اولا كل سنة وانتم طيبين ويعود علينا جميعا بالخير

مواقف وطرائف كتير حصلتلي الايام اللي فاتت خصوصا مع انتشار الظاهرة الزفت دي واللي كان سببها الجهل والتخلف بتاع النظام السابق
هحكلكم على مواقف حصلتلي من 3 ايام
اول موقف :
كان فيه دبيح عندنا وكله طالع لوجه الله والحمد لله طبعا
وانا واقف مع الجزار بساعده علشان نعبي الدبيحة فجأة الاقي واحدة جاية بتتكلم بطريقة غريبة جدا (متمسكنة) ولابسة عبايا ونقاب وعمالة تقول ( ساعدوني يااهل الخير عندي سبع عيال مش عارفة اوكلهم) روحت عبيت كيس واديتها اللي فيه النصيب ومشيت
بعد شوية لقيت واحدة تانية بتتكلم بنفس الطريقة بالظبط بس لابسة لبس تاني ( الوان تانية) وساعدوني يااهل الخير العيال جعانين في البيت .. طبعا علشان مكنتش متخيل اللي هيحصل اديتها كيس واللي فيه النصيب
مرة تالتة جات واحدة بتتكلم بنفس الطريقة بس لابسة حاجة تانية خالص وقلعت النقاب بس نفس اللبس وجاية تقول ( حاجة لله)
طبعا الجزار اللي كان واقف جنبي فاهم الليلة كلها وزعقلها وقالها متجيش هنا تاني يا ....
اتضح من كلامه ان ال3 دول واحدة بس بتروح تغير وتيجي تاني ههههههههههههههههههههههههه هههههههههههههههههههههه
طبعا كنت ميت من الضحك وازاي حاجة زي دي تفوت عليا (الشحاتة اتطورت اوي عن زمان)

تاني موقف :
وانا مروح بعد المشوار ده وقفت في اشارة روكسي طبعا كلنا عارفين بتطول ازاي
مكانش معايا مناديل في العربية وقولت لو حد عايز حاجة هبقى اخد منه كيس ( ماهي الاشارة مليانة)
المهم لقيت ست كبيرة في السن (عرفتها من حركتها) لابسة نقاب ونضارة شمس في عز الضلمة جاتلي عند الشباك وقالتلي حاجة لله يابني روحت مطلع اللي فيه النصيب علشان اخد كيس مناديل منها كمان
قالتلي (حرام عليك ده انا بجري على كوم عيال)
طبعا استغربت من الكلام ده امال انتي نازلة تشحتي بقى في الاشارة مش تبيعي مناديل وتسترزقي
راسها والف سيف مش عايزة تديني كيس مناديل
وبعد مامشيت من الاشارة دي استنتجت حاجة ممكن تكون صح وممكن لا والله اعلم
الاستنتاج :
ان الست دي مش ست اصلا وده راجل لابس كدة وعامل فيها ست عجوزة وده خلاني اشك في النظارة الشمس اللي لابسها + مشيته مش مشيت ست ابدا

ثالث موقف :
كنت في وسط البلد امبارح انا وواحد صحبي كان نازل يشتري حلويات من محل مشهور
واحنا واقفين في عز الزحمة لقيت راجل واقف جنبي لابس لبس محترم وشكله راجل محترم جدا وكان حاطط النظارة الشمس في جيب القميص
المهم قولت لصحبي ( عاجبني القميص اللي الراجل لبسه ده)
والظاهر كدة سمع الكلمتين دول لقيته جاي عليا يقولي ( اي مساعدة يابني )
طبعا (بلمت ) من الكلمة اللي سمعتها دي وازاي واحد زيك ينزل يشحت وهو في عز صحته لا وكمان لابس لبس ميوحيش الناس انه شحات

كان بيفكرني بعادل امام في فيلم (المتسول) لما كان لابس بدلة ونضارة شمس وبيشحت قدام المطعم ههههههههههههههههههههههههه هههههه


طبعا المواقف دي حصلت من بين مواقف كتير جدا بس دي المواقف اللي بجد خلتني مسألش في اي حد يحاول يشحت او يتسول في الاشارات وده يخليني اقفل شباكي ومهتمش بكلام حد

دلوقتي بقا لو حد يعرف ناس محتاجين بجد في نطاق مدينة نصر وعين شمس ياريت يبعتلي على الخاص
واللي عنده موقف مشابه ياريت يحكيه

والسلام ختام