيدس شبح مو 97, بيبقى معروف أولها و آخرها و معروف العربية لازم تخلص بكام عشان حالتا كذا و هتتظبط بكذا و حاجتها عند فلان فى الحتة الفلانية و سعرها كذا, لكن الموستانج دى, أكيد حاجتها فى الحرفيين.
أنا مش عارف اذا كان الوضع زى زمان و ممكن تخش بمجرد ماتدفع التأمين و لا فعلا زى الاعلان مابيقول, لازم تجيب كراسة الشروط أم 200 جنيه, أصل ال5000 جنيه بتوع التأمين, دول راجعينلك, لكن ال200 جنيه دول رايحين عالأرض, شوية ورق ب200 جنيه, الله يرحم أيا ماكانت الكراسة ب10 جنيه !!!!!!!!